पत्नीचा मृतदेह सोफ्यात, पती दोन दिवस त्यावरच झोपला

पती कॅब ड्रायव्हर म्हणून काम करत होता. अचानक बेपत्ता झालेल्या पत्नीचा शोध घेऊन तो घरी आला आणि सोफ्यावरच दोन दिवस झोपला. मात्र, त्याच सोफ्यामध्ये पत्नीचा मृतदेह सापडला.

पुणे: महाराष्ट्रातील पुणे शहरातील पुरंदर तालुक्यात एका कॅब ड्रायव्हरच्या पत्नीचा मृतदेह त्याच्या घरातील सोफ्यात सापडला असून, आश्चर्याची गोष्ट म्हणजे दोन दिवस पती त्याच सोफ्यावर झोपला होता. मात्र, सोफ्यामध्ये पत्नीचा मृतदेह आहे हे त्याला माहीत नव्हते. २४ वर्षीय स्वप्नाली उमेश हिचा मृतदेह घरातील सोफा कम बेडमध्ये सापडला. याच सोफ्यावर तिचा पती दोन दिवस झोपला होता.

कॅब ड्रायव्हर उमेश यांनी ७ नोव्हेंबर रोजी पत्नीला फोन केला असता संपर्क होऊ शकला नाही. कॅबमध्ये प्रवासी असल्याने वारंवार फोन न करता तो वाहन चालवत होता. सकाळी पुन्हा स्वप्नालीला फोन केला असता फोन स्विच ऑफ आला. पत्नीशी संपर्क होत नसल्याने त्याने एका मित्राला फोन करून घरी जाऊन येण्यास सांगितले. घरीही स्वप्नालीचा काहीच पत्ता नव्हता. 

पुण्यात आल्यानंतर उमेशने पत्नीचा शोध सुरू केला. मित्र, नातेवाईक अशा सर्वांना उमेशने माहिती दिली तरी स्वप्नालीचा काहीच पत्ता लागला नाही. दोन दिवस झाले तरी पत्नीचा पत्ता लागत नसल्याने घरात काहीतरी सुगावा लागेल म्हणून त्याने बारकाईने तपासणी करण्यास सुरुवात केली. 

शनिवारी सकाळी पत्नीचे मौल्यवान दागिने गायब असल्याचे उमेशच्या लक्षात आले. त्यानंतर सोफ्याखालील स्टोरेज कम्पार्टमेंट उघडले असता पत्नीचा मृतदेह सापडला. याच सोफ्यावर उमेश झोपला होता. तरीही खाली पत्नीचा मृतदेह आहे याची जराही शंका उमेशला आली नव्हती. त्यानंतर त्याने तात्काळ स्थानिक पोलिसांना माहिती दिली. 

स्वप्नालीची गळा चिरून हत्या करण्यात आली आहे. मानेवर नखांचे ओरखडे आढळून आले आहेत. ओळखीच्या व्यक्तीनेच येऊन खून केल्याचा संशय आहे. घरात जबरदस्तीने प्रवेश केल्याचे कोणतेही चिन्ह आढळले नाही. याप्रकरणी गुन्हा दाखल करण्यात आला असून, सर्व बाजूंनी तपास सुरू आहे. लवकरच आरोपीला अटक करण्यात येईल, असे पोलिसांनी सांगितले.

स्वप्नालीच्या पतीच्या म्हणण्यानुसार, त्यांच्या घरी येणाऱ्या एका व्यक्तीवर त्यांनी संशय व्यक्त केला आहे. तो व्यक्ती वारंवार घरी येत असे. काही वेळा घरातच राहत असे, असे त्यांनी सांगितले. उमेशच्या म्हणण्यानुसार त्या व्यक्तीच्या घरी गेले असता तेथेही तो सापडला नाही. श्वानपथक आणि फिंगरप्रिंटच्या मदतीने आरोपीचा शोध घेतला जात आहे. तसेच घराच्या परिसरातील आणि आसपासच्या सीसीटीव्ही कॅमेऱ्यांचे फुटेज जप्त करून तपासणी करण्यात येत आहे.