US Iran War : सौदी प्रिन्सच्या एका फोनमुळे इराणचे सर्वोच्च नेते मारले गेले? मोठा खुलासा!

Did Saudi Prince MBS Urge Trump to Attack Iran : वॉशिंग्टन पोस्टच्या रिपोर्टनुसार, सौदीच्या क्राऊन प्रिन्सनेच ट्रम्प यांना इराणवर हल्ला करण्यासाठी खासगीत भडकवलं होतं. 

Did Saudi Prince MBS Urge Trump to Attack Iran : सध्या संपूर्ण मिडल-ईस्ट (मध्य-पूर्व) युद्धाच्या आगीत होरपळत आहे. अमेरिका आणि इस्रायलने केलेल्या संयुक्त कारवाईत इराणचे सर्वोच्च नेते अयातुल्ला अली खामेनी यांचा मृत्यू झाला. त्यामुळे आता हे युद्ध आणखी भडकण्याची भीती आहे. याच दरम्यान, 'वॉशिंग्टन पोस्ट'च्या एका रिपोर्टमधून या युद्धाबाबत एक मोठा गौप्यस्फोट झाला आहे. या रिपोर्टनुसार, सौदी अरेबियाचे क्राऊन प्रिन्स मोहम्मद बिन सलमान यांनी गेल्या महिन्यात अमेरिकेचे अध्यक्ष डोनाल्ड ट्रम्प यांना अनेक वैयक्तिक फोन केले होते. सार्वजनिक पातळीवर ते शांततेची भाषा करत होते, पण या कॉल्समध्ये त्यांनी ट्रम्प यांच्यावर इराणवर हल्ला करण्यासाठी दबाव आणला होता, असा दावा रिपोर्टमध्ये करण्यात आला आहे.

जाहीर भूमिका वेगळी, पण आतून दबाव: हवाई हद्दीवरून सौदीचा दुटप्पीपणा

जानेवारी २०२६ मध्ये मोहम्मद बिन सलमान यांनी जाहीरपणे सांगितलं होतं की, सौदी अरेबिया आपली हवाई हद्द किंवा जमीन इराणवरील हल्ल्यासाठी वापरू देणार नाही. सौदी अरेबिया इराणच्या सार्वभौमत्वाचा आदर करतो आणि वॉशिंग्टन व तेहरानने चर्चेतून मार्ग काढावा, असं आवाहनही त्यांनी केलं होतं. पण, खासगीत मात्र त्यांची भूमिका याच्या अगदी उलट होती, असा दावा रिपोर्टमध्ये केला आहे.

इराणवर आठवडाभर बॉम्बचा वर्षाव होणार!

शनिवारी अमेरिका आणि इस्रायलने मिळून इराणवर लष्करी हल्ला चढवला. या हल्ल्यात इराणची लष्करी आणि सरकारी ठिकाणं लक्ष्य करण्यात आली. अणुकरारावरची बोलणी फिस्कटल्यानंतर आणि इराणने पुन्हा अणुकार्यक्रम सुरू केल्याचा दावा झाल्यानंतर हा हल्ला करण्यात आला. डोनाल्ड ट्रम्प यांनी म्हटलं आहे की, ही मोठी आणि अचूक बॉम्बफेक संपूर्ण आठवडाभर किंवा गरज असेपर्यंत सुरूच राहील.

इराणचा पलटवार: UAE, कतार आणि सौदी अरेबियावर प्रतिहल्ले

या हल्ल्यानंतर इराणनेही जोरदार पलटवार केला. इराणने UAE मधील अबू धाबी आणि दुबई, कतारची राजधानी दोहा आणि सौदी अरेबियातील रियाध शहराला लक्ष्य केलं. या घटनांमुळे मिडल-ईस्ट एका नव्या संघर्षाच्या खाईत लोटलं जात आहे. सौदी अरेबियाच्या परराष्ट्र मंत्रालयाने एक निवेदन प्रसिद्ध करून इराणच्या 'उघड आणि भ्याड' हल्ल्यांचा तीव्र निषेध केला आहे. कोणत्याही सबबीखाली या हल्ल्यांचं समर्थन होऊ शकत नाही, असं या निवेदनात म्हटलं आहे. तसंच, इराणला लक्ष्य करण्यासाठी आपली हवाई हद्द वापरली जाणार नाही, हे सौदीने आधीच स्पष्ट केलं होतं, याचाही पुनरुच्चार करण्यात आला.

सौदी अरेबियाची आखाती देशांशी चर्चा

'अरब न्यूज'च्या रिपोर्टनुसार, इराणच्या हल्ल्यानंतर क्राऊन प्रिन्सने अनेक प्रादेशिक नेत्यांशी चर्चा केली. त्यांनी UAE चे अध्यक्ष शेख मोहम्मद बिन जायद अल-नाहयान, बहरीनचे राजे हमद बिन इसा अल-खलिफा, कतारचे अमीर शेख तमीम बिन हमद अल-थानी, कुवेतचे अमीर शेख मिशाल अल-अहमद अल-जबर अल-सबाह आणि जॉर्डनचे राजे अब्दुल्ला द्वितीय यांच्याशी संपर्क साधला. यावेळी क्राऊन प्रिन्सने या देशांसोबत एकजूट दाखवली आणि या भागाची सुरक्षा व स्थैर्य टिकवण्यासाठी सौदी अरेबिया आपली सर्व ताकद पणाला लावेल, असं आश्वासन दिलं.

रिव्होल्युशनरी गार्ड्सची धमकी: मोठ्या हल्ल्याचा इशारा

रविवारी इराणच्या रिव्होल्युशनरी गार्ड्सने इस्रायल आणि अमेरिकेच्या ठिकाणांवर 'आतापर्यंतचा सर्वात मोठा हल्ला' करण्याची धमकी दिली आहे. गेल्या आठ महिन्यांत दुसऱ्यांदा ट्रम्प प्रशासनाने अणुकार्यक्रमावरील चर्चेदरम्यान इराणवर हल्ला केला आहे. अनेक दशकं इराणचे सर्वोच्च नेते राहिलेल्या खामेनी यांच्या मृत्यूनंतर, आता अलीरेझा अराफी यांना नवीन अंतरिम सर्वोच्च नेता म्हणून नियुक्त करण्यात आलं आहे.