Saira Banu : 'वयाच्या १२ व्या वर्षापासून दिलीप कुमार यांच्यावर प्रेम होतं', वाढदिवशी जुन्या आठवणींना उजाळा
सार
आपल्या वाढदिवसानिमित्त सायरा बानू यांनी एक भावनिक पोस्ट शेअर केली आहे. यात त्यांनी बालपणीच्या आठवणी, कुटुंबासोबतचे जंगी सेलिब्रेशन, वयाच्या १२ व्या वर्षापासून दिलीप कुमार यांच्याबद्दल वाटणारं प्रेम आणि 'जंगली' सिनेमातून झालेल्या आपल्या शानदार पदार्पणाबद्दल सांगितलं आहे.
मुंबई : ज्येष्ठ अभिनेत्री सायरा बानू यांनी आपल्या वाढदिवसानिमित्त चाहत्यांना जुन्या आठवणींच्या सफरीवर नेलं. बालपणीचे वाढदिवस, कुटुंबासोबतची धमाल आणि दिवंगत अभिनेते दिलीप कुमार यांच्यासोबतच्या अजरामर प्रेमाच्या आठवणींना त्यांनी उजाळा दिला आहे.
बालपणीच्या वाढदिवसांच्या नॉस्टॅल्जिक आठवणी
सायरा बानू यांनी इंस्टाग्रामवर एक नॉस्टॅल्जिक पोस्ट शेअर केली. यात त्यांनी आई आणि प्रसिद्ध अभिनेत्री नसीम बानू, ज्यांना त्या प्रेमाने "परी चेहरा नसीम बानूजी" म्हणायच्या, आजी शमशाद वाहिद खान आणि मोठा भाऊ सुलतान यांच्यासोबत साजऱ्या केलेल्या वाढदिवसांच्या आठवणी सांगितल्या. कुटुंबाच्या प्रेमामुळे हे वाढदिवस नेहमीच एक मोठा सोहळा असायचे, असं त्यांनी म्हटलं आहे.
"माझ्या वाढदिवसात नेहमीच काहीतरी भव्य असायचं," असं सायरा यांनी लिहिलं. त्या काळात कापल्या जाणाऱ्या मोठ्या केकबद्दल त्या पुढे लिहितात, "ते केक म्हणजे साधे केक नसायचे, तर जणू काही एखादी कलाकृती असायची. इतके उंच की, मला खात्री आहे, कुतुबमिनारलाही कॉम्प्लेक्स आला असता."
मिळणाऱ्या गिफ्ट्समागच्या भावनांबद्दलही त्यांनी लिहिलं. त्या म्हणतात, "प्रत्येक गिफ्टवर त्या व्यक्तीची सही असायची, ज्याने खूप विचार केला असेल की, 'माझ्या मुलीला कशाने आनंद होईल?'"
सिनेमा आणि दिलीप कुमार यांच्यावरचं प्रेम
यानंतर सायरा यांनी आपल्या आयुष्यातील दोन मोठ्या पॅशनबद्दल सांगितलं - एक म्हणजे भारतीय सिनेमा आणि दुसरे म्हणजे दिलीप कुमार. सायरा यांनी सांगितलं की, त्या अगदी लहान वयापासूनच या दिग्गज अभिनेत्याच्या चाहत्या होत्या. "मी वयाच्या बाराव्या वर्षापासूनच त्यांच्या प्रेमात आकंठ बुडाले होते," असं त्यांनी लिहिलं. कधीतरी त्यांना भेटता यावं किंवा त्यांच्यासोबत सिनेमात काम करता यावं, अशी आशा त्यांना वाटायची.
सायरा यांच्या आठवणीनुसार, त्यावेळी दिलीप कुमार यांनी त्यांच्या या भावनांना प्रतिसाद दिला नाही. 'तू अजून खूप लहान आहेस,' असं म्हणून ते नकार द्यायचे.
'जंगली'मधून झालेलं भव्य पदार्पण
त्यांच्या सिनेसृष्टीतील प्रवासाला 'जंगली' सिनेमामुळे एक मोठं वळण मिळालं. या सिनेमाला त्यांनी आपलं "ग्रँड मॅग्नॅनिमस डेब्यू" (भव्य पदार्पण) म्हटलं आहे. ज्या काळात ब्लॅक अँड व्हाईट सिनेमाचं राज्य होतं, तेव्हा हा सिनेमा आला होता. त्याबद्दल त्या लिहितात, "अचानक असं वाटलं की, रंगांनाही सिनेमात एक नवी मस्ती सापडली आहे."
ही पोस्ट इन्स्टाग्रामवर पाहा सायरा बानू खान (@sairabanu) यांनी शेअर केलेली पोस्ट
'जंगली' प्रचंड यशस्वी ठरला. सायरा सांगतात की, सुरुवातीच्या सिनेमांच्या यशामुळे त्यांच्या कुटुंबाच्या आयुष्यात मोठे बदल झाले आणि याचमुळे त्यांचं कुटुंब पाली हिलला राहायला गेलं.
सायरा बानू यांच्या या वाढदिवसाच्या पोस्टमध्ये बालपणीच्या आठवणी, सिनेसृष्टीतील पदार्पण आणि दिलीप कुमार यांच्यासोबतच्या नात्याचे सुंदर पैलू उलगडले आहेत. चाहते आणि सिनेसृष्टीतील अनेक कलाकारांनी त्यांच्या या पोस्टवर शुभेच्छांचा वर्षाव केला आहे.