New H1N1 Strain : घाबरू नका! भारतात नवा स्ट्रेन नाही, ICMR ने अफवांना दिला पूर्णविराम

ICMR च्या शास्त्रज्ञांनी स्पष्ट केलं आहे की, भारतात इन्फ्लुएंझा ए (H1N1) चा कोणताही नवीन प्रकार आढळलेला नाही, त्यामुळे नागरिकांनी घाबरू नये. सध्याचा विषाणू हा ओळखीचाच असून, त्यावर उपलब्ध लस प्रभावी आहे. आरोग्य यंत्रणा परिस्थितीवर बारकाईने लक्ष ठेवून आहे.

नवी दिल्ली : इंडियन काउन्सिल ऑफ मेडिकल रिसर्च (ICMR) च्या शास्त्रज्ञांनी एक महत्त्वाचं स्पष्टीकरण दिलं आहे. भारतात इन्फ्लुएंझा ए (H1N1) चा कोणताही नवीन प्रकार (स्ट्रेन) आढळलेला नाही. त्यामुळे सध्या जो हंगामी ताप (Seasonal Influenza) पसरत आहे, त्याबद्दल घाबरण्याचं काहीही कारण नाही, असं त्यांनी म्हटलं आहे.

ICMR चं स्पष्टीकरण: भारतात H1N1 चा कोणताही नवीन स्ट्रेन नाही

ICMR च्या एका वरिष्ठ शास्त्रज्ञाच्या हवाल्याने प्रसिद्ध केलेल्या पत्रकानुसार, "सध्या भारतात पसरलेला इन्फ्लुएंझा ए (H1N1) pdm09 विषाणू हा A/Missouri/11/2025 (H1N1) pdm09-like या विषाणूसारखाच आहे. हे विषाणू clade 6B.1A.5a2a आणि subclade D.3.1.1 या गटातील असून, ते 2025 पासूनच पसरत आहेत."

या पत्रकानुसार, शास्त्रज्ञांनी हेही स्पष्ट केलं आहे की सध्या पसरत असलेले इन्फ्लुएंझाचे स्ट्रेन्स आणि नॉर्दर्न हेमिस्फिअरसाठी शिफारस केलेल्या लसीतील स्ट्रेन्स हे एकमेकांशी जुळणारे आहेत. म्हणजेच, सध्याची लस या विषाणूंवर प्रभावी आहे.

लक्षणं आणि काळजी

H1N1 सह कोणताही हंगामी ताप हा "बहुतेक वेळा आपोआप बरा होतो". ताप, खोकला, डोकेदुखी आणि अंगदुखी ही याची सामान्य लक्षणं आहेत. योग्य काळजी आणि पुरेशी विश्रांती घेतल्यास बहुतेक लोक बरे होतात, असंही या पत्रकात म्हटलं आहे. मात्र, लहान मुलं, वृद्ध व्यक्ती आणि ज्यांना आधीपासूनच काही आजार आहेत, त्यांना याचा जास्त धोका असू शकतो. जर लक्षणं कायम राहिली, वाढली किंवा गंभीर झाली, तर लगेच डॉक्टरांचा सल्ला घ्यावा, असं आवाहन करण्यात आलं आहे.

दिल्लीतील आरोग्य तयारीचा आढावा

आरोग्य यंत्रणा नियमित सर्वेक्षणाद्वारे परिस्थितीवर बारकाईने लक्ष ठेवून आहे आणि आवश्यक उपाययोजना करत आहे. केंद्रीय आरोग्य आणि कुटुंब कल्याण मंत्री जे.पी. नड्डा यांनी दिल्लीतील आरोग्य तयारीचा आढावा घेण्यासाठी एक बैठक घेतली. यामध्ये इन्फ्लुएंझा, डेंग्यू आणि मलेरियासारख्या हंगामी आणि कीटकजन्य आजारांच्या तयारीवर चर्चा झाली.

या बैठकीला दिल्लीचे आरोग्य मंत्री पंकज कुमार सिंह उपस्थित होते. त्यांनी दिल्लीतील सर्वेक्षणाची आणि रुग्णालयांच्या तयारीची माहिती केंद्राला दिली.

सिंह यांनी केंद्रीय आरोग्यमंत्र्यांना दिल्ली सरकारने केलेल्या उपाययोजना आणि रुग्णालयांच्या सज्जतेबद्दल माहिती दिली. रुग्णांना वेळेवर निदान आणि उपचार मिळावेत यासाठी उचललेल्या पावलांचीही माहिती त्यांनी दिली.

"दिल्ली सध्याच्या आरोग्य परिस्थितीला तोंड देण्यासाठी पूर्णपणे तयार आहे. आमच्याकडे बेड, डॉक्टर, औषधं किंवा आवश्यक वैद्यकीय उपकरणांची कोणतीही कमतरता नाही. प्रत्येक रुग्णाला वेळेवर आणि योग्य उपचार मिळतील," असं आश्वासन सिंह यांनी दिलं.