Hanuman Ansh Box Office : फक्त 2 कोटींचं बजेट, 'हनुमान अंश'ने 66 दिवसांत कमावले 446 कोटी

विशाल चतुर्वेदी दिग्दर्शित 'हनुमान अंश' सिनेमाने जगभरातील बॉक्स ऑफिसवर धुमाकूळ घातला आहे. अवघ्या २ कोटी रुपयांच्या बजेटमध्ये बनलेल्या या सिनेमाने ६६ दिवसांत तब्बल ४४६ कोटी रुपयांची कमाई केली आहे.

मुंबई : विशाल चतुर्वेदी यांनी लिहिलेला आणि दिग्दर्शित केलेला 'हनुमान अंश' हा सिनेमा जगभरातील बॉक्स ऑफिसवर तुफान कमाई करत आहे. फक्त २ कोटी रुपयांच्या बजेटमध्ये तयार झालेल्या या सिनेमाने आतापर्यंत तब्बल ४४६ कोटी रुपयांचा गल्ला जमवला आहे. रिलीज झाल्यानंतर अवघ्या ६६ दिवसांत सिनेमाने हा मोठा टप्पा गाठला. हा सिनेमा हनुमान भक्त आणि हिंदू गुरू नीम करोली बाबा यांच्या जीवनावर आधारित आहे.

हा एक डिव्होशनल ड्रामा सिनेमा असून तो ७ ऑगस्टला रिलीज झाला होता. प्रेक्षक आणि समीक्षकांकडून सिनेमाला खूप चांगला प्रतिसाद मिळाला आणि तो बॉक्स ऑफिसवर 'स्लीपर हिट' ठरला. ७ ऑगस्टला रिलीजच्या दिवशी सिनेमाने १० लाखांची ओपनिंग घेतली होती, पण 'माउथ पब्लिसिटी'मुळे सिनेमाची कमाई वाढत गेली. प्रसिद्ध ट्रॅकर सॅकनिल्कच्या (Sacnilk) आकडेवारीनुसार, सिनेमाने पहिल्या दिवशी १.०८ कोटी रुपयांची कमाई केली होती. एका महिन्यानंतर भारतातील नेट कलेक्शन ६१ कोटींवर पोहोचले. डॉ. विशाल चतुर्वेदी यांनी नीम करोली बाबा यांच्यावर लिहिलेल्या 'डिव्हाईन डिटूर: दॅट चेंज्ड माय लाईफ' (Divine Detour: That Changed My Life) या पुस्तकावर हा सिनेमा आधारित आहे. शोभिनव सत्या याने सिनेमात नीम करोली बाबा यांची भूमिका साकारली आहे.

सिनेमात चंदन के आनंद, अनिल रस्तोगी, निखिल दुबे, भगवान दास पटेल, नेहा परांजपे, उदयसिंग राजपूत, पौर्णिमा तिवारी, गौतम त्रिपाठी, गुलशन पांडे, राजीव मिश्रा, ऋषिकेश दुबे, विहान शेडगे, सात्विक शर्मा, अलेक्सी डानिरोव्ह, संतोष दीक्षित, ब्रिजपाल सिंग, यश पांडे, अमन मेहता, रजनीश श्रीवास्तव आणि अभिषेक मिश्रा या कलाकारांनी महत्त्वाच्या भूमिका साकारल्या आहेत. स्वयंभू मीडिया नेटवर्क आणि होली काऊ होम प्रॉडक्शन यांनी या सिनेमाची निर्मिती केली आहे. विशाल बावा यांनी सिनेमाची सिनेमॅटोग्राफी केली असून शंख राज्याध्यक्ष यांनी एडिटिंगची जबाबदारी सांभाळली आहे.