कर्नाटकचे वनमंत्री ईश्वर खंड्रे यांची वीरशैव लिंगायत महासभेच्या राष्ट्रीय अध्यक्षपदी निवड

Eshwar Khandre Becomes National President of Veerashaiva Lingayat Mahasabha : शामनूर शिवशंकरप्पा यांच्या निधनामुळे रिक्त झालेल्या अखिल भारतीय वीरशैव लिंगायत महासभेच्या राष्ट्रीय अध्यक्षपदी ईश्वर खंड्रे यांची बिनविरोध निवड झाली.

Eshwar Khandre Becomes National President of Veerashaiva Lingayat Mahasabha : काँग्रेसचे ज्येष्ठ नेते शामनूर शिवशंकरप्पा यांच्या निधनामुळे रिक्त झालेल्या अखिल भारतीय वीरशैव लिंगायत महासभेच्या राष्ट्रीय अध्यक्षपदी वनमंत्री ईश्वर खंड्रे यांची बिनविरोध निवड झाली आहे.

बिनविरोध निवड

महासभेचे राज्याध्यक्ष शंकर बिदरी यांनी मंगळवारी पत्रकार परिषदेत ही माहिती दिली. मंगळवारी शहरात झालेल्या महासभेच्या कार्यकारिणी समितीच्या बैठकीत सर्व सदस्यांनी एकमताने सहमती दर्शवल्याने ईश्वर खंड्रे यांची बिनविरोध निवड करण्यात आली. गेल्या 13 वर्षांपासून महासभेचे राष्ट्रीय सरचिटणीस म्हणून कार्यरत असलेले खंड्रे हे गेल्या एका वर्षापासून वरिष्ठ उपाध्यक्षांचा प्रभारी पदभारही सांभाळत होते, असे त्यांनी स्पष्ट केले.

शामनूर शिवशंकरप्पा यांच्या निधनामुळे पद रिक्त होते

शामनूर शिवशंकरप्पा यांच्या निधनानंतर महासभेच्या अध्यक्षपदासाठी अनेक राजकीय नेते आणि स्वामीजींची नावे चर्चेत होती. मात्र, मंगळवारी झालेल्या कार्यकारिणी समितीच्या बैठकीत ही जबाबदारी ईश्वर खंड्रे यांच्यावर सोपवण्याचा निर्णय घेण्यात आला.

या पत्रकार परिषदेला नेते गणेश शामनूर, प्रभाकर कोरे, राजण्णा, वीरन्ना चरंती मठ, तसेच महाराष्ट्र, केरळ, तामिळनाडू यासह विविध राज्यांच्या शाखांचे अध्यक्ष आणि प्रतिनिधी उपस्थित होते.