Rhea Chakraborty : आडनावामुळे वडिलांची नोकरी गेली; कुटुंबावर मोठा परिणाम, रिया चक्रवर्तीचं २०२० च्या घटनेवर भाष्य

Rhea Chakraborty on Tough Period : अभिनेत्री रिया चक्रवर्तीने सुशांत सिंग राजपूतच्या मृत्यूनंतरच्या कठीण काळाबद्दल सांगितलं. या प्रकरणाचा तिच्या कुटुंबावर कसा परिणाम झाला आणि तिच्या आडनावामुळे तिच्या वडिलांना नोकरी कशी गमवावी लागली, यावर तिने भाष्य केलंय

मुंबई : अभिनेत्री रिया चक्रवर्तीने २०२० मध्ये अभिनेता सुशांत सिंग राजपूतच्या मृत्यूनंतर तिच्या तिच्या कुटुंबावर आलेल्या कठीण काळाबद्दल मन मोकळं केलं आहे. रिया सध्या 'द ट्रेटर्स सीजन २' या शोमध्ये दिसते आहे. तिने सांगितलं की, सुशांतच्या मृत्यूनंतरच्या वादामुळे तिच्या कुटुंबाला चौकशी आणि मीडियाच्या त्रासापलीकडेही खूप काही सहन करावं लागलं.

फराह खानच्या कुकिंग व्लॉगमध्ये बोलताना रियाने तिच्या वडिलांसोबत घडलेला एक प्रसंग सांगितला. तिने दावा केला की, तिच्या वडिलांना एका मोठ्या हॉस्पिटलमध्ये मेडिकल सुपरिटेंडेंट या मोठ्या पदाची ऑफर मिळाली होती. पण जेव्हा हॉस्पिटलला त्यांचं आडनाव आणि ते रियाचे वडील आहेत हे कळालं, तेव्हा ती नोकरीची संधी त्यांच्याकडून काढून घेण्यात आली.

रियाच्या म्हणण्यानुसार, तिच्या वडिलांना सांगण्यात आलं की, "सॉरी, तुम्ही रिया चक्रवर्तीचे वडील आहात ना, त्यामुळे..." याचा अर्थ असा होता की, ते रियाचे वडील असल्यामुळे त्यांना ती नोकरी दिली जाऊ शकत नाही. या प्रकरणामुळे तिच्या कुटुंबातील सदस्यांनाही त्रास सहन करावा लागला, ही गोष्ट खूप वेदनादायी होती, असं रिया म्हणाली.

‘माझ्यावर अनेक वर्षं संशय घेतला गेला' - रिया चक्रवर्ती

अनेक वर्षं संशयाच्या नजरेने पाहिलं गेल्यामुळे तिच्या मानसिकतेवर कसा परिणाम झाला, यावरही रियाने भाष्य केलं. 'द ट्रेटर्स' या शोमध्ये तिला विचारण्यात आलं की, तिला 'इनोसंट' (Innocent) व्हायला आवडेल की 'ट्रेटर' (Traitor)?

यावर रियाने 'इनोसंट' पर्याय निवडला. तिने स्पष्ट केलं की, अनेक वर्षं लोकांनी तिच्यावर संशय घेतला आहे. ती म्हणाली की, तिला नुकतीच क्लीन चिट मिळाली आहे आणि लोकांना आता कळलं आहे की ती निर्दोष आहे. इतकी वर्षं संशयाच्या छायेत घालवल्यानंतर तिला पुन्हा तसं काही अनुभवायचं नाहीये.

तिच्या या बोलण्यावरून हे स्पष्ट होतं की, २०२० च्या प्रकरणाचा तिच्यावर आजही किती खोलवर परिणाम झाला आहे.

ड्रग्ज प्रकरणात रिया आणि शोविकला झाली होती अटक

सुशांत सिंग राजपूतच्या मृत्यूनंतर अनेक तपास यंत्रणांनी चौकशी सुरू केली होती, ज्यात रिया चक्रवर्ती हे नाव केंद्रस्थानी होतं. तिला आणि तिचा भाऊ शोविक चक्रवर्तीला नार्कोटिक्स कंट्रोल ब्युरो (NCB) ने या प्रकरणाशी संबंधित ड्रग्ज केसमध्ये अटक केली होती.

या काळात रियाला मीडिया आणि सोशल मीडियावर प्रचंड टीकेला सामोरं जावं लागलं आणि तिला तुरुंगातही काही काळ राहावं लागलं. या घटनांचा तिच्या मानसिक आरोग्यावर झालेल्या परिणामांबद्दल तिने यापूर्वीही अनेकदा सांगितलं आहे.

सुशांतच्या मृत्यूची चौकशी अनेक वर्षं सुरू होती, तर रिया तिच्यावरील आरोपांवर ठाम राहिली. अखेर सीबीआयच्या क्लोजर रिपोर्टनंतर तिला या प्रकरणातून मोठा दिलासा मिळाला.

रिया सध्या 'द ट्रेटर्स'च्या दुसऱ्या सीजनमध्ये दिसत आहे. हा एक रिॲलिटी शो आहे जो विश्वास, संशय, स्ट्रॅटेजी आणि फसवणुकीवर आधारित आहे. त्यामुळे २०२० च्या घटनांनंतर संशयाबद्दल तिने केलेली वक्तव्यं खूप महत्त्वाची ठरतात.