दूध खराब होऊ नये म्हणून काय करावं?

उन्हाळ्यात दूध सुरक्षित ठेवणं एक मोठं आव्हान असतं. अनेकदा दूध पूर्णपणे खराब होतं आणि फेकून द्यावं लागतं. दूध खराब होण्यापासून वाचवण्यासाठी इथे काही सोपे घरगुती उपाय दिले आहेत.

दूध थोडं जुनं झालंय किंवा बाहेर खूप जास्त उष्णता आहे असं वाटल्यास, दूध उकळण्यापूर्वी त्यात एक चिमूटभर खाण्याचा सोडा (Baking Soda) टाका.

उष्णतेमुळे दुधात 'लॅक्टिक ॲसिड' वाढतं आणि दूध फाटतं. खाण्याचा सोडा दुधाची pH पातळी संतुलित ठेवतो आणि दूध फाटण्यापासून वाचवतो.

दुधाची पिशवी किंवा डेअरीतून दूध घरी आणल्याबरोबर लगेच उकळवा. कच्चं दूध उन्हाळ्यात लवकर खराब होतं.

गरम दूध थेट फ्रिजमध्ये ठेवू नका. यामुळे फ्रिजचं तापमान वाढतं आणि दुधासोबत इतर पदार्थही खराब होऊ शकतात.

दूध उकळण्याचं भांडं पूर्णपणे स्वच्छ असू द्या. भांड्यात आधीच्या उकळलेल्या दुधाचा अंश किंवा थोडासा आंबटपणा जरी असेल, तरी दूध फाटतं.

भांड्यात दूध टाकण्यापूर्वी भांड्याच्या तळाला थोडं पाणी टाका. यामुळे दूध तळाला लागत नाही आणि करपलेला वास येत नाही.