हिजबुल्लाहचा १६५ रॉकेट हल्ला, उत्तर इस्रायल हादरले

पेजर स्फोटात आपला हात असल्याचे इस्रायलचे पंतप्रधान बेंजामिन नेतन्याहू यांनी अलीकडेच कबूल केले आहे. 

तेल अवीव्ह: हिजबुल्लाहने इस्रायलवर हल्ला तीव्र केला आहे. उत्तर इस्रायलवर १६५ रॉकेट डागण्यात आले. या हल्ल्यात अनेक जण जखमी झाल्याचे वृत्त आहे. अनेक वाहने जळून खाक झाली. रॉकेट हल्ल्यानंतर झालेल्या नुकसानीचा व्हिडिओ इस्रायल डिफेन्स फोर्स (IDF) ने प्रसिद्ध केला आहे. हिजबुल्लाहच्या हल्ल्यांपासून नागरिकांचे रक्षण करत राहू, असे आयडीएफने म्हटले आहे. 

गॅलिली प्रदेशावर ५० रॉकेट डागण्यात आल्याची माहिती आयडीएफने दिली. त्यातील काही रॉकेट हवाई संरक्षण यंत्रणेने रोखले. मात्र, अनेक रॉकेट कार्मियल भागात पडले. लेबनानमधून हिजबुल्लाहने सोडलेला एक ड्रोन माल्कियावर हवाई संरक्षण यंत्रणेने नष्ट केला. तसेच, अलीकडेच इस्रायलवर हल्ला करण्यासाठी वापरलेला हिजबुल्लाहचा रॉकेट लॉन्चर लक्ष्यित ड्रोन हल्ल्यात नष्ट केल्याचा दावा आयडीएफने केला आहे. 

गेल्या काही दिवसांत इस्रायलवर ९० हून अधिक रॉकेट हिजबुल्लाहने डागले. इस्रायलच्या आयर्न डोम संरक्षण यंत्रणेने अनेक रॉकेट रोखली असली तरी हायफा बंदरासह अनेक ठिकाणी नुकसान झाले. अनेक जण जखमी झाले, इमारती कोसळल्या आणि वाहने जळून खाक झाली. सप्टेंबरमध्ये लेबनानमध्ये हिजबुल्लाहच्या संपर्क यंत्रणेतील पेजर आणि वॉकी-टॉकी स्फोट झाले होते. या स्फोटात ४० जण ठार झाले आणि ३,००० हून अधिक जखमी झाले. या घटनेत इस्रायलचा हात असल्याचा आरोप इराणी माध्यमांसह अनेकांनी केला होता, मात्र इस्रायलने यावर प्रतिक्रिया दिली नव्हती. पण, अलीकडेच पंतप्रधान नेतन्याहू यांनी इस्रायलचा यात सहभाग असल्याचे पहिल्यांदाच कबूल केले. त्यानंतर हिजबुल्लाहने इस्रायलवर हल्ला तीव्र केला आहे.