Surrogate Ad : शाहरुख खान, अजय देवगण आणि टायगर श्रॉफला FDA ची नोटीस; जाहिरातीमुळे अडकले

FDA Notice Bollywood Stars Pan Masala Ad : एका इलायची ब्रँडच्या जाहिरातीवरून शाहरुख खान, अजय देवगण आणि टायगर श्रॉफ यांना महाराष्ट्राच्या अन्न व औषध प्रशासनाने (FDA) नोटीस बजावली आहे. ही जाहिरात म्हणजे पान मसाल्याचा छुपा प्रचार असल्याचा आरोप FDA ने केला असून, या प्रकरणी तिन्ही अभिनेत्यांकडून स्पष्टीकरण मागवण्यात आलं आहे.

मुंबई : महाराष्ट्राच्या अन्न व औषध प्रशासनाने (FDA) बॉलिवूडचे तीन मोठे कलाकार - शाहरुख खान, अजय देवगण आणि टायगर श्रॉफ यांना नोटीस पाठवली आहे. एका प्रसिद्ध इलायची ब्रँडच्या जाहिरातीमुळे हे प्रकरण समोर आलं आहे. ही जाहिरात अन्न सुरक्षा आणि मानक कायदा, २००६ च्या नियमांचं उल्लंघन करत असल्याचा FDA ला संशय आहे.

शुक्रवार, १४ ऑगस्ट रोजी या नोटिसा पाठवण्यात आल्या. या जाहिरातीमध्ये तुमची नेमकी भूमिका काय आणि त्या ब्रँडशी तुमचा संबंध काय, यावर या तिन्ही अभिनेत्यांना स्पष्टीकरण देण्यास सांगण्यात आलं आहे.

FDA चा आरोप काय?

FDA च्या मते, ही जाहिरात अप्रत्यक्षपणे एका पान मसाला ब्रँडचा प्रचार करत आहे. हा इलायची ब्रँड ज्या नावाने ओळखला जातो, त्याच नावाने एक पान मसालाही विकला जातो. त्यामुळे ही जाहिरात म्हणजे पान मसाल्याचा छुपा प्रचार (Surrogate Promotion) असल्याचा आरोप आहे.

ही नोटीस अजय देवगणला जुहूमधील त्याच्या घरी, शाहरुख खानला वांद्रे येथील 'मन्नत' बंगल्यावर, तर टायगर श्रॉफला त्याच्या 'टायगर श्रॉफ प्रॉडक्शन्स एलएलपी' या कंपनीच्या पत्त्यावर पाठवण्यात आली आहे.

सध्या महाराष्ट्र FDA ने गुटखा आणि तंबाखू किंवा निकोटीनयुक्त पान मसाल्याविरोधात कारवाईचा सपाटा लावला आहे. याच कारवाईचा भाग म्हणून ही नोटीस पाठवण्यात आली आहे.

FDA ने महाराष्ट्र सरकारच्या एका आदेशाचाही हवाला दिला आहे. १३ जुलै, २०२६ रोजी जारी केलेल्या या आदेशानुसार, राज्यात अशा उत्पादनांचं उत्पादन, साठवणूक, वाहतूक, वितरण आणि विक्रीवर एका वर्षासाठी बंदी घालण्यात आली आहे.

मोठी कारवाई आणि जुना वाद

ही कारवाई म्हणजे FDA च्या राज्यभरातील मोठ्या मोहिमेचा एक भाग आहे. भेसळयुक्त दूध, रेस्टॉरंटमधील अन्न, शाळांच्या आसपास विकले जाणारे जंक फूड आणि बंदी असलेल्या गुटखा-पान मसाल्याच्या विक्रीवर FDA सध्या कडक नजर ठेवून आहे.

२०२२ मध्ये याच इलायची ब्रँडच्या जाहिरातीवरून अभिनेता अक्षय कुमारवर प्रचंड टीका झाली होती. त्यावेळी शाहरुख खान आणि अजय देवगण यांच्यासोबत तो या जाहिरातीत दिसला होता. या वादानंतर अक्षय कुमारने सोशल मीडियावर एक पत्र शेअर करून माफी मागितली होती.

त्याने लिहिलं होतं, "मी माझे सर्व चाहते आणि हितचिंतकांची माफी मागू इच्छितो. गेल्या काही दिवसांतील तुमच्या प्रतिक्रियांनी माझ्यावर खोलवर परिणाम केला आहे."

अक्षय पुढे म्हणाला, "मी नम्रपणे यातून माघार घेत आहे. या जाहिरातीतून मिळालेली संपूर्ण रक्कम मी एका चांगल्या कामासाठी दान करण्याचा निर्णय घेतला आहे. कायदेशीर करारामुळे कदाचित ही जाहिरात काही काळ प्रसारित होत राहील, पण भविष्यात मी अत्यंत काळजीपूर्वक निवड करेन, असं वचन देतो. त्याबदल्यात मी तुमचं प्रेम आणि शुभेच्छा नेहमीच मागत राहीन."