⁠अजित डोवाल यांची 'सिंदूर' खेळी: दोन तास आधीपर्यंत शत्रू अनभिज्ञ, ऑपरेशन यशस्वी!

राष्ट्रीय सुरक्षा सल्लागार अजित डोवाल यांच्या नेतृत्वाखाली ऑपरेशन सिंदूर यशस्वी झाले आहे. पाक, पाकव्याप्त काश्मीरमधील दहशतवाद्यांचे तळ उद्ध्वस्त करण्यात आले. ऑपरेशन सुरू होण्याच्या २ तास आधीपर्यंत हल्ल्याचे अंतिम टार्गेट्स केवळ डोवाल यांच्याकडेच होते

नवी दिल्ली: भारताच्या राष्ट्रीय सुरक्षा सल्लागार अजित डोवाल यांनी ‘ऑपरेशन सिंदूर’मध्ये अतुलनीय नेतृत्व करत एक ऐतिहासिक मोहिम यशस्वी केली आहे. पाकिस्तान व पाकव्याप्त काश्मीरमधील दहशतवाद्यांचे तळ उद्ध्वस्त करणाऱ्या या कारवाईचं नियोजन इतकं गुप्त आणि अचूक होतं, की ऑपरेशन सुरू होण्याच्या फक्त २ तास आधीपर्यंत हल्ल्याचे अंतिम टार्गेट्स केवळ डोवाल यांच्याकडेच होते.

भारताच्या पहलगाममधील दहशतवादी हल्ल्याला प्रत्युत्तर देताना राबवण्यात आलेल्या या मोहिमेमध्ये, दहशतवाद्यांच्या लॉजिस्टिक हब, प्रशिक्षण कॅम्प आणि गुप्त तळांवर अचूक हल्ले करण्यात आले. ऑपरेशन दरम्यान नागरी वस्त्यांना धक्का न पोहोचवण्याची विशेष खबरदारी घेण्यात आली, जेणेकरून आंतरराष्ट्रीय दबाव किंवा कारवाईची शक्यता कमी होईल.

रणनीतीच्या केंद्रस्थानी अजित डोवाल

अजित डोवाल यांनी ही मोहीम दोन टप्प्यांमध्ये राबवली:

🔸 पहिला टप्पा – लष्कर-ए-तय्यबा आणि जैश-ए-मोहम्मदसारख्या संघटनांचे कॅम्प आणि लॉजिस्टिक बेस लक्ष्य करण्यात आले. ही ठिकाणं पाकिस्तानच्या पंजाब प्रांतात आणि पाकव्याप्त काश्मीरमध्ये होती.

🔸 दुसरा टप्पा – जर पाकिस्तानी सैन्य थेट हस्तक्षेप करत असेल, तर त्यांच्या लष्करी तळांवर, ड्रोन बेसवर आणि अग्रगण्य पोस्ट्सवर हल्ला करण्याचा प्लॅन तयार ठेवण्यात आला होता.

भारताचा स्पष्ट संदेश

बहावलपूर, मुरिदकेसारखी ठिकाणं आधीपासूनच भारताच्या रडारवर होती. हे तळ मोठ्या दहशतवादी नेत्यांशी संबंधित असून, या कारवाईतून भारताने स्पष्ट संदेश दिला की, कोणताही दहशतवादी आता सुरक्षित नाही, आणि भारत कुठल्याही क्षणी अचूक प्रतिकार करू शकतो.

ही मोहीम भारताच्या गुप्तचर यंत्रणेची क्षमता, अचूकता आणि जागतिक स्तरावरील रणनीतिक विचारांची झलक दाखवते. अजित डोवाल यांची शांतपणे, पण प्रभावीपणे आखलेली रणनीती भारताच्या राष्ट्रीय सुरक्षेचा नवा अध्याय ठरली आहे.