Nepal Floods : तिबेटमध्ये सरोवर फुटलं, नेपाळमध्ये पुन्हा महापुराचा धोका; हाय अलर्ट जारी

नेपाळमध्ये आधीच पुरामुळे मोठं नुकसान झालं आहे. त्यातच आता तिबेटमधील एक सरोवर फुटल्याने नवीन संकट उभं राहिलं आहे. प्रशासनाने त्रिशूली भागातील लोकांना सुरक्षित ठिकाणी हलवण्यास सुरुवात केली असून, नदीच्या पाणीपातळीत वाढ होण्याच्या शक्यतेमुळे पोलिसांनी हाय अलर्ट जारी केला आहे.

काठमांडू : नेपाळ सध्या महापुराच्या विध्वंसातून सावरण्याचा प्रयत्न करत असतानाच, एका नव्या संकटाने चिंता वाढवली आहे. तिबेटमधील छोचेन खोला आणि पुरेपु त्सांगपो नद्यांच्या संगमाजवळ तयार झालेलं एक मोठं सरोवर शुक्रवारी फुटल्याची माहिती समोर आली आहे. त्यामुळे नेपाळमध्ये पुन्हा एकदा महापुराचा धोका निर्माण झाला आहे.

काठमांडू पोस्टच्या वृत्तानुसार, रसुवा जिल्ह्याचे मुख्य जिल्हा अधिकारी नरेंद्र परियार यांनी सांगितलं की, नेपाळी लष्कराने त्यांना हे सरोवर फुटल्याची माहिती दिली आहे.

नव्या पुराच्या इशाऱ्यामुळे लोकांना हलवण्यास सुरुवात

चीनच्या सिचुआन प्रांतातील लोंगचांग शहरात भूकंप झाल्यानंतर, तिबेटमधून मोठ्या प्रमाणात पाण्याचा प्रवाह येत आहे. त्यामुळे त्रिशूली नदीच्या पाणीपातळीत वाढ होण्याचा धोका निर्माण झाला आहे. नेपाळ पोलिसांनी दिलेल्या माहितीनुसार, लोकांना पुन्हा एकदा सुरक्षित ठिकाणी हलवण्यात येत आहे.

नेपाळ पोलिसांनी 'X' वर पोस्ट करून म्हटलं आहे की, "तिबेटमधील धरण पुन्हा फुटल्याची माहिती मिळाली आहे. त्यामुळे बचावकार्यात गुंतलेले सर्व सुरक्षा कर्मचारी, मदत कार्यकर्ते आणि सामान्य नागरिकांनी तात्काळ सतर्क राहावं आणि सुरक्षित ठिकाणी जावं किंवा इतरांना कळवावं."

चीनने दिला होता सरोवर फुटण्याचा इशारा

चीन सरकारने आधीच इशारा दिला होता की, नद्यांच्या संगमाजवळ पुरामुळे तयार झालेलं हे सरोवर पूर्ण भरलं असून, त्यात आणखी पाणी आल्यास ते कोणत्याही क्षणी फुटण्याचा मोठा धोका आहे.

काठमांडू पोस्टच्या वृत्तानुसार, त्रिभुवन आंतरराष्ट्रीय विमानतळावरील बचाव समन्वय केंद्रातील एका अधिकाऱ्याने सांगितलं की, परिस्थितीचा आढावा घेण्यासाठी धुंचे आणि रसुवाच्या इतर भागांमध्ये आधीपासूनच तैनात असलेली हेलिकॉप्टर्स पाठवली जातील.

या अधिकाऱ्याने सांगितलं, "चीनच्या बाजूचं सरोवर फुटल्याची माहिती मिळाली आहे. त्यामुळे धुंचे आणि रसुवामध्ये असलेल्या हेलिकॉप्टर्सना पाहणीसाठी पाठवण्याची तयारी सुरू आहे."

चीनच्या जलसंपदा मंत्रालयाने गुरुवारी सकाळी या सरोवरात सुमारे २० लाख घनमीटर पाणी असल्याचा अंदाज वर्तवला होता. ग्लोबल टाइम्सच्या वृत्तानुसार, पुढील तीन दिवसांत आणखी ३० लाख घनमीटर पाणी सरोवरात येण्याची शक्यता होती.

छोचेन खोला आणि पुरेपु त्सांगपो या नद्या तिबेटमध्ये उगम पावतात आणि एकत्र मिळून नेपाळमध्ये प्रवेश करतात, जिथे या नदीला भोटेकोशी म्हणून ओळखलं जातं.

त्रिशूली भागातील सर्व कामं थांबवली

नेपाळ पोलिसांनी आता त्रिशूली भागातील लोकांना बाहेर काढायला सुरुवात केली आहे. एका पोलीस अधिकाऱ्याने ANI ला सांगितलं की, या भागात रस्त्यांच्या दुरुस्तीसह सर्व प्रकारची कामं थांबवण्यात आली आहेत.

नेपाळ पोलीस अधिकारी पी. चौधरी म्हणाले, "पाण्याची पातळी वाढणार आहे, त्यामुळे सर्वांना थांबवलं जात आहे. बचावकार्यात लागलेली वाहनं परत येत आहेत. सर्वांना तिथून बाहेर काढून सुरक्षित ठिकाणी नेलं जात आहे. सगळी कामं थांबली आहेत. अजून मोठा पूर येण्याची शक्यता आहे, म्हणूनच सर्वांना अलर्टवर ठेवण्यात आलं आहे."

भोटेकोशी पुरातील मृतांचा आकडा वाढला

बुधवारी आलेल्या भोटेकोशी नदीच्या विनाशकारी पुरातून आतापर्यंत बचाव पथकांनी ४७५ मृतदेह बाहेर काढले आहेत, असं काठमांडू पोस्टने म्हटलं आहे.

नेपाळ पर्यटन मंडळाने गुरुवारी रात्री सांगितलं की, पूरग्रस्त भागांमध्ये १२७ नेपाळी नागरिकांसह ६६७ पर्यटक आणि प्रवासी अजूनही बेपत्ता आहेत.