प्रपोजल फोटोशूटमध्ये अंगठी गहाळ; शोधमोहिमेचा व्हिडिओ व्हायरल

बर्फाच्छादित युटाहमधील सुंदर पार्क सिटीमध्ये प्रपोजल फोटोशूट दरम्यान ही घटना घडली. यावेळी अंगठी गहाळ झाली.

प्रेम करणाऱ्यांना लग्नाची मागणी घेताना ती नेहमीच आठवणीत राहावी असे कोणाला वाटत नाही? एकत्रित जीवनाची सुरुवात करण्याचे पहिले पाऊल. ते नेहमीच लक्षात ठेवावे असेच अमेरिकेतील फिल मुई यांना वाटले. त्यासाठी त्यांनी किम सॅविनोला लग्नाची मागणी घालण्यासाठी युटाहमधील सुंदर पार्क सिटीची निवड केली. त्यांच्या आयुष्यातील या महत्त्वाच्या क्षणांचे छायाचित्रण करण्यासाठी त्यांनी छायाचित्रकारांचीही व्यवस्था केली. मात्र, त्यांनी विचार केल्यापेक्षा हा दिवस अधिक संस्मरणीय ठरला. 

कॅलिफोर्नियातील हे दोघेही सर्व तयारीनिशी पार्कमध्ये पोहोचले. विविध पोझमध्ये छायाचित्रे घेत असताना छायाचित्रकारालाच लग्नाची अंगठी दिसत नसल्याचे लक्षात आले. त्यांनी सांगितल्यावरच इतरांनाही ते लक्षात आले. मग तिथे एक शोधमोहीम सुरू झाली. 'शूटिंग संपल्यानंतर दहा मिनिटांतच आमची लग्नाची अंगठी हरवली. आमचे मन विषण्ण झाले. आम्ही अस्वस्थ झालो.' या घटनेबद्दल सांगताना ३४ वर्षीय फिलने फॉक्स १३ ला सांगितले. 

फोटोशूटसाठी आलेले वर-वधू, छायाचित्रकार, मदतनीस असे सर्वजण त्या राष्ट्रीय उद्यानात शोध घेत होते. त्यांच्या शोधात पार्कमधील इतर अपरिचित पर्यटकही सामील झाले. एकच गोंधळ उडाला. दरम्यान, पार्क सिटी स्की पेट्रोल आणि मेटल डिटेक्टरसह अंगठीचा शोध घेण्यात आला. पण अंगठी मात्र कुठेच सापडली नाही. 'आम्ही उभे राहिल्याच्या जागेपासून फार दूर गेलो नव्हतो. म्हणून लगेचच सापडेल असे आम्हाला वाटले होते. पार्कमधील अनेक लोक आमची मदत करण्यासाठी आले. जवळपास दोन तास शोध घेतला. पण सापडली नाही. शेवटी स्की पेट्रोलिंगवाल्यांनी सांगितले की आता अंगठी सापडण्यासाठी वसंत ऋतू येईपर्यंत वाट पाहावी लागेल.' किमने माध्यमांना सांगितले. 

शेवटी निराश होऊन परत जायला निघाले तेव्हा त्यांच्यासमोर अंगठी प्रकट झाली. बर्फाच्छादित गवतावर अंगठी चमकत असल्याचे फिलनेच पाहिले. 'फिलने ते सांगताच, 'मला ती सापडली!' मी वर-खाली उड्या मारत होतो, मला रडू आले. मी रडलो. कारण मी खूप उत्साहित होतो, शेवटी आम्हाला ती सापडली' किम म्हणाली. शेवटी तीच अंगठी हातात घेऊन फिलने पुन्हा किमसमोर गुडघे टेकवून लग्नाची मागणी घातली. याचा व्हिडिओ सोशल मीडियावर शेअर केल्यावर अनेकांनी दोघांना आनंदी कुटुंब जीवनाच्या शुभेच्छा दिल्या.