Netanyahu New Video : मृत्यूच्या चर्चांना पूर्णविराम? नेतान्याहूंचा स्थानिकांसोबतचा नवा व्हिडिओ समोर, 90 सेकंदांचं संभाषण व्हायरल

Benjamin Netanyahu Counters Death Rumors : इराणच्या हल्ल्यात मृत्यू झाल्याच्या अफवा आणि आधीचा व्हिडिओ 'डीपफेक' असल्याच्या दाव्यांनंतर, इस्रायलचे पंतप्रधान बेंजामिन नेतान्याहू यांनी एक नवीन व्हिडिओ शेअर केला आहे. यात ते लष्करी आणि सामान्य महिलांशी हसून गप्पा मारताना दिसत आहेत.

Benjamin Netanyahu Counters Death Rumors : इराणच्या हल्ल्यात मृत्यू झाल्याच्या सोशल मीडियावरील चर्चांना इस्रायलचे पंतप्रधान बेंजामिन नेतान्याहू यांनी पुन्हा एकदा उत्तर दिलं आहे. त्यांनी आपला एक नवीन व्हिडिओ शेअर केला आहे, ज्यात ते काही महिलांशी हसून गप्पा मारताना दिसत आहेत. याआधी त्यांनी शेअर केलेला कॉफी शॉपमधील व्हिडिओ AI डीपफेक असल्याचा दावा करण्यात आला होता. त्यामुळे त्यांच्या प्रकृतीबद्दल पुन्हा एकदा उलटसुलट चर्चा सुरू झाल्या होत्या. याच पार्श्वभूमीवर, नेतान्याहूंनी हा ९० सेकंदांचा नवा व्हिडिओ शेअर केला आहे.

या व्हिडिओमध्ये नेतान्याहू लष्करी आणि साध्या वेशातील महिलांशी, तसेच इतर इस्रायली नागरिकांशी बोलत आहेत. व्हिडिओच्या बॅकग्राउंडला डोंगर आणि निसर्गरम्य परिसर दिसतोय. 'सूचनांचं पालन करा, आपण एकत्र जिंकू' असं कॅप्शन या व्हिडिओला दिलं आहे. काही दिवसांपूर्वी नेतान्याहूंच्या मृत्यूची अफवा पसरली होती. यानंतर इस्रायलने हे वृत्त फेटाळलं होतं. त्यानंतर नेतान्याहूंनी स्वतः कॉफी शॉपमधील एक व्हिडिओ शेअर करून या चर्चांना पूर्णविराम देण्याचा प्रयत्न केला होता.

जेरुसलेममधील एका कॅफेमध्ये कॉफी पितानाचा व्हिडिओ नेतान्याहूंनी आपल्या टेलिग्राम अकाऊंटवरून शेअर केला होता. यात त्यांनी आपल्या मृत्यूच्या चर्चांची खिल्ली उडवली होती. 'मी कॉफीसाठी मरायलाही तयार आहे,' असं ते हिब्रू भाषेत गंमतीने म्हणाले होते. इतकंच नाही, तर त्यांनी कॅमेऱ्यासमोर आपले हात दाखवत 'तुम्हाला माझी बोटं मोजायची आहेत का?' असा सवालही केला होता. कारण याआधी एका AI व्हिडिओत त्यांना ६ बोटं दाखवण्यात आली होती.

AI चा आरोप

पण तो व्हिडिओ समोर आल्यानंतर X (पूर्वीचं ट्विटर) च्या AI चॅटबॉट 'ग्रोक' (Grok) ने तो व्हिडिओसुद्धा AI ने तयार केलेला डीपफेक असल्याचा दावा केला. त्यामुळे नेतान्याहू खरंच जिवंत आहेत की नाही, अशी शंका पुन्हा उपस्थित झाली. याच सगळ्या गोंधळात आता त्यांनी लष्करी आणि सामान्य महिलांसोबतचा हा नवा व्हिडिओ शेअर केला आहे.