अण्णा हजारे लक्ष द्या! BMW कारमध्ये बसून रोखणार भ्रष्टाचार, लोकपाल जनतेच्या पैशांतून घेणार 7 आलिशान कार!

Lokpal To Buy 7 Luxury BMW Cars : भ्रष्टाचाराला आळा घालण्याच्या उद्देशाने लोकपालची स्थापना करण्यात आली आहे. या संस्थेने अद्याप पूर्णपणे काम सुरू केलेले नाही. पण त्याआधीच लोकपालांच्या आलिशान खर्चावरून प्रश्न उपस्थित केले जात आहेत.

Lokpal To Buy 7 Luxury BMW Cars : भ्रष्टाचार रोखणे, भ्रष्टाचारावर नजर ठेवणे, भ्रष्टाचाराची घटना घडल्यास किंवा भ्रष्टाचाराशी संबंधित तक्रारी प्राप्त झाल्यास कारवाई करणे हे लोकपालांचे काम आहे. पण आता त्याच लोकपाल कार्यालयाने (The Office of Lokpal of India) आलिशान परदेशी गाड्या खरेदी करण्याची योजना जाहीर केली आहे. लोकपाल कार्यालयाने बीएमडब्ल्यू ३३० एलआय (BMW 330 Li Long Wheel Base) खरेदी करण्यासाठी विविध कंपन्यांकडून निविदा मागवल्या आहेत. दरम्यान, लोकपाल विधेयकाच्या प्रभावी अंमलबजावणीसाठी ज्येष्ठ समाजसेवक अण्णा हजारे यांनी तीव्र आंदोलन छेडले होते. आता या आलिशान कार खरेदी करण्याबाबत अण्णा काय प्रतिक्रिया देतात ते बघण्यासारखे असेल.

केवळ बीएमडब्ल्यू ३३० एलआयच नाही, तर आणखी सहा आलिशान गाड्या खरेदी करण्याची लोकपाल कार्यालयाची योजना आहे. एकूण सात गाड्या खरेदी करण्यासाठी पाच कोटी रुपयांपेक्षा जास्त खर्च येणार आहे. बीएमडब्ल्यू ३३० एलआयची किंमत ६० लाख रुपयांपेक्षा जास्त आहे. इतर गाड्यांची किंमतही खूप जास्त आहे. ज्या संस्थेचे काम भ्रष्टाचार रोखणे आहे, त्यांना इतक्या आलिशान गाड्यांची गरज का आहे, असा प्रश्न उपस्थित होत आहे.

पुढच्या महिन्यात लोकपाल कार्यालय आलिशान गाड्या खरेदी करणार

लोकपाल कार्यालयाच्या सूत्रांनी दिलेल्या माहितीनुसार, १६ ऑक्टोबर रोजी गाड्या खरेदीसाठी निविदा मागवण्याचा निर्णय घेण्यात आला आहे. निविदा प्राप्त झाल्यानंतर ७ नोव्हेंबर रोजी सर्व निविदांची तपासणी करून निर्णय घेतला जाईल. लोकपालांसाठी गाड्या भारतात आल्यानंतर, बीएमडब्ल्यू कंपनीकडून लोकपालांच्या ड्रायव्हर आणि कर्मचाऱ्यांना किमान सात दिवसांचे प्रशिक्षण दिले जाईल. गाडीची काळजी कशी घ्यावी, तिची देखभाल कशी करावी आणि ती व्यवस्थित कशी चालवावी, याचे प्रशिक्षण दिले जाईल. 

काम सुरू करण्यापूर्वीच गाडी!

भारतात सुमारे दीड दशकापूर्वी लोकपालच्या मागणीसाठी आंदोलन सुरू झाले होते. त्यानंतर विविध राज्यांमध्ये लोकपालची स्थापना झाली असली तरी, केंद्रीय स्तरावर लोकपाल नियुक्तीची प्रक्रिया अद्याप पूर्ण झालेली नाही. लोकपाल कार्यालयात कोण असेल, या संस्थेकडे कोणते प्रशासकीय अधिकार असतील, याबाबत अद्याप अंतिम निर्णय झालेला नाही. पण त्याआधीच गाडी खरेदी करण्याचा निर्णय घेण्यात आला आहे. लोकपालांच्या या आलिशान राहणीमानावरून देशभरात वाद निर्माण झाला असून, अनेक जण यावर टीका करत आहेत.