दिल्लीतील वायू प्रदूषण: 'वॉकिंग न्यूमोनिया'चा धोका

गेल्या काही दिवसांपासून वायू प्रदूषणाशी झुंज देणाऱ्या दिल्लीकरांना आता एका नव्या श्वसनविकाराचा सामना करावा लागत आहे. प्रदूषित हवेमुळे अनेकांना 'वॉकिंग न्यूमोनिया'ची लागण होऊ लागली आहे.

नवी दिल्ली: गेल्या काही दिवसांपासून वायू प्रदूषणाशी झुंज देणाऱ्या दिल्लीकरांना आता एका नव्या श्वसनविकाराचा सामना करावा लागत आहे. प्रदूषित हवेमुळे अनेकांना 'वॉकिंग न्यूमोनिया'ची लागण होऊ लागली आहे.

मायकोप्लाझ्मा न्यूमोनिया या जीवाणूंपासून होणाऱ्या या आजाराची तीव्रता सामान्य न्यूमोनियापेक्षा कमी असली तरी, तो श्वसनात अडचणी निर्माण करतो. शारीरिक तपासणी किंवा क्ष-किरणांच्या साहाय्याने या आजाराचे निदान करता येते. सामान्यतः आजारी पडल्यावर विश्रांतीची गरज भासते, पण वॉकिंग न्यूमोनियाच्या रुग्णांमध्ये तसे नसल्याने या आजाराला हे नाव पडले आहे. वॉकिंग न्यूमोनियाचा प्रसार, लक्षणे:

या आजाराने ग्रस्त व्यक्ती खोकल्यावर किंवा शिंकल्यावर बाहेर पडणाऱ्या कणांच्या संपर्कात आल्याने वॉकिंग न्यूमोनियाचा प्रसार होतो. सामान्यतः गर्दीच्या ठिकाणी याचा प्रसार जास्त प्रमाणात होतो. वॉकिंग न्यूमोनियाने ग्रस्त व्यक्तीला ताप, खोकला, घशात खवखव अशी लक्षणे दिसून येतात. त्यांना श्वास घेण्यास त्रास होतो. ही लक्षणे ३ ते ५ दिवसांपर्यंत राहू शकतात.

निकृष्ट वायू गुणवत्ता: ३ दिवस ग्रॅप-४ सुरू ठेवण्याचे सर्वोच्च न्यायालयाचे निर्देश

निकृष्ट वायू गुणवत्तेमुळे गुदमरत असलेल्या राष्ट्रीय राजधानी दिल्ली आणि परिसरात लागू करण्यात आलेल्या चौथ्या टप्प्यातील प्रदूषणविरोधी ग्रॅप आणखी ३ दिवस सुरू ठेवण्याचे निर्देश सर्वोच्च न्यायालयाने दिले आहेत.

याबाबत पुढील सुनावणी सोमवारी होणार असल्याचे न्या. अभय एस. ओका यांच्या अध्यक्षतेखालील खंडपीठाने सांगितले. २५ नोव्हेंबर रोजी परिस्थितीचा आढावा घेतल्यानंतर ग्रॅप ४ थ्या टप्प्यावरून २ऱ्या टप्प्यावर आणण्याबाबत निर्णय घेतला जाईल, असेही न्यायालयाने म्हटले आहे. ग्रॅप-४ अंतर्गत ट्रक्सना दिल्लीत प्रवेश बंदी असतानाही त्याचे योग्य पालन होत नसल्याबद्दल न्यायालयाने नाराजी व्यक्त केली. शुक्रवारी दिल्लीतील वायू गुणवत्ता निर्देशांक (AQI) ४०१ होता, जो गंभीर मानला जातो. तापमान ११.३ अंश सेल्सिअस नोंदवले गेले.