पतीने पत्नीला HIV इंजेक्शन दिले?

सहारनपूर न्यायालयाने उत्तर प्रदेश पोलिसांना ३० वर्षीय महिलेच्या सासरच्यांविरुद्ध गुन्हा दाखल करण्याचे निर्देश दिले आहेत. महिलेचा आरोप आहे की तिच्या पालकांनी अतिरिक्त हुंड्याची मागणी पूर्ण न केल्याने तिला एचआयव्ही संक्रमित इंजेक्शन देण्यात आले. न्यायालयाच्या आदेशानंतर पोलिसांनी आरोपी कुटुंबातील सदस्यांविरुद्ध गुन्हा दाखल केला आहे.

सहारनपूरचे एसपी (ग्रामीण) सागर जैन यांनी या घटनेची पुष्टी करताना म्हटले आहे की, "पीड़ित महिला ही सहारनपूरची रहिवासी आहे. आम्ही तिचा पती (३२), मेहुणा (३८), नणंद (३५) आणि सासू (५६) यांच्याविरुद्ध आयपीसी कलम ३०७ (खुनाचा प्रयत्न), ४९८अ (पती किंवा त्याच्या नातेवाईकांकडून महिलेवर अत्याचार), ३२३ (स्वेच्छेने दुखापत), ३२८ (विषप्रयोग करून हानी पोहोचवणे), ४०६ (विश्वासघात) आणि संबंधित हुंडा कलमांखाली गंगोह पोलीस ठाण्यात गुन्हा दाखल केला आहे. आम्ही या प्रकरणाचा बारकाईने तपास करत आहोत."

हुंड्याची मागणी आणि कथित अत्याचार

पोलिसांच्या म्हणण्यानुसार, महिलेच्या वडिलांनी न्यायालयाला कळवले की तिचे लग्न फेब्रुवारी २०२३ मध्ये झाले होते आणि कुटुंबाने लग्नावर जवळपास ४५ लाख रुपये खर्च केले होते. "आम्ही वराच्या कुटुंबाला एक सब-कॉम्पॅक्ट एसयूव्ही आणि १५ लाख रुपये रोख दिले, परंतु नंतर त्यांनी आणखी १० लाख रुपये आणि मोठी एसयूव्हीची मागणी केली," असे त्यांनी सांगितले.

त्यांनी पुढे आरोप केला की त्यांच्या मुलीला लग्नाच्या पहिल्या दिवसापासूनच त्रास दिला जात होता. "त्यांनी (पीड़ितेच्या सासरच्यांनी) लग्नानंतर लगेचच तिला त्रास देण्यास सुरुवात केली. त्यांनी माझ्या मुलीला अपमानित केले आणि त्यांच्या मुलाला दुसरी बायको आणू असेही सांगितले. २५ मार्च २०२३ रोजी तिला तिच्या सासरच्या घरातून हाकलून देण्यात आले आणि पुढील तीन महिने ती आमच्यासोबत राहिली, जोपर्यंत ग्रामपंचायतीने मध्यस्थी केली नाही. त्यानंतर तिला तिच्या पतीच्या घरी परत पाठवण्यात आले आणि लवकरच तिला पुन्हा शारीरिक आणि मानसिक छळाला सामोरे जावे लागले," असे त्यांनी पोलिस तक्रारीत म्हटले आहे.

एचआयव्ही संसर्ग झाल्याचा भयानक आरोप

मे २०२४ मध्ये, सासरच्यांनी कथितपणे महिलेला एचआयव्ही संक्रमित इंजेक्शन दिले, ज्यामुळे तिची प्रकृती झपाट्याने खालावली. त्यानंतरच्या वैद्यकीय चाचण्यांमध्ये तिला एचआयव्ही पॉझिटिव्ह असल्याचे निष्पन्न झाले, तर तिचा पती निगेटिव्ह आला, असा दावा वडिलांनी केला.

महिलेच्या वडिलांनी असाही आरोप केला की जेव्हा त्यांनी सुरुवातीला गंगोह पोलीस ठाण्यात तक्रार दाखल करण्यासाठी संपर्क साधला तेव्हा स्टेशन हाऊस ऑफिसर (एसएचओ) रोजंट त्यागी यांनी त्यांना "प्रथम वरिष्ठ अधिकाऱ्यांकडून आदेश घेण्यास" सांगितले. सहारनपूरचे एसएसपी रोहित सिंग सजवान यांच्याकडे गेल्यानंतरही कोणतीही कारवाई झाली नाही, असे त्यांनी सांगितले.

कोणताही पर्याय नसल्याने, कुटुंबाने न्यायालयात धाव घेतली, ज्याने आता पोलिसांना कारवाई करण्याचे निर्देश दिले आहेत. एसएचओ त्यागी यांनी त्यांच्यावर लावण्यात आलेले आरोप फेटाळून लावले आहेत. सध्या या प्रकरणाचा तपास सुरू आहे.