सौदीला मदत भोवणार? इराणचा पाकिस्तानला थेट इशारा, 'परिणाम वाईट होतील'

Iran Warns Pakistan Over Military Support for Saudi Arabia Amid Rising Tensions:इराणचे राष्ट्राध्यक्ष मसूद पेझेश्कियान यांनी पाकिस्तानचे पंतप्रधान शेहबाज शरीफ यांना सौदी अरेबियाला पाठिंबा देण्यावरून थेट इशारा दिला आहे. जर युद्धाला जबाबदार असणाऱ्यांवर कारवाई झाली नाही, तर जागतिक सुरक्षा आणि आंतरराष्ट्रीय व्यवस्था धोक्यात येईल, असं त्यांनी म्हटलं आहे

Iran Warning to Pakistan: मध्य-पूर्वेत (Middle-East) तणाव वाढत असतानाच आता इराणच्या राष्ट्रपतींनी पाकिस्तानला एक गंभीर इशारा दिला आहे. इराणचे राष्ट्रपती मसूद पेझेश्-कियान यांनी पाकिस्तानचे पंतप्रधान शेहबाज शरीफ यांना सौदी अरेबियाला उघडपणे पाठिंबा देण्याच्या भूमिकेवरून सावध केलं आहे. गरज पडल्यास पाकिस्तान सौदी अरेबियाच्या मदतीला तयार असेल, असं विधान पाकिस्तानकडून करण्यात आलं होतं, ज्यानंतर इराणने ही आक्रमक भूमिका घेतली आहे.

पाकिस्तानच्या विधानामुळे वाढला तणाव

आता झालं असं की, पाकिस्तानच्या पंतप्रधानांच्या प्रवक्त्याने नुकतंच एक विधान केलं होतं. त्यात त्यांनी म्हटलं होतं की, "जेव्हा कधी गरज लागेल, तेव्हा पाकिस्तान सौदी अरेबियाच्या मदतीसाठी पुढे येईल." या विधानानंतर लगेचच इराणकडून प्रतिक्रिया आली. इराणच्या राष्ट्रपतींनी पाकिस्तानला इशारा देत म्हटलं की, जर युद्धाची जबाबदारी निश्चित केली नाही आणि परिस्थितीकडे दुर्लक्ष केलं, तर त्याचे जगाच्या सुरक्षेवर गंभीर परिणाम होऊ शकतात.

पाकिस्तान-सौदी संरक्षण कराराने वाढवली चिंता

गेल्या वर्षी पाकिस्तान आणि सौदी अरेबियामध्ये एक महत्त्वाचा संरक्षण करार झाला होता. हा करार नाटो (NATO) सारख्या मॉडेलवर आधारित असल्याचं मानलं जातं. या करारानुसार, जर दोन्हीपैकी एका देशावर हल्ला झाला, तर तो दोन्ही देशांवर झालेला हल्ला मानला जाईल आणि दोन्ही देश मिळून त्याला प्रत्युत्तर देतील. याच करारामुळे आता या भागातील राजकारणात नवी खळबळ उडाली आहे.

सौदी अरेबियाने संरक्षण करार 'अॅक्टिव्ह' केला

इराणकडून होणाऱ्या हल्ल्यांच्या पार्श्वभूमीवर, दोन दिवसांपूर्वी पाकिस्तानचे लष्करप्रमुख जनरल असीम मुनीर यांनी रियाधला भेट दिली होती. तिथे त्यांनी सौदी अरेबियाचे संरक्षण मंत्री खालिद बिन सलमान अल सौद यांची भेट घेतली. या भेटीनंतर सौदी अरेबियाने एक निवेदन जारी करून पाकिस्तानसोबतचा संरक्षण करार 'अॅक्टिव्ह' म्हणजेच सक्रिय करण्यात आल्याचं जाहीर केलं. याच घडामोडीनंतर इराणने पाकिस्तानला हा इशारा दिला आहे.

फोनवर पेझेश्कियान यांनी व्यक्त केली चिंता

इराणच्या सरकारी मीडियानुसार, राष्ट्रपती मसूद पेझेश्कियान यांनी पाकिस्तानचे पंतप्रधान शेहबाज शरीफ यांच्याशी फोनवर चर्चा केली. यावेळी ते म्हणाले की, "जर आंतरराष्ट्रीय समुदायाने युद्धाला जबाबदार लोकांना जबाबदार धरलं नाही, तर जागतिक व्यवस्था आणि जगाची सुरक्षा धोक्यात येऊ शकते." युद्धामागील कारणं आणि जबाबदार लोकांकडे दुर्लक्ष केल्यास आंतरराष्ट्रीय शांतता आणखी धोक्यात येईल, असंही त्यांनी स्पष्ट केलं. पेझेश्कियान यांनी जगाला सध्या सुरू असलेल्या युद्धाच्या परिणामांवर अधिक लक्ष देण्याचं आवाहन केलं.

पाकिस्तानने पुन्हा सौदीच्या समर्थनाचा पुनरुच्चार केला

इराणचा हा इशारा अशा वेळी आला आहे, जेव्हा बुधवारी शेहबाज शरीफ यांचे सल्लागार मुशर्रफ झैदी यांनी पाकिस्तान सौदी अरेबियाच्या मदतीसाठी नेहमीच तयार असेल, असं पुन्हा एकदा स्पष्ट केलं. ते म्हणाले की, "यात काहीच शंका नाही की जेव्हा गरज पडेल, तेव्हा पाकिस्तान सौदी अरेबियाच्या बाजूने उभा राहील." संरक्षण कराराच्या आधीपासूनच दोन्ही देश एकमेकांना नेहमीच पाठिंबा देत आले आहेत, असंही ते म्हणाले.

प्रादेशिक स्थिरतेबद्दलही चिंता

मुशर्रफ झैदी यांनी हेही स्पष्ट केलं की, "खरा प्रश्न हा आहे की, पाकिस्तान अशी कोणती पावलं उचलत आहे, जेणेकरून त्याचे जवळचे भागीदार देश मोठ्या संघर्षात आणखी खोलवर अडकणार नाहीत." जर असं झालं, तर संपूर्ण प्रदेशाची स्थिरता आणि आर्थिक प्रगतीवर त्याचा परिणाम होऊ शकतो, असा इशाराही त्यांनी दिला.

आखाती देशांवर क्षेपणास्त्र आणि ड्रोन हल्ले सुरूच

मध्य-पूर्वेतील तणाव सातत्याने वाढत आहे. सौदी अरेबियाने शनिवारी सांगितलं की, त्यांनी एका मोठ्या तेल क्षेत्राच्या दिशेने येणारा इराणी ड्रोन पाडला आहे. याशिवाय, इराणने सौदी अरेबियाची सर्वात मोठी तेल कंपनी 'सौदी अरामको' (Saudi Aramco) वरही हल्ले केले आहेत. याच आठवड्यात पाकिस्तानचे लष्करप्रमुख असीम मुनीर सौदी अरेबियाला गेले होते आणि तिथे त्यांनी संरक्षण मंत्री खालिद बिन सलमान यांची भेट घेतली. रिपोर्ट्सनुसार, सौदी अरेबियावर होणारे इराणी ड्रोन आणि क्षेपणास्त्र हल्ले रोखण्यासाठी एकत्रितपणे काय पावलं उचलता येतील, यावर दोन्ही नेत्यांमध्ये चर्चा झाली.