ट्रम्प यांच्या विजयामुळे मस्क यांच्या संपत्तीत २.२२ लाख कोटींची वाढ

जगातील सर्वात श्रीमंत व्यक्ती इलॉन मस्क हे अमेरिकेच्या अध्यक्षीय निवडणुकीत ट्रम्प यांच्यासाठी जोरदार प्रचारात उतरले होते. आर्थिक पाठिंबा देण्यासोबतच, महत्त्वाच्या राज्यांमध्ये थेट प्रचार करून मस्क यांनी ट्रम्प यांच्यावरील निष्ठा दाखवली. आमचा नवा तारा असे म्हणत ट्रम्प यांनीही मस्क यांना जवळ केले. निवडणुकीचे निकाल जाहीर होताच ट्रम्प जिंकणार असल्याचे संकेत मिळताच मस्क यांच्या मालकीच्या कंपन्यांच्या शेअर्समध्ये मोठी वाढ झाली. यामुळे एकाच दिवसात मस्क यांच्या संपत्तीत २.२२ लाख कोटी रुपयांची वाढ झाली. यामुळे मस्क यांची एकूण संपत्ती २४.३६ लाख कोटी रुपये झाली आहे. ट्रम्प यांच्या विजयाचे संकेत मिळताच इलॉन मस्क यांच्या मालकीच्या इलेक्ट्रिक वाहन उत्पादक कंपनी टेस्लाच्या शेअर्समध्ये १४.७५ टक्क्यांनी वाढ झाली. टेस्लाचे शेअर्स २८८.५३ डॉलरपर्यंत वाढले.

 ट्रम्प यांच्या विजयाचा फायदा केवळ मस्क यांनाच झाला नाही. ट्रम्प यांच्या पुनरागमनामुळे उत्साही अमेरिकन शेअर बाजार चांगलाच वाढला आणि जगातील इतर श्रीमंत व्यक्तींच्या संपत्तीतही वाढ झाली. जगातील दुसरे सर्वात श्रीमंत व्यक्ती, Amazon चे संस्थापक जेफ बेझोस यांची संपत्ती ७.१४ अब्ज डॉलरने वाढून २२८ अब्ज डॉलर झाली. जगातील चौथे सर्वात श्रीमंत व्यक्ती, Oracle चे सह-संस्थापक आणि CTO लॅरी एलिसन यांची संपत्ती ९.८८ अब्ज डॉलरने वाढून १९३ अब्ज डॉलर झाली. गुंतवणूकदार आणि Berkshire चे अध्यक्ष वॉरेन बफेट यांनी ७.५८ अब्ज डॉलर मिळवले आणि त्यांची एकूण संपत्ती १४८ अब्ज डॉलर झाली.

ट्रम्प यांच्या बाजूने निवडणुकीचे निकाल लागल्यानंतर अमेरिकन निर्देशांक S&P ५०० २.५३ टक्क्यांनी वाढून ५,९२९.०४ डॉलरवर पोहोचला. Dow Jones Industrial Average १,५०८.०५ अंकांनी वाढून ४३,७२९.९३ डॉलरवर पोहोचला. Nasdaq Composite २.९५% वाढला.