Shakeel Noorani Arrest : 'जोरू का गुलाम'च्या दिग्दर्शकाला अटक, अभिनेत्रीवर अत्याचार केल्याचा आरोप

Filmmaker Shakeel Noorani Arrested : बॉलिवूडचे प्रसिद्ध चित्रपट दिग्दर्शक शकील नूरानी यांना मुंबई पोलिसांनी अटक केली आहे. 'जोरू का गुलाम' आणि 'बडे दिलवाला' सारखे चित्रपट त्यांनी दिग्दर्शित केले आहेत. एका ३३ वर्षीय अभिनेत्रीने त्यांच्यावर बलात्कार आणि लैंगिक शोषणाचे गंभीर आरोप केले आहेत.

मुंबई : शकील नूरानी हे बॉलिवूडमधले एक जुने-जाणते चित्रपट दिग्दर्शक आहेत. त्यांनी 'बडे दिलवाला' (1999), 'जोरू का गुलाम' (2000) आणि 'ऍसिड ऑफ लव्ह' (2005) सारखे अनेक हिंदी चित्रपट दिग्दर्शित केले आहेत.

त्यांचा 2000 साली आलेला 'जोरू का गुलाम' हा कॉमेडी चित्रपट खूप गाजला होता. यात गोविंदा आणि ट्विंकल खन्ना मुख्य भूमिकेत होते. त्यांच्या करिअरमधील हा एक महत्त्वाचा चित्रपट मानला जातो.

आता ७३ वर्षांचे नूरानी एका गंभीर प्रकरणामुळे चर्चेत आले आहेत. मुंबईतील एका ३३ वर्षीय अभिनेत्रीने त्यांच्यावर गंभीर आरोप केले आहेत. यानंतर मालवणी पोलिसांनी ८ ऑगस्टच्या पहाटे त्यांना अटक केली.

शकील नूरानी यांच्यावर नेमके आरोप काय आहेत?

पोलिसांनी दिलेल्या माहितीनुसार आणि अभिनेत्रीने दाखल केलेल्या एफआयआरनुसार, ती नूरानी यांना २०१६ मध्ये लोखंडवाला येथील एका पुरस्कार सोहळ्यात पहिल्यांदा भेटली. तिने आरोप केला आहे की, नूरानी यांनी तिच्याशी एका आगामी प्रोजेक्टबद्दल चर्चा केली आणि कामासंदर्भात संपर्क साधायला सांगितलं.

यानंतर, अभिनेत्री स्क्रिप्ट वाचण्यासाठी आणि चर्चा करण्यासाठी मालवणी येथील नूरानी यांच्या घरी गेली होती. तिच्या तक्रारीनुसार, नूरानी यांनी तिला एक पेय दिले, जे प्यायल्यानंतर ती बेशुद्ध झाली.

शुद्धीवर आल्यानंतर नूरानी यांनी तिला तिच्या फोनमधील एक व्हिडिओ दाखवला आणि जर तिने पोलिसांशी संपर्क साधला किंवा कुटुंबीयांना माहिती दिली, तर हा व्हिडिओ व्हायरल करण्याची धमकी दिली, असा दावा तिने केला आहे.

अभिनेत्रीने पुढे असाही आरोप केला आहे की, नूरानी यांनी हा व्हिडिओ वापरून तिला धमकावले आणि अनेक वेळा तिच्यावर लैंगिक अत्याचार केले. यानंतर ते तिला गर्भनिरोधक गोळ्या देत असत, असा दावाही तिने केला आहे.

पोलिस आणि कोर्टाने काय म्हटलं आहे?

पोलिसांच्या माहितीनुसार, नूरानी यांच्यावर भारतीय न्याय संहिता (BNS) अंतर्गत कलम ६४(२)(एम), १२३, ३५१(२) आणि ८८ अंतर्गत गुन्हा दाखल करण्यात आला आहे.

अटकेनंतर नूरानी यांना बोरिवली हॉलिडे कोर्टात हजर करण्यात आले. पोलिसांनी तपासाचा भाग म्हणून त्यांच्या कोठडीची मागणी केली. यामध्ये कथित व्हिडिओ जप्त करणे आणि अशाच प्रकारच्या इतर घटना घडल्या आहेत का, याचा तपास करणे समाविष्ट आहे.

कोर्टाने नूरानी यांना १२ ऑगस्टपर्यंत पोलीस कोठडी सुनावली आहे.

नूरानी यांचे वकील, ॲडव्होकेट विकास सिंग गोर यांनी हे सर्व आरोप फेटाळून लावले आहेत आणि नूरानी यांना खोट्या प्रकरणात अडकवण्यात आल्याचं म्हटलं आहे. जोपर्यंत आरोप सिद्ध होत नाहीत, तोपर्यंत नूरानी निर्दोष आहेत, असं बचाव पक्षाने म्हटलं आहे. या प्रकरणाचा तपास सध्या सुरू आहे.