मध्यप्रदेशात कारमध्ये ४० कोटींचे सोने, ११ कोटींची रोख जप्त

भोपाळ: मध्यप्रदेशातील मंडोरा जिल्ह्यातील मिंदोरी जंगलातील निर्जन भागात उभ्या असलेल्या इनोव्हा कारमध्ये तब्बल ४० कोटी रुपये किमतीचे ५२ किलो सोने आणि ११ कोटी रुपये रोख रक्कम आढळून आली असून, ही रक्कम आयकर विभागाच्या अधिकाऱ्यांनी आणि पोलिसांनी जप्त केली आहे. 

वारसदार नसलेल्या कारमध्ये सात-आठ बॅगा असल्याची खात्रीशीर माहिती मिळाल्यानंतर अधिकारी कारवाईसाठी पुढे सरसावले आणि ही रक्कम जप्त केली. हे सोने आणि रोख रक्कम कोणाची आहे हे अद्याप स्पष्ट झालेले नाही, असे अधिकाऱ्यांनी सांगितले.

मात्र, हे धन माजी आरटीओ अधिकारी आणि रिअल इस्टेट व्यावसायिक सौरभ शर्मा यांचे असल्याचे काही सूत्रांनी म्हटले आहे. कारण ज्या इनोव्हा कारमध्ये हे धन सापडले आहे ती कार चंदन सिंग गौड नावाच्या बिल्डरच्या नावावर नोंदणीकृत आहे असे समजले आहे.

गुरुवारीच सौरभ शर्मा आणि त्यांचे सहकारी चंदन सिंग गौड यांच्यावर बेकायदेशीर मालमत्ता जमा केल्याच्या आरोपाखाली लोकायुक्ताने छापे टाकले होते. शर्मा यांच्या घरातून २.५ कोटी रुपये रोख, सोने-चांदीचे दागिने आणि मालमत्तेचे कागदपत्रे सापडली होती. या मालमत्तेची किंमत ३ कोटींहून अधिक होती. आता कारमध्ये सापडलेले सोने आणि रोख रक्कमही त्यांचीच असल्याचे म्हटले जात आहे. अधिकाऱ्यांच्या हाती लागू नये म्हणून त्यांनी हे धन असे लपवून ठेवले असावे असा अंदाज आहे.