Sameera Reddy : 'मी स्वतःसाठी तयार होते, तुमचा रिमोट तुमच्याच हातात ठेवा'; समीरा रेड्डी असं का म्हणाली?

अभिनेत्री समीरा रेड्डीने म्हटलंय की, लोकांची स्तुती किंवा टीका आपला आत्मविश्वास ठरवू शकत नाही. लॅक्मे फॅशन वीकमध्ये तिने महिलांचा पाठिंबा आणि बॉडी पॉझिटिव्हिटीवर मनमोकळ्या गप्पा मारल्या.

मुंबई : लोकांची स्तुती किंवा टीका आपला आत्मविश्वास ठरवू शकत नाही, असं अभिनेत्री समीरा रेड्डीने स्पष्ट केलंय. तिने इन्स्टाग्रामवर महिलांकडून मिळणारा पाठिंबा आणि मुलांच्या संगोपनावर मनमोकळेपणाने तिचं मत मांडलं.

कोणी कौतुक केलं की आपल्याला भारी वाटतं. पण कोणी टीका केली की आपण स्वतःवरच शंका घ्यायला लागतो. पण या दोन्ही गोष्टींवरून आपला आत्मविश्वास मोजला जाऊ नये, असं समीरा म्हणते. ती १६ ऑक्टोबरला झालेल्या 'लॅक्मे फॅशन वीक'मध्ये सहभागी झाली होती. यावेळी तिने इन्स्टाग्रामवर महिलांनी दिलेल्या पाठिंब्याबद्दल आणि इतरांच्या स्तुतीची वाट न बघता स्वतःवर प्रेम कसं करावं, हे ती मुलांना कसं शिकवते यावर गप्पा मारल्या.

महिलांनीच बनवली हक्काची जागा

समीरा इन्स्टाग्रामवर नेहमीच 'बॉडी पॉझिटिव्हिटी'बद्दल पोस्ट करत असते. तिने ऑनलाइन जगात महिलांकडून मिळणाऱ्या पाठिंब्याबद्दल आनंद व्यक्त केला. तिला मिळणाऱ्या प्रतिक्रिया काळानुसार कशा बदलल्या, हे तिने सांगितलं. "मी जेव्हा सिनेमात होते, तेव्हा बहुतांश मुलं माझं कौतुक करायची. पण आता मला माता आणि तरुण मुलींकडून जास्त प्रेम मिळतंय," अशी आठवण तिने सांगितली.

"दहा वर्षांपूर्वी जेव्हा मी सिनेमात काम करायचे, तेव्हा मुलांकडूनच जास्त कॉम्प्लिमेंट्स मिळायच्या. पण आज आया आणि मुली माझं कौतुक करत आहेत. एका महिलेकडून मिळणाऱ्या कौतुकापेक्षा दुसरं काहीही मोठं नाही," असं ती म्हणाली.

"आम्ही अशी एक सुरक्षित जागा (सेफ स्पेस) तयार केली आहे, जिथे महिलांना त्यांच्या शरीराबद्दल कोणताही न्यूनगंड न बाळगता मनमोकळेपणाने व्यक्त होता येईल. आजच्या काळात मानसिक आरोग्य खूप महत्त्वाचं आहे. मी स्वतः रोज माझ्या मानसिक आरोग्याकडे लक्ष देते," असं तिने सांगितलं.

मुलांना समीराचा खास सल्ला

समीराने यावरही भाष्य केलं की, ती मुलांना इतरांच्या स्तुतीची वाट न बघायला कसं शिकवते. तिने तिच्या ७ वर्षांची मुलगी आणि ११ वर्षांच्या मुलासोबतचे किस्से शेअर केले. ती मुलांना असा सल्ला देते की, लोकांची मतं खूप लवकर बदलतात, त्यामुळे इतरांच्या 'व्हॅलिडेशन'ची (मान्यतेची) वाट बघू नका.

"मी माझ्या ७ वर्षांच्या मुलीला आणि ११ वर्षांच्या मुलाला हेच सांगते. इतरांच्या कौतुकाची वाट बघू नका. सगळे जेव्हा 'वाव' म्हणतात तेव्हा छान वाटतं. पण तेच लोक जेव्हा 'तुला काय झालंय? तू अशी का दिसतेय?' असं विचारतात तेव्हा वाईट वाटतं. इतरांच्या मतांमुळे आपला मूड आणि कॉन्फिडन्स खराब होता कामा नये."

"म्हणूनच मी मुलांना नेहमी न्यूट्रल राहायला सांगते. पुढे काय होईल हे कोणालाच माहीत नसतं. एका क्षणी कौतुक करणारे लोक, दुसऱ्याच क्षणी टीका करू शकतात," असं ती म्हणाली.

'तुमचा रिमोट तुमच्याच हातात असू द्या'

समीरा सार्वजनिक कार्यक्रमांना जातानाही हाच फॉर्म्युला वापरते. "मी स्वतःसाठी तयार होते. मी स्वतःवर खूश आहे. लोक काहीही म्हणोत, मी सुपर आहे असं मला वाटलं की बास," असं ती म्हणते. आपल्याकडे असा कॉन्फिडन्स असेल तर इतरांच्या बोलण्याचा आपल्याला त्रास होत नाही.

"मीडिया असो वा दुसरं कोणीही, तुम्हाला कंट्रोल करण्याची पॉवर त्यांना देऊ नका. जर घरात सासू-सासरे काही बोलले, तर मी थेट सांगते की, 'थँक्यू, ते तुमचं मत आहे, मी ते मानलंच पाहिजे असं नाही.' तुमची पॉवर नेहमी तुमच्याच हातात असली पाहिजे," असं तिने स्पष्ट केलं.

बॉलिवूड आणि साऊथ इंडियन सिनेमांमध्ये चमकलेली समीरा रेड्डी आता भारतातील एक प्रभावशाली डिजिटल कंटेंट क्रिएटर बनली आहे. तिने सिनेमांपासून दूर राहूनही, बॉडी पॉझिटिव्हिटी, मानसिक आरोग्य आणि खऱ्या मातृत्वाबद्दल जागरूकता निर्माण करून एक नवा ट्रेंड सेट केला आहे.