कॅलिफोर्नियातील वणव्याचा कहर, चोऱ्यांचे प्रकार वाढले, २० जणांना अटक

कॅलिफोर्नियाचे गव्हर्नर यांनी राष्ट्रीय रक्षक दलाच्या तैनातीची घोषणा केली असून, लोकांना सुरक्षित स्थळी हलवण्यात आलेल्या भागात चोऱ्यांचे प्रकार घडत असल्याची माहितीही त्यांनी दिली आहे.

न्यूयॉर्क: अमेरिकेतील लॉस एंजेलिसमध्ये गेल्या तीन दिवसांपासून भीषण वणवा पेटला आहे. चौथ्या दिवशीही वणवा आटोक्यात येत नसल्याने बायडन प्रशासनासमोर मोठे आव्हान उभे राहिले आहे. वणवा आटोक्यात येण्याऐवजी तो आणखी पसरत असल्याने अमेरिकेसमोर चिंतेचे वातावरण आहे. आतापर्यंत १० जणांचा मृत्यू झाल्याची अधिकृत माहिती आहे. प्राथमिक अंदाजानुसार ५७०० कोटी डॉलर्सचे नुकसान झाले आहे. दीड लाखांहून अधिक लोकांना सुरक्षित स्थळी हलवण्यात आले आहे. रिकाम्या घरांमध्ये चोऱ्यांचे प्रकार वाढत असल्याने प्रशासनाची डोकेदुखी वाढली आहे. कॅलिफोर्नियाचे गव्हर्नर यांनी राष्ट्रीय रक्षक दलाच्या तैनातीची घोषणा केली असून, लोकांना सुरक्षित स्थळी हलवण्यात आलेल्या भागात चोऱ्यांचे प्रकार घडत असल्याची माहितीही त्यांनी दिली आहे. अशा प्रकारे चोरी करणाऱ्या २० जणांना अटक करण्यात आल्याचेही गव्हर्नर यांनी सांगितले.

दरम्यान, कॅलिफोर्नियात वणव्याने मोठे नुकसान झाले आहे. पॅलिसेड्समधील आगीत १९,००० एकर क्षेत्र जळून खाक झाले आहे. अटलांटामध्ये १३,००० एकर क्षेत्र वणव्याने नष्ट झाले आहे. या भागातून हजारो लोकांना सुरक्षित स्थळी हलवण्यात आले आहे. लॉस एंजेलिस काउंटी सुरक्षा प्रमुखांनी अणुबॉम्ब हल्ल्यासारखे दृश्य असल्याचे वर्णन केले आहे. बुधवारी संध्याकाळी सुरू झालेला वणवा चौथ्या दिवशीही आटोक्यात आलेला नाही, असेही त्यांनी सांगितले. कोरडा वारा जोरदारपणे वाहत असल्याने आग आटोक्यात आणण्याचे प्रयत्न अयशस्वी होत आहेत. आग पसरण्याची भीती असलेल्या भागातून १,८०,००० लोकांना कधीही स्थलांतर करण्यास तयार राहावे, असा इशारा देण्यात आला आहे.

कोट्यवधी डॉलर्सची घरे जळून खाक झालेल्या पॅलिसेड्समध्ये अनेक सेलिब्रिटींचेही नुकसान झाले आहे. कॅलिफोर्नियातील इतिहासातील सर्वात मोठा वणवा आटोक्यात आणण्यासाठी सर्वतोपरी प्रयत्न केले जात आहेत, असे राष्ट्राध्यक्ष जो बायडन म्हणाले. प्राथमिक अंदाजानुसार ५७०० कोटी डॉलर्सचे नुकसान झाले आहे. पुनर्बांधणीचा खर्च सरकार करेल, असेही बायडन यांनी स्पष्ट केले.