आलमट्टी धरणाची उंची 1 मिटरने वाढवणार? कर्नाटकचे मंत्री एम. बी. पाटील यांची माहिती

आलमट्टी धरण केवळ १ मीटर उंचावण्यास कायदेशीर अडचण नसल्यास कोणतीही हरकत नाही. याबाबत कायदेतज्ज्ञांच्या पथकाशी चर्चा केली जाईल, असे मंत्री डॉ. एम. बी. पाटील यांनी सांगितले.

विजयपूर : आलमट्टी धरण केवळ १ मीटर उंचावण्यास कायदेशीर अडचण नसल्यास इतर कोणतीही हरकत नाही. याबाबत कायदेतज्ज्ञांच्या पथकाशी चर्चा केली जाईल, असे कर्नाटकचे मंत्री डॉ. एम. बी. पाटील यांनी सांगितले. येथे पत्रकारांशी बोलताना त्यांनी आलमट्टी धरण १ मी. उंचावण्याबाबत कर्नाटकचे मंत्री शिवानंद पाटील यांच्या सूचनेवर प्रतिक्रिया देताना, एक मीटर उंचीला कायदेशीर अडचण नसल्यास उंची वाढवण्यास काहीच हरकत नाही, असे स्पष्ट केले.

१ मीटर पाणी साठवण्यासाठी किती गावांचे स्थलांतर करावे लागेल याबाबत सविस्तर चर्चा केली जाईल. याबाबतच्या सूचनांचे स्वागत आहे, असे ते म्हणाले. आलमट्टी धरण उंचावल्याने महाराष्ट्रात पूर येतो, या आरोपांवर स्पष्टीकरण देताना मंत्र्यांनी, आलमट्टी धरणामुळे महाराष्ट्रात कोणताही पूर आलेला नाही. अनेक अहवालांनीही हे सिद्ध केले आहे. तिथल्या पुराचा आणि आलमट्टी धरणाचा काहीही संबंध नाही, असे स्पष्ट केले.

बसव भारत निर्माण आवश्यक

मानवीय राष्ट्र म्हणून भारताने बदल घडवायचा असेल तर बसव भारत व्हायला हवे, असे उद्योगमंत्री एम. बी. पाटील म्हणाले. वीरशैव-लिंगायत समाज राज्यात १ कोटीपेक्षा जास्त संख्येने आहे. बसवण्णांना आपण कर्नाटक, महाराष्ट्रापुरतेच मर्यादित ठेवले आहे. बसवण्णांचे तत्त्वज्ञान संपूर्ण भारतात पसरायला हवे. इतरांना प्रेम देणारा समाज म्हणजे वीरशैव लिंगायत समाज आहे, असे ते म्हणाले. सर्व समाजातील लोकांना अन्न, अक्षर, आरोग्य, निवारा देणारा हा आमचा समाज आहे. वीरशैव-लिंगायत पक्षापलीकडे जाऊन, प्रांताच्या पलीकडे एकत्र यायला हवे.

समाजातील उपपंथांनाही एकत्र आणायला हवे. आपण त्यांच्यापासून दूर आहोत, ही भावना सोडायला हवी, असे ते म्हणाले. सर्व कष्टकरी समाजांना अनुभव मंडपात स्थान होते. कल्याण क्रांती झाली असती तर अर्धा कर्नाटक आमच्या समाजाचा असता. उत्तर कर्नाटक, मध्य कर्नाटक, दक्षिण कर्नाटक सर्व एकत्र यायला हवे. निवडणुका आल्यावर राजकारण करू. समाजाच्या बाबतीत राजकारण सोडून एक व्हायला हवे. संपूर्ण जगाला बसवेश्वरांचे तत्त्वज्ञान, वचने पोहोचायला हवीत. त्यासाठी आपण सर्वजण पक्षापलीकडे जाऊन एकत्र येऊन लढा द्यायला हवा. आपण सर्व मिळून समाजाचे संघटन करायला हवे. इतरांसोबतही सौहार्दपूर्ण वाटचाल करायला हवी, असे त्यांनी सांगितले.