नैनीतालमध्ये १७ वर्षीय मुलीमुळे १९ युवक HIV बाधित

नैनीताल. उत्तराखंडच्या नैनीतालमध्ये एड्सच्या संसर्गाचा धक्कादायक प्रकार समोर आला आहे. येथे एका १७ वर्षीय मुलीसोबत शारीरिक संबंध ठेवल्याने १९ हून अधिक मुले HIV किंवा एड्स पॉझिटिव्ह आढळली आहेत. मीडिया रिपोर्ट्सनुसार अल्पवयीन मुलीला हेरॉइनचे व्यसन आहे. तिने ड्रग्जसाठी मुलांसोबत संबंध ठेवले. काहींकडून पैसे घेऊन हेरॉइन विकत घेतले.

नैनीतालच्या जिल्हा आरोग्य अधिकाऱ्यांनी सांगितले की ही चिंताजनक घटना आहे. आम्ही या प्रकरणी तातडीने कारवाई करत आहोत. मुलीच्या व्यसनामुळे ही दुर्दैवी परिस्थिती निर्माण झाली. मुलीशी आम्ही संपर्कात आहोत. तिला समुपदेशन आणि मदत दिली जात आहे. तिचे व्यसन सोडवण्याचे प्रयत्न केले जात आहेत.

कसे कळले युवक झाले आहेत HIV पॉझिटिव्ह

नैनीतालमध्ये एकाच वेळी इतक्या युवकांमध्ये HIV पसरल्याने लोक आश्चर्यचकित झाले आहेत. युवक आजारी पडू लागल्यावर हा प्रकार समोर आला. ते उपचारासाठी रामदत्त जोशी संयुक्त रुग्णालयातील एकात्मिक समुपदेशन आणि चाचणी केंद्र (ICTC) मध्ये पोहोचले. युवकांमध्ये HIV ची लक्षणे होती. नैनीतालच्या रामनगरच्या रुग्णालयात सर्वांची चाचणी करण्यात आली. रिपोर्ट पॉझिटिव्ह आला. प्रकरणाची चौकशी केली असता सर्व युवकांमध्ये एक दुवा जोडला गेला. सर्वांनी त्याच मुलीसोबत संबंध ठेवले होते. त्यानंतर मुलीची चाचणी करण्यात आली. ती एड्सग्रस्त निघाली.

मुलीने पैशाची गरज भागवण्यासाठी युवकांसोबत संबंध ठेवले

चौकशीदरम्यान असे समोर आले की मुलीला तिचे व्यसन पूर्ण करण्यासाठी पैशाची गरज होती. पैशांसाठी तिने स्थानिक युवकांसोबत शारीरिक संबंध ठेवले. युवकांना माहित नव्हते की ती HIV संक्रमित आहे. नैनीतालचे मुख्य वैद्यकीय अधिकारी हरीश चंद्र पंत यांनी या घटनेवर चिंता व्यक्त केली आहे. त्यांनी सांगितले की, सामान्यतः येथे वर्षभरात सुमारे २० HIV पॉझिटिव्ह रुग्ण आढळतात. यावर्षी केवळ पाच महिन्यांतच १९ नवीन रुग्ण आढळले आहेत.