Iran-Israel War : इस्रायलचा इराणच्या 2 मोठ्या विमानतळांवर हल्ला, बुशेहर अणुप्रकल्पाचे टेन्शन वाढले!

Iran Israel Conflict Escalates : इस्रायल-इराण युद्धादरम्यान बुशेहर विमानतळावर 'इराण एअर'चं एक प्रवासी विमान उद्ध्वस्त झालं आहे. मेहराबाद विमानतळालाही हल्ल्याचा फटका बसला. रशियाच्या 'रोसाटॉम' कंपनीने बुशेहर अणुऊर्जा प्रकल्पाचं काम थांबवलं आहे. 

Iran Israel Conflict Escalates : मध्य पूर्वेत सुरू असलेल्या युद्धाचा परिणाम आता हवाई वाहतूक आणि अणुप्रकल्पांवरही दिसू लागला आहे. दक्षिण इराणमध्ये इस्रायलने केलेल्या हवाई हल्ल्यात एक प्रवासी विमान उद्ध्वस्त झाल्याची बातमी आहे. मिळालेल्या माहितीनुसार, बुशेहर विमानतळावर 'इराण एअर'च्या (Iran Air) एका प्रवासी विमानाला लक्ष्य करण्यात आलं. विमानतळावर झालेल्या या हल्ल्यात विमान जमिनीवरच नष्ट झालं. मात्र, हल्ल्याच्या वेळी विमान सेवेत होतं की नाही, हे अद्याप स्पष्ट झालेलं नाही. इस्रायलकडून इराणमधील वेगवेगळ्या ठिकाणांवर सातत्याने हल्ले सुरू असतानाच ही घटना घडली आहे.

बुशेहर अणुप्रकल्पाबद्दल चिंता वाढली

इराणचा एकमेव अणुऊर्जा प्रकल्प बुशेहरमध्येच आहे, जो पर्शियन आखाताच्या किनाऱ्यावर वसलेला आहे. त्यामुळे या हल्ल्यानंतर या प्रकल्पाबद्दलची चिंता वाढली आहे. याचदरम्यान, रशियाची सरकारी अणुऊर्जा कंपनी 'रोसाटॉम'ने (Rosatom) बुशेहर अणुऊर्जा प्रकल्पाच्या नवीन युनिट्सचं बांधकाम थांबवण्याची घोषणा केली आहे. कंपनीचे प्रमुख अलेक्सी लिखाचेव यांनी सांगितलं की, प्रकल्पाच्या दुसऱ्या आणि तिसऱ्या युनिटच्या बांधकामाचं काम सध्या थांबवण्यात आलं आहे.

मेहराबाद विमानतळालाही फटका

इराणच्या प्रमुख विमानतळांपैकी एक असलेल्या मेहराबाद आंतरराष्ट्रीय विमानतळालाही (Mehrabad International Airport) हल्ल्याचा फटका बसला आहे. वृत्तानुसार, तेहरानच्या पश्चिमेला असलेल्या या विमानतळाच्या आसपासच्या परिसरावर हल्ला करण्यात आला. समोर आलेल्या फोटोंमध्ये धावपट्टीच्या (runway) मागून धूर निघताना दिसत आहे.

कोम शहरात 'असेंब्ली ऑफ एक्सपर्ट्स'च्या इमारतीवर एअरस्ट्राइक

इराणमध्ये नवीन सुप्रीम लीडर निवडण्याची प्रक्रिया सुरू असतानाच, इस्रायलने कोम (Qom) शहरात हवाई हल्ला केला. 'टाइम्स ऑफ इस्रायल'च्या वृत्तानुसार, 'असेंब्ली ऑफ एक्सपर्ट्स'च्या इमारतीला लक्ष्य करण्यात आलं, जिथे वरिष्ठ धार्मिक नेते जमले होते. 'असेंब्ली ऑफ एक्सपर्ट्स' ही ८८ सदस्यांची एक संस्था आहे, जी देशाच्या सुप्रीम लीडरची निवड करते. या हल्ल्यात इमारतीचं मोठं नुकसान झालं आहे, पण आतमध्ये किती लोक होते याबाबत कोणतीही अधिकृत माहिती समोर आलेली नाही.

खामेनींच्या मृत्यूनंतर परिस्थिती आणखी बिघडली

युद्धाच्या पहिल्या दिवशी, म्हणजे शनिवारी, अमेरिका आणि इस्रायलच्या हल्ल्यात इराणचे सुप्रीम लीडर अयातुल्ला अली खामेनी यांचा मृत्यू झाला होता. त्यानंतर अलीरेझा यांना अंतरिम सुप्रीम लीडर बनवण्यात आलं आहे. मात्र, निवड प्रक्रियेनंतरच कायमस्वरूपी नेत्याची नियुक्ती शक्य होईल. खामेनी यांच्या मृत्यूनंतर इराण प्रचंड संतापला असून आखाती देशांवर सातत्याने हल्ले करत आहे.