कर्नाटकच्या माजी डीजीपींची पत्नीनेच केली हत्या, चाकूने भोसकले, धक्कादायक कारण समोर

कर्नाटकचे माजी पोलीस प्रमुख ओम प्रकाश यांची त्यांच्या पत्नीनेच हत्या केली. रविवारी घरात झालेल्या भांडणानंतर पत्नीने त्यांच्यावर मिरची पावडर फेकली, त्यांना बांधले आणि चाकूने भोसकून हत्या केली. मुलीचीही चौकशी सुरू आहे.

बंगळुरु: कर्नाटक पोलिसांचे माजी प्रमुख ओम प्रकाश यांच्या हत्येच्या प्रकरणात नवा खुलासा झाला आहे. त्यांना जीवे मारणारा कोणी दुसरा नव्हे तर त्यांची स्वतःची पत्नीच होती. रविवारी ओम प्रकाश हे त्यांच्या घरी मृत अवस्थेत आढळले होते. दुपारी त्यांचे त्यांच्या पत्नी पल्लवी हिच्याशी भांडण झाले होते.

सूत्रांकडून मिळालेल्या माहितीनुसार, भांडणा दरम्यान पल्लवीने ओम प्रकाश यांच्यावर मिरची पावडर फेकली. त्यांना बांधले आणि चाकूने भोसकून हत्या केली. ६८ वर्षीय ओम प्रकाश यांच्यावर काचेच्या बाटलीनेही हल्ला करण्यात आला. हत्येनंतर ओम प्रकाश यांच्या पत्नीने दुसऱ्या पोलीस अधिकाऱ्याच्या पत्नीला सांगितले की तिने आपल्या पतीला मारले आहे. त्यानंतर त्या महिलेने आपल्या पतीला फोन करून घटनेची माहिती दिली. त्यांनी स्थानिक पोलिसांना कळवले. पोलीस घटनास्थळी पोहोचले तेव्हा ओम प्रकाश यांच्या पत्नी आणि त्यांच्या मुलीला ताब्यात घेतले. दोघींकडे जवळपास १२ तास चौकशी करण्यात आली आहे.

ओम प्रकाश यांच्या पोटात, छातीत अनेकदा चाकू भोसकला

सूत्रांकडून मिळालेल्या माहितीनुसार, पल्लवी ओम प्रकाश हत्या प्रकरणातील मुख्य संशयित आहे. ओम प्रकाश यांच्या शरीरावर चाकूने भोसकल्याचे अनेक व्रण आढळले आहेत. त्यांच्या पोटात आणि छातीत अनेक वेळा चाकू मारण्यात आला. अशी शक्यता आहे की हत्याकांडात दोन चाकू वापरण्यात आले.

वृत्तानुसार ओम प्रकाश यांनी आपली मालमत्ता एका नातेवाईकाच्या नावावर केली होती. यावरून पल्लवीशी त्यांचे भांडण झाले होते. हे भांडण लवकरच हिंसाचारात बदलले. पल्लवीने आपल्या पतीला चाकूने भोसकले. त्यांच्या मुलीने हत्याकांडात कोणती भूमिका बजावली याची पोलीस चौकशी करत आहेत.

ओम प्रकाश यांच्या मुलाच्या तक्रारीवरून गुन्हा दाखल

ओम प्रकाश यांचे पुत्र कार्तिकेय यांच्या तक्रारीवरून गुन्हा दाखल करण्यात आला आहे. कार्तिकेय म्हणाले की, त्यांची आई आणि बहीण नैराश्याने ग्रस्त होत्या. त्यांनी त्यांच्या वडिलांना जीवे मारण्याची धमकी दिली होती. त्यामुळे ओम प्रकाश आपल्या बहिणीच्या घरी गेले होते. हत्येच्या दोन दिवस आधी ते परत आले होते. माझी बहीण त्यांना भेटली आणि घरी परतण्याचा आग्रह केला होता.

कार्तिकेय म्हणाले, "माझी आई पल्लवी गेल्या आठवड्यापासून माझे वडील ओम प्रकाश यांना जीवे मारण्याची धमकी देत होती. या धोक्यामुळे माझे वडील माझ्या बहीण सरिता कुमारीच्या घरी गेले होते. दोन दिवसांपूर्वी माझी धाकटी बहीण कृती सरिता कुमारीच्या घरी गेली आणि माझे वडील ओमप्रकाश यांना घरी परत येण्यासाठी दबाव आणला. ती वडिलांना त्यांच्या इच्छेविरुद्ध घरी घेऊन आली."

कार्तिकेय म्हणाले की, गुन्ह्याच्या वेळी ते घरी नव्हते. त्यांच्या शेजाऱ्याने फोन करून सांगितले की त्यांचे वडील खाली पडले आहेत. तक्रारीत कार्तिकेय म्हणाले, "मी संध्याकाळी सुमारे ५:४५ वाजता घरी पोहोचलो. पाहिले की पोलीस अधिकारी उपस्थित होते. माझे वडील रक्ताच्या थारोळ्यात पडले होते. त्यांच्या डोक्यावर आणि शरीरावर जखमा होत्या. एक तुटलेली बाटली आणि चाकू त्यांच्या मृताजवळ पडला होता. त्यांना सेंट जॉन्स रुग्णालयात नेण्यात आले. माझी आई पल्लवी आणि माझी बहीण कृती नैराश्याने ग्रस्त आहेत. नेहमी माझ्या वडिलांशी भांडत असत. मला खात्री आहे की त्या माझ्या वडिलांच्या हत्येत सहभागी आहेत."

ओम प्रकाश हे १९८१ च्या बॅचचे आयपीएस अधिकारी होते. मार्च २०१५ मध्ये त्यांची पोलीस महासंचालक म्हणून नियुक्ती करण्यात आली होती. यापूर्वी त्यांनी अग्निशमन आणि आपत्कालीन सेवा आणि होमगार्डचेही नेतृत्व केले होते. मूळचे बिहारचे रहिवासी असलेल्या ओम प्रकाश यांच्याकडे भूगर्भशास्त्रात पदव्युत्तर पदवी होती.