Kangana Ranaut : विद्यार्थ्यांना 'गटार जनरेशन' म्हटल्याने कंगना अडचणीत, कोर्टात खटला दाखल

Kangana Ranaut Faces Legal Action : भाजप खासदार कंगना रणौत यांनी NEET पेपरफुटीविरोधात आंदोलन करणाऱ्या विद्यार्थ्यांना 'गटार जनरेशन' म्हटल्याने तिच्यावर खटला दाखल झाला आहे. याप्रकरणी २१ ऑगस्ट रोजी सुनावणी होणार आहे.

नवी दिल्ली : भाजप खासदार आणि अभिनेत्री कंगना रणौतच्या अडचणीत वाढ झाली आहे. NEET पेपरफुटी प्रकरणी आंदोलन करणाऱ्या विद्यार्थ्यांना 'गटार जनरेशन' (Gutter Generation) असं संबोधल्याबद्दल तिच्याविरोधात आग्रा येथे खटला दाखल करण्यात आला आहे. राजीव गांधी बार असोसिएशनचे अध्यक्ष, वकील रामशंकर शर्मा यांनी बुधवारी ही माहिती दिली. या प्रकरणाची सुनावणी २१ ऑगस्ट रोजी होणार आहे.

'गटर जनरेशन' टिप्पणीवरून खटला दाखल

मंगळवारी ANI शी बोलताना शर्मा म्हणाले, "मी खासदार/आमदारांसाठी असलेल्या विशेष न्यायालयात भाजप खासदार आणि अभिनेत्री कंगना रणौत यांच्याविरोधात खटला दाखल केला आहे. जंतर-मंतरवर आंदोलन करणाऱ्या विद्यार्थ्यांना कंगना यांनी 'गटर जनरेशन' म्हटल्याबद्दल हा खटला आहे. अशा प्रकारची वक्तव्यं करण्याची त्यांना सवयच आहे. त्यांनी देशातील विद्यार्थ्यांचा अपमान केला आहे आणि त्यांच्या पालकांनाही शिवीगाळ केली आहे. हा विद्यार्थ्यांच्या भविष्याशी निगडित विषय आहे. न्यायालय या प्रकरणावर २१ ऑगस्ट रोजी सुनावणी करेल".

कंगना राणावतच्या वादग्रस्त इन्स्टाग्राम पोस्ट्स

NEET पेपरफुटीच्या विरोधात विद्यार्थ्यांनी केलेल्या आंदोलनादरम्यान कंगनाने काही आंदोलकांना 'गटार जनरेशन' म्हटलं होतं. त्यांच्या वागण्यावर आणि भाषेवर प्रश्नचिन्ह उपस्थित करत कंगनाने तिच्या इन्स्टाग्राम स्टोरीजवर अनेक पोस्ट शेअर केल्या होत्या. आंदोलनाचे व्हिडिओ 'ओकारी आणणारे' (Puke-Inducing) असल्याचंही तिने म्हटलं होतं.

भाजप खासदार असलेल्या कंगनाने आंदोलकांच्या शैलीवर आणि भाषेवर टीका केली. "मी माझ्या आयुष्यात एकाच ठिकाणी इतकी कुरूपता कधीच पाहिली नाही. Gen Z च्या आंदोलनाचे हे रील्स पाहून ओकारी येतेय. ज्या पद्धतीने ते बोलत आहेत आणि जी भाषा वापरत आहेत... इतकं असभ्य मी कधीच पाहिलं नाही," असं तिने लिहिलं. "यांना जन्म कोण देतं आणि वाढवतं कोण?" असा सवालही तिने केला. "या रील्समुळे मी घाबरले आहे. मला थोडं बरं वाटण्यासाठी डिजिटल डिटॉक्सची गरज आहे," असंही ती पुढे म्हणाली.

कंगनाने दुसऱ्या एका पोस्टमध्ये लिहिलं, "सर्वात धक्कादायक म्हणजे तरुण हिंदू महिलांचं वागणं, ज्या स्वतंत्र करिअर करणाऱ्या महिलांच्या आयुष्याची नक्कल करू इच्छितात, पण ते स्वातंत्र्य त्यांनी कमावलेलं नाही. खऱ्या अर्थाने स्वतंत्र महिला बंडखोर निवड करतात आणि धाडसी मतं मांडतात. त्या करिअरमध्ये वेगळे निर्णय घेतात आणि स्वतःच्या कृतींची जबाबदारी घेतात कारण त्या स्वतःच्या पायावर उभ्या असतात. त्या हे सगळं आपल्या पालकांच्या किंवा कुटुंबाच्या जीवावर करत नाहीत."

"मी यांना 'गटार जनरेशन' म्हणते. यातील काहींकडे व्यवस्थेला देण्यासारखं काहीच नाही. ते अभ्यासात चांगले नाहीत. ते इतके कुरूप आणि भ्रष्ट आहेत की ते गृहिणीसुद्धा होऊ शकत नाहीत," असं तिने लिहिलं.

विद्यार्थ्यांचे आंदोलन मागे

केंद्रीय शिक्षण मंत्री धर्मेंद्र प्रधान यांनी राजीनामा दिल्यानंतर २५ जुलै रोजी हे आंदोलन मागे घेण्यात आलं होतं. त्यानंतर, सरकारनं CJP आणि कार्यकर्ते सोनम वांगचुक यांच्यासोबत चर्चा करून खटले मागे घेणं, पोलिसांकडून होणारा त्रास थांबवणं आणि पेपरफुटीविरोधी कायदा आणण्याचं मान्य केलं होतं.