Medical Negligence : ऑपरेशनवेळी डोळ्यातच निसटली लेन्स; हॉस्पिटलवर हलगर्जीपणाचा गंभीर आरोप

आलप्पुळा मेडिकल कॉलेज हॉस्पिटलमध्ये उपचारादरम्यान गंभीर चूक झाल्याचा आरोप होत आहे. मोतीबिंदू ऑपरेशनसाठी दाखल झालेल्या एका वृद्ध महिलेच्या डोळ्यातील लेन्स आतमध्येच निसटली. हॉस्पिटल प्रशासनाने ही चूक लपवून ठेवली आणि आता जबाबदारी झटकत असल्याचा आरोप कुटुंबीयांनी केला आहे.

आलप्पुळा : केरळच्या आलप्पुळा मेडिकल कॉलेज हॉस्पिटलवर उपचारात हलगर्जीपणा केल्याचा एक गंभीर आरोप समोर आला आहे. मोतीबिंदूचं ऑपरेशन करण्यासाठी आलेल्या एका ६७ वर्षीय महिलेसोबत हा धक्कादायक प्रकार घडला. लथा असं या महिलेचं नाव असून त्या आरट्टुपुळा इथल्या रहिवासी आहेत.

कुटुंबीयांनी दिलेल्या माहितीनुसार, लथा यांच्या उजव्या डोळ्याचं मोतीबिंदू ऑपरेशन सुरू होतं. पण ऑपरेशन दरम्यान त्यांच्या डोळ्यातील नैसर्गिक लेन्स डोळ्याच्या आतल्या बाजूला निसटली. डॉक्टरांच्या चुकीमुळेच हा प्रकार घडल्याचा आरोप कुटुंबीयांनी केला आहे. इतकी मोठी चूक होऊनही हॉस्पिटल प्रशासनाने अनेक तास ही गोष्ट कुटुंबीयांपासून लपवून ठेवली, असंही त्यांचं म्हणणं आहे.

या चुकीमुळे लथा यांचा डोळा पूर्ववत करण्यासाठी आता आणखी एका मोठ्या ऑपरेशनची गरज आहे. हे ऑपरेशन फक्त कोट्टायम मेडिकल कॉलेजमध्येच होऊ शकतं. मात्र, आलप्पुळा मेडिकल कॉलेज प्रशासन त्यासाठी कोणतीही व्यवस्था करून देण्यास तयार नाही, अशी तक्रार कुटुंबीय करत आहेत.

दुसरीकडे, हॉस्पिटल प्रशासनाने मात्र हे सर्व आरोप फेटाळले आहेत. 'यात कोणतीही चूक झालेली नाही. मोतीबिंदू ऑपरेशनवेळी कधीकधी अशा अडचणी येतात, हा त्याचाच एक भाग आहे,' असं स्पष्टीकरण मेडिकल कॉलेजने दिलं आहे. पण कोट्टायममध्ये पुढील उपचारांची सोय करण्याबद्दल कोणतंही ठोस आश्वासन देण्यास त्यांनी नकार दिला आहे.