Kangana Ranaut : 'इस्लामिस्टच्या संपर्कात येताच हिंदू मुली बदलतात', कंगनाच्या नव्या व्हिडिओने खळबळ

Kangana Ranaut Video : कंगना रणौतचा एक नवा व्हिडिओ समोर आला आहे, ज्यात तिने स्वतःला 'संघी' म्हणवून घेण्याची इच्छा व्यक्त केली आहे. सोबतच, इस्लामिस्ट लोकांच्या संपर्कात आल्यावर ज्या हिंदू मुलींची विचारसरणी बदलते, त्यांच्यावरही तिने प्रश्नचिन्ह उपस्थित केलं आहे.

मुंबई : बॉलिवूड अभिनेत्री आणि मंडीच्या भाजप खासदार कंगना रणौत पुन्हा एकदा तिच्या नव्या व्हिडिओमुळे चर्चेत आली आहे. इन्स्टाग्रामवर शेअर केलेल्या या व्हिडिओमध्ये तिने ओळख, धर्म आणि विचारसरणीवर आपलं मत मांडलं आहे. कंगनाने म्हटलं आहे की, तिला आता स्वतःला एक परिभाषित आणि जागृत हिंदू बनवायचं आहे. तिने 'संघी' होण्याची इच्छाही व्यक्त केली. प्रत्येक व्यक्तीला आपली विचारसरणी आणि श्रद्धा निवडण्याचं स्वातंत्र्य असेल, तर हिंदू महिलांनी असं केल्यावर प्रश्न का विचारले जातात, असा सवालही तिने केला आहे. तिचा हा व्हिडिओ सोशल मीडियावर चर्चेचा विषय बनला आहे.

कंगना रणौत तिच्या नव्या व्हिडिओमध्ये काय म्हणाली?

कंगना रणौत व्हिडिओमध्ये म्हणते, “मला पार्लमेंटला जायला उशीर होत असला तरी, मला वाटलं की तुमच्यासोबत माझ्या काही भावना शेअर कराव्यात. आपण फिल्म इंडस्ट्रीमध्ये अशा अनेक हिंदू बहिणी-मुली पाहिल्या आहेत, ज्यांच्या संपर्कात आपण असतो आणि त्यांना जवळून ओळखतो. त्या हिंदू असतात, पण राजकारण असो वा धर्म, त्यांची स्वतःची अशी कोणतीच विचारसरणी नसते. तरुणांमध्ये असं सर्रास होतं. त्या खूप न्यूट्रल असतात. पण जशा त्या संबंध, लग्न किंवा मैत्रीमुळे इस्लामिस्ट लोकांच्या संपर्कात येतात, तशी त्यांची विचारसरणी एकदम पक्की होते, त्या कट्टर लेफ्टिस्ट बनतात... मला याची काही अडचण नाही, कारण आपलं संविधान तुम्हाला हवा तो धर्म आणि विचारसरणी निवडण्याचं स्वातंत्र्य देतं.”

कंगनाने व्यक्त केली हिंदू मुलींबद्दल चिंता

कंगना पुढे म्हणाली, "पण खरी समस्या तेव्हा येते... जेव्हा हिंदू मुलींचा विषय येतो.... आज मी स्वतःचा बचाव करणार नाही की मी आयटम नंबर्सच्या विरोधात होते किंवा मोठ्या हिरोंसोबत काम केलं नाही. मी नेपोटिझमविरोधात लढा दिला... हो, मी एक मॉडरेट हिंदू होते. आज जर मी स्वतःला डिफेंड केलं, तर कितीतरी मुली ही झेप घेऊ शकणार नाहीत."

कंगना रणौत म्हणाली - मला संघी व्हायचंय

कंगनाच्या मते, "हो, मी एक मॉडरेट हिंदू होते. आज मला टोमणे मारले जातात की, तू कधीपासून संघी झालीस?.... मला संघी व्हायचं आहे. मी भाजप आणि आरएसएसच्या विचारसरणीने प्रेरित होऊन एक जागरूक, स्पष्ट आणि शिस्तबद्ध हिंदू बनू इच्छिते, तर यावर प्रश्न का उपस्थित केले जातात? जर इतर लोक त्यांच्या आवडीची विचारसरणी किंवा ओळख स्वीकारू शकतात, तर मी का नाही बदलू शकत? जेव्हा हिंदू मुलींचा विषय येतो, तेव्हा हे समाजाचे ठेकेदार आमची अग्निपरीक्षा घेण्यासाठी दहा वर्षांपूर्वीचे मुद्दे काढतात की, तू तर पार्टी करायचीस, तू तर हे करायचीस... ठीक आहे, मी सगळं करत होते, पण आता मलाही बदलायचं आहे. मला एक डिफाइंड आणि जागृत हिंदू बनायचं आहे. मग माझ्यासाठी तो रस्ता बंद का आहे?"

कंगना रणौतने पुढे म्हटलं, "हा दुटप्पीपणा आणि दुहेरी विचार चालणार नाहीत. मला वाटतं की आमच्या मुलींनाही ते स्वातंत्र्य मिळायला हवं. जर त्यांना एका शिस्तबद्ध आणि जागृत हिंदूमध्ये रूपांतरित व्हायचं असेल, तर त्या का होऊ शकत नाहीत?"