Jaipur Hospital Fire : काल मध्यरात्री SMS रुग्णालयात भीषण आग, 6 रुग्णांचा होरपळून मृत्यू!

Jaipur Hospital Fire : जयपूरमधून एक हृदयद्रावक बातमी समोर आली आहे. राज्यातील सर्वात मोठ्या सरकारी रुग्णालयाच्या, सवाई मानसिंग रुग्णालयाच्या ट्रॉमा सेंटरमध्ये रविवारी रात्री उशिरा भीषण आग लागली. या दुर्घटनेत ६ रुग्णांचा दुर्दैवी मृत्यू झाला.

Jaipur Hospital Fire : राजस्थानची राजधानी जयपूरमध्ये रविवारी रात्री उशिरा मोठी दुर्घटना घडली. सवाई मान सिंह रुग्णालयाच्या ट्रॉमा सेंटरच्या आयसीयू वॉर्डमध्ये लागलेल्या भीषण आगीत सहा रुग्णांचा दुर्दैवी मृत्यू झाला. मृतांमध्ये दोन महिला आणि चार पुरुषांचा समावेश आहे. अधिकाऱ्यांच्या माहितीनुसार, ही दुर्घटना रात्री उशिरा ट्रॉमा आयसीयूमध्ये शॉर्ट सर्किटमुळे झाली. आग लागताच वॉर्डमध्ये गोंधळ उडाला आणि विषारी धुरामुळे रुग्णांची प्रकृती बिघडली. ट्रॉमा सेंटरचे प्रभारी डॉ. अनुराग धाकड यांनी सांगितले की, आगीच्या वेळी आयसीयूमध्ये ११ रुग्ण दाखल होते, त्यापैकी अनेक जण गंभीर भाजले होते.

सवाई मान सिंह रुग्णालयात भीषण आग

या दुर्घटनेनंतर संपूर्ण रुग्णालयात घबराट पसरली. रुग्णांचे नातेवाईक आपल्या प्रियजनांना वाचवण्यासाठी रडत-ओरडत इकडे-तिकडे धावत होते. माहिती मिळताच अग्निशमन दलाच्या अनेक गाड्या घटनास्थळी पोहोचल्या आणि सुमारे दोन तासांच्या प्रयत्नानंतर आगीवर नियंत्रण मिळवण्यात आले. आगीचे कारण शॉर्ट सर्किट असल्याचे मानले जात आहे, मात्र त्याच्या अचूक तपासासाठी एक समिती स्थापन करण्यात आली आहे. आग विझवताना रुग्णालयाच्या खिडक्या आणि काचा तोडून रुग्णांना बाहेर काढण्यात आले. अनेक रुग्ण बेपत्ता झाल्याने नातेवाईकांमध्ये संताप आणि आक्रोश आहे.

आयसीयूमध्ये दाखल असलेले बहुतेक रुग्ण बेशुद्ध होते

रुग्णालयाच्या एका अधिकाऱ्याने सांगितले की, आयसीयूमध्ये दाखल असलेले बहुतेक रुग्ण बेशुद्ध अवस्थेत होते. आग लागताच ट्रॉमा सेंटरची टीम, नर्सिंग स्टाफ आणि वॉर्ड बॉय यांनी तातडीने हालचाल केली. त्यांनी रुग्णांना ट्रॉलीवर टाकून बाहेर काढण्याचा प्रयत्न केला. ज्या रुग्णांना बाहेर काढता आले, त्यांना तातडीने दुसऱ्या वॉर्डमध्ये हलवण्यात आले. मात्र, सहा रुग्णांची प्रकृती अत्यंत नाजूक होती. डॉक्टरांनी त्यांना वाचवण्यासाठी सीपीआर देऊन खूप प्रयत्न केले, पण त्यांना वाचवता आले नाही.

माहिती मिळताच मुख्यमंत्री रुग्णालयात पोहोचले

राजस्थानचे मंत्री जवाहर सिंह बेदम यांनी सांगितले, “आयसीयूमध्ये शॉर्ट सर्किटमुळे आग लागल्याची माहिती मिळताच मुख्यमंत्री स्वतः रुग्णालयात पोहोचले. ही अत्यंत दुःखद घटना आहे. आगीमुळे काही रुग्णांचा मृत्यू झाला आहे. उर्वरित रुग्णांना सुरक्षित ठेवणे आणि त्यांच्यावर उत्तम उपचार सुनिश्चित करणे हे आमचे प्राधान्य आहे. उपचारात कोणतीही कमतरता भासू नये आणि भविष्यात अशी घटना पुन्हा घडू नये, असे निर्देश मुख्यमंत्र्यांनी दिले आहेत.”

ही दुर्घटना रुग्णालयाची सुरक्षा व्यवस्था आणि आरोग्य विभागाच्या तयारीवर मोठे प्रश्नचिन्ह निर्माण करते. वेळीच सुरक्षा उपकरणांची व्यवस्था असती तर ही शोकांतिका टाळता आली असती, असा आरोप मृतांच्या नातेवाईकांनी केला आहे.