गणपतीच्या आवडीचे उकडीचे मोदक घरच्या घरी कसे बनवावे?

तांदळाचे पीठ – १ कप, गुळ – १ कप, खोबरे (ओले) – १ कप, तूप – २ चमचे, वेलची पूड – १ चमचा, पाणी – १ कप, चिमूटभर मीठ

कढईत गुळ आणि खोबरे घालून मंद आचेवर परता. गुळ पूर्णपणे वितळला की वेलची पूड घाला. सारण कोरडेसर होईपर्यंत परता आणि गार होऊ द्या.

पाणी, मीठ आणि थोडं तूप उकळायला ठेवा. उकळत्या पाण्यात तांदळाचे पीठ घालून झाकण ठेवून २ मिनिटे शिजू द्या. थोडं गार झाल्यावर हाताने किंवा चमच्याने मळून मऊ उकड तयार करा.

उकडीचा गोळा घेऊन हाताने किंवा मोदकाच्या साच्याने पातळ कड्या काढा. त्यात तयार केलेलं सारण भरा. वरती नीट बंद करून मोदकाचा आकार द्या.

मोदकांना वाफवायच्या पात्रात ठेवा. १०-१२ मिनिटे वाफवल्यावर उकडीचे मोदक तयार होतील. गरमागरम मोदकांवर तूप टाकून गणपती बाप्पांना नैवेद्य द्या आणि स्वतःही आनंद घ्या.

उकडीचे मोदक तयार करणे हे एक कौशल्याचे काम आहे. अनेकदा हे मोदक शिजवताना फुटतात. त्यामुळे जास्त सारण भरु नका. उकडताना जास्तही उकडू नका. त्यामुळे तुमचे मोदक खुसखुशीत होतील.