पुतिन यांचे सहकारी, मिसाईल निर्माते मिखाईल शात्स्की यांचा मृत्यू

पुतिन यांचे सहकारी आणि प्रमुख रशियन मिसाईल निर्माते मिखाईल शात्स्की यांचा मृतदेह आढळला.

मॉस्को: पुतिन यांचे निकटवर्तीय सहकारी आणि प्रमुख रशियन मिसाईल निर्माते मिखाईल शात्स्की यांचा मृत्यू झाल्याचे वृत्त आहे. युक्रेन युद्धात रशियाने वापरलेल्या मिसाईल विकसित करणाऱ्या मार्स डिझाईन ब्युरो कंपनीचे डेप्युटी जनरल डिझायनर आणि सॉफ्टवेअर विभागाचे प्रमुख म्हणून ते काम करत होते. कीव्ह इंडिपेंडंटने हे वृत्त दिले आहे. अॅस्ट्रा टेलिग्राम चॅनेल आणि इतर रशियन, युक्रेनियन स्त्रोतांच्या हवाल्याने हे वृत्त प्रसिद्ध झाले आहे.

मॉस्को क्षेत्रातील क्रेमलिनपासून आठ मैल आग्नेयेला असलेल्या कोटालनिकी येथील कुझ्मिन्स्की फॉरेस्ट पार्कमध्ये त्यांना गोळ्या घालून ठार मारण्यात आल्याचे वृत्त आहे. गोळीबार करणारा कोण होता हे अद्याप अज्ञात आहे. रशियन अंतराळ आणि लष्करी क्षेत्रासाठी ऑनबोर्ड मार्गदर्शन प्रणाली तयार करणारी कंपनी म्हणजे मार्स डिझाईन. २०१७ पासून शात्स्की या कंपनीचा भाग होते. सहयोगी प्राध्यापक असलेले ते रशियन केएच-५९ क्रूझ मिसाईलचे एच-६९ मध्ये रूपांतर करण्यातही सक्रिय होते.

यापूर्वीही रशियाविरोधी माध्यमांनी शात्स्की यांच्या मृत्युचे वृत्त दिले होते. पत्रकार अलेक्झांडर नेव्झोरोव्ह यांनी त्यांच्या टेलिग्राम चॅनेलवर शात्स्की यांच्या मृत्युची बातमी देताना एका धोकादायक गुन्हेगाराचा खात्मा झाल्याचे म्हटले होते. नेव्झोरोव्ह यांनी शात्स्कींसारख्या दिसणाऱ्या एका व्यक्तीचा बर्फात मृतदेह पडलेला असल्याचे फोटोही शेअर केले होते.

मात्र, याबाबत कोणतीही स्पष्टता माध्यमांना मिळू शकली नाही. नवीन वृत्तानुसार, मॉस्को ओब्लास्टमधील कोटालनिकीजवळील कुझ्मिन्स्की फॉरेस्ट पार्कमध्ये त्यांचा खून झाला. याबाबत रशियाकडून कोणतीही प्रतिक्रिया आलेली नाही. रशियन सैन्याला पाठिंबा देणाऱ्यांना कोणत्या ना कोणत्या प्रकारे लक्ष्य केले जात आहे, असे युक्रेनच्या संरक्षण दलाने म्हटल्याचे वृत्त आहे.