US मध्ये सॉफ्टवेअर इंजिनिअर म्हणून काम केलेल्या तरुणाने सुरु केला फूड स्टॉल

तीन वर्षे अमेरिकेत सॉफ्टवेअर इंजिनिअर म्हणून काम केल्यानंतर, एक तरुण भारतात परतला आणि मोहालीमध्ये फूड स्टॉल सुरू केला.

मोहाली : जागतिक परिस्थितीमुळे जगातील बहुतेक देश महागाईच्या समस्येने त्रस्त आहेत. अनेकांची नोकरी धोक्यात आली आहे, तर अनेकांनी आपली नोकरी गमावली आहे. अशा परिस्थितीत अनेकजण आर्थिक संकटात सापडले आहेत आणि पुढे काय करायचे या विवंचनेत आहेत. अशा वेळी तीन वर्षे अमेरिकेत सॉफ्टवेअर इंजिनिअर म्हणून काम केलेला एक तरुण भारतात परतला आणि मोहालीमध्ये फूड स्टॉल सुरू करून स्वावलंबी जीवन जगू लागला आहे. त्याची ही कहाणी आता सोशल मीडियावर व्हायरल झाली आहे.

तीन वर्षे न्यूयॉर्कमध्ये घालवल्यानंतर, मनिंदर सिंग भारतात परतले आणि त्यांच्या पत्नीसोबत मिळून पंजाबमधील मोहालीमध्ये घरी बनवलेले विविध उत्तर भारतीय पदार्थ विकणारा फूड स्टॉल सुरू केला. ब्लॉगर @realfoodler यांनी त्यांच्याबद्दल इंस्टाग्रामवर एक पोस्ट केली आहे, जी आता व्हायरल झाली आहे. सिंग फक्त सॉफ्टवेअर इंजिनिअर म्हणूनच राहिले नाहीत, त्यांनी अनेक क्षेत्रात काम केले आहे आणि त्यांना सुमारे १२ वर्षांचा कामाचा अनुभव आहे. आयटी व्यतिरिक्त, त्यांनी रिटेल, कॉल सेंटर आणि सेल्स क्षेत्रात काम केले आहे.

अलिकडेच अमेरिकेने अनेक बेकायदेशीर स्थलांतरितांना देशातून बाहेर काढले. पण सिंग हे त्यापैकी एक नाहीत. न्यूयॉर्कमध्ये राहत असल्याचा पुरावा म्हणून त्यांनी आपले ड्रायव्हिंग लायसन्स कॅमेऱ्यासमोर दाखवले आणि सांगितले की त्यांना अमेरिकेतून हाकलून लावण्यात आलेले नाही, तर वडिलांच्या निधनानंतर ते भारतात परतले आहेत. त्यांच्या पत्नीला स्वयंपाकाचा दोन दशकांचा अनुभव आहे. त्यामुळे त्यांनी एकत्र फूड बिझनेस सुरू करण्याचा निर्णय घेतला. त्यांची पत्नी विविध पदार्थ बनवते आणि ते तिला मदत करतात, असे मनिंदर सिंग म्हणतात. त्यांचा हा फूड स्टॉल यशस्वीपणे चालत असून ते राजमा, कढी पकोडा, भात, रुमाली रोटी, सोया चाप करी आणि मँगो लस्सी बनवतात.

अनेकांना कामाबद्दल न्यूनगंड असतो. काही कामे सगळ्यांना करायला आवडत नाहीत, पण मनिंदर सिंग यांनी सॉफ्टवेअर इंजिनिअर असूनही स्वयंपाकाचा व्यवसाय सुरू केल्यास लोक काय म्हणतील याची पर्वा न करता फूड बिझनेस सुरू केला आणि त्यात यशस्वीही झाले. ही गोष्ट आता अनेकांना प्रेरणा देत आहे. काही जण निवृत्तीनंतर असेच काम करणार असल्याचे म्हणत आहेत. स्वावलंबी राहण्यात काहीच गैर नाही, मेहनत आणि प्रामाणिकपणे केलेले काम नेहमीच फळ देते, असे एका व्यक्तीने कमेंट केली आहे.

पतीसोबत काम करणाऱ्या त्यांच्या पत्नीचेही आभार. देव त्यांना आशीर्वाद देवो, अशी दुसऱ्या एका व्यक्तीने कमेंट केली आहे. भारतात आपल्याला सर्व प्रकारची कामे करण्याची सवय लावावी लागेल. काही कामांना जोडलेला कलंक खूप जास्त आहे. अमेरिकेत प्रत्येकजण सर्व प्रकारची कामे करतो आणि करण्यास मोकळा असतो. भारतातही अशीच संस्कृती यावी असे मला वाटते, असे एका व्यक्तीने कमेंट केली आहे. प्रत्येकजण आपापल्या परीने शांतता हवी असते, असे दुसऱ्या एकाने उत्तर दिले आहे.

काम न करता बसून इतरांवर ओझे होण्यापेक्षा कोणतेही काम करून स्वावलंबी राहणे हेच मोठे यश आहे.