Hanuman Ansh : 'हनुमान अंश' पाहून 15 वेळा रडल्या नीम करोली बाबांच्या लेक

अवघ्या २ कोटींच्या बजेटमध्ये बनलेल्या 'हनुमान अंश' सिनेमाने कोणतंही प्रमोशन नसताना २०० कोटींची कमाई करत बॉक्स ऑफिसवर धुमाकूळ घातलाय. नीम करोली बाबांच्या जीवनावर आधारित हा सिनेमा त्यांची मुलगी गिरिजा यांनी १५ वेळा पाहिला आणि त्या भावुक झाल्या. मारधाड नसलेल्या या सिनेमाने प्रेक्षकांची मनं जिंकली आहेत.

मुंबई : आजकाल मारधाड, ॲक्शन आणि रोमान्स असलेल्या सिनेमांचाच बोलबाला असतो. शेकडो कोटींचं बजेट असल्याशिवाय सिनेमा चालत नाही, असा एक समज आहे. 'असा सिनेमा कोण बघणार?' असं म्हणत थिएटर्सनीही सुरुवातीला 'हनुमान अंश' सिनेमाला नकार दिला होता. पण या सिनेमाने चक्क २०० कोटींची कमाई करत सगळ्यांनाच धक्का दिलाय. २ कोटींपेक्षा कमी बजेट असलेल्या या सिनेमाला प्रेक्षकांनी अक्षरशः डोक्यावर घेतलंय. यावरून एक गोष्ट स्पष्ट होते की, प्रेक्षकांना आजही कुटुंबासोबत बसून पाहता येतील, मनाला शांती देतील आणि मारधाडीशिवाय एक चांगला संदेश देतील असे सिनेमे पाहायला आवडतात. कोणतंही प्रमोशन नसताना एखादा सिनेमा कसा हिट होऊ शकतो, याचं 'हनुमान अंश' हे उत्तम उदाहरण आहे.

नीम करोली बाबांच्या जीवनावर आधारित असलेला हा सिनेमा बाबांची मुलगी गिरिजा यांनी तब्बल १५ वेळा पाहिलाय. विशेष म्हणजे, प्रत्येक वेळी सिनेमा पाहताना त्या भावुक झाल्या आणि त्यांच्या डोळ्यांतून पाणी आलं, असा खुलासा सिनेमाच्या निर्माती रागिणी सोना यांनी केलाय. अम्मा जी (गिरिजा) यांची ही प्रतिक्रिया संपूर्ण टीमसाठी खूप खास असल्याचंही त्या म्हणाल्या.

दिग्दर्शक विशाल चतुर्वेदी आणि निर्माती रागिणी सोना हे दोघेही नीम करोली बाबांच्या जीवनावर आणि त्यांच्या आध्यात्मिक प्रवासावर बऱ्याच काळापासून काम करत होते. एका मुलाखतीत रागिणी यांनी सांगितलं की, सिनेमा रिलीज होण्यापूर्वी त्यांना बाबांची मुलगी गिरिजा जी यांचा आशीर्वाद घ्यायचा होता. खूप प्रयत्नांनंतर अखेर त्यांचं फोनवर बोलणं झालं. तेव्हा त्यांनी अम्मा जींना सिनेमा पाहण्याबद्दल विचारलं. त्यावर 'वेळ आल्यावर मी नक्कीच सिनेमा पाहीन,' असं उत्तर त्यांनी दिलं होतं. त्यानंतर त्यांनी सिनेमा पाहिला आणि तेव्हापासून त्या वारंवार हा सिनेमा पाहत आहेत.

१५ वेळा पाहिला सिनेमा

रागिणी सोना यांनी सांगितलं की, अम्मा जींनी 'हनुमान अंश' जवळपास १५ वेळा पाहिलाय. प्रत्येक वेळी सिनेमा पाहताना त्यांच्या डोळ्यांत पाणी येतं. सिनेमाची कथा थेट नीम करोली बाबांच्या जीवनाशी जोडलेली असल्यामुळे अम्मा जींची ही प्रतिक्रिया टीमसाठी खूप महत्त्वाची आहे. रागिणी यांच्या मते, ही केवळ एका प्रेक्षकाची प्रतिक्रिया नसून बाबांच्या कुटुंबाने दिलेला आशीर्वाद आणि स्वीकृती आहे. अम्मा जींच्या या भावुक प्रतिक्रियेचा संपूर्ण टीमवर खूप खोलवर परिणाम झालाय.

रागिणी यांनी अम्मा जींसोबत झालेल्या संवादाचा अनुभवही शेअर केला. गिरिजा जींनी जेव्हा सिनेमा बनवण्यामागची प्रेरणा विचारली, तेव्हा रागिणी यांनी त्यांच्या बालपणीची एक आठवण सांगितली. त्या अवघ्या सहा वर्षांच्या असताना त्यांनी नीम करोली बाबांची भेट घेतली होती. दिग्दर्शक विशाल चतुर्वेदी यांनीही बाबांवर केलेलं संशोधन आणि त्यांची कथा लोकांपर्यंत पोहोचवण्याची इच्छा व्यक्त केली. या संवादादरम्यान रागिणी यांनी आपले वडील नैनितालमध्ये पोस्टिंगला असल्याचा उल्लेख केला होता.

रागिणी यांनी सांगितलं की, हे ऐकल्यानंतर अम्मा जींनी चक्क त्यांच्या वडिलांचं नाव घेतलं आणि आग्रा येथील त्यांच्या ५० वर्षे जुन्या घराची अचूक माहिती दिली. एवढंच नाही, तर त्यांनी रागिणी यांच्या मोठ्या भावाचं नावही सांगितलं. हे सगळं ऐकून रागिणी थक्क झाल्या. 'तुम्हाला एवढी जुनी आणि वैयक्तिक माहिती कशी काय माहीत?' असं त्यांनी विचारलं. त्यावर अम्मा जी म्हणाल्या की, हे सगळं त्यांच्या डोळ्यांसमोर घडल्यासारखं त्यांना दिसलं. हा अनुभव सांगताना रागिणी खूप भावुक झाल्या होत्या.

रागिणी आणि गिरिजा यांची भेट

यानंतर रागिणी यांनी गिरिजा जींची प्रत्यक्ष भेट घेतली. सिनेमाचं काम सुरू करण्यापूर्वी नीम करोली बाबांची मुलगी हयात आहे, हे टीमला माहीतच नव्हतं. जेव्हा त्या अम्मा जींना भेटल्या, तेव्हा त्यांच्या वागण्यात आणि व्यक्तिमत्त्वात रागिणी यांना साक्षात बाबांचीच छबी दिसली. 'गिरिजा जींमध्ये मला बाबा दिसले आणि खुद्द बाबाच आमच्यात उपस्थित असल्यासारखं मला वाटलं,' असं रागिणी म्हणाल्या. अम्मा जी आजही बाबांची शिकवण आपल्या आयुष्यात आचरणात आणतात. विशेषतः, 'सर्वांवर प्रेम करा, सर्वांना खाऊ घाला' हा बाबांचा संदेश त्यांच्या आयुष्याचा एक महत्त्वाचा भाग बनला आहे.