महिलांना ₹२१०० ची घोषणा!
सार
दिल्ली विधानसभा निवडणुकीपूर्वी, आपने महिलांना दरमहा ₹१,००० देण्याचे आश्वासन दिले आहे. निवडणुकीत विजय मिळाल्यास ही रक्कम ₹२,१०० पर्यंत वाढवण्यात येईल. नोंदणी झाल्यानंतर, पैसे थेट खात्यात जमा केले जातील.
नवी दिल्ली : पुढील वर्षी फेब्रुवारीमध्ये होणाऱ्या दिल्ली विधानसभा निवडणुकीसाठी, आपने कर्नाटकच्या गृहलक्ष्मी योजनेप्रमाणे महिलांसाठी एक नवीन आश्वासन दिले आहे. 'दिल्लीतील सर्व महिलांना तात्काळ दरमहा १,००० रुपये दिले जातील. निवडणुकीत आप सत्तेवर आल्यास ही रक्कम २,१०० पर्यंत वाढवण्यात येईल,' अशी घोषणा आपचे राष्ट्रीय संयोजक अरविंद केजरीवाल यांनी केली. महिला सन्मान योजनेला दिल्लीच्या मंत्रिमंडळाची मान्यता मिळाली आहे. याअंतर्गत महिला आजपासूनच नोंदणी करू शकतात. नोंदणी झाल्यानंतर, पैसे थेट खात्यात जमा केले जातील,' असे केजरीवाल म्हणाले. मुख्यमंत्री आतिशी यांनी याला 'केजरीवालची हमी' असे संबोधले आहे.
आपच्या या घोषणेनंतर, भाजपने 'निवडणुका जवळ येत असल्याने आश्वासनांचे लाडू दाखवून मते मिळवण्याचा प्रयत्न' अशी टीका केली आहे. १३ जानेवारीनंतर आदर्श आचारसंहिता लागू झाल्यास, पहिला हप्ता निवडणुकीपूर्वी पात्र महिलांच्या बँक खात्यात जमा केला जाईल, असे दिल्लीच्या मुख्यमंत्री आतिशी यांनी सांगितले.
आपच्या मुख्य कार्यालयात आयोजित कार्यक्रमात पक्षाच्या महिला कार्यकर्त्या आणि समर्थक मोठ्या संख्येने उपस्थित असताना केजरीवाल यांनी ही योजना जाहीर केली. मुख्यमंत्री महिला सन्मान योजनेसाठी २०२४-२५ च्या अर्थसंकल्पात तत्कालीन अर्थमंत्री आणि आताच्या मुख्यमंत्री आतिशी यांनी घोषित केलेली नोंदणी शुक्रवारपासून सुरू होईल, असे त्यांनी सांगितले.
ही योजना मूळतः दिल्लीतील १८ वर्षांवरील सर्व पात्र महिलांना दरमहा ₹१,००० देण्याचा प्रस्ताव आहे. "योजनेची नोंदणी शुक्रवारपासून सुरू होत आहे. ही रक्कम ₹२,१०० असेल," असे केजरीवाल यांनी सभेत सांगितले.
"ही योजना महिलांचे सक्षमीकरण करण्यासाठी आणि त्यांच्या आर्थिक गरजा पूर्ण करण्यासाठी आहे. भाजप याला मोफत 'रेवडी' म्हणते, पण मी हे आमच्या समाजाला बळकट करण्याचे एक पाऊल म्हणून पाहतो. पैसे कुठून येणार असा प्रश्न भाजप विचारते, पण आम्ही देऊ असे मी सांगितले आहे. मोफत वीज देणे शक्य नाही असे ते म्हणाले होते. ते मी केले," असे केजरीवाल म्हणाले.