Norway Oil Rig Job : वर्षाला सव्वा कोटी पगार, 250 दिवस सुट्टी; तरीही नोकरी करायला कुणी तयार नाही, कारण काय?

नॉर्वेच्या ऑइल रिगवर काम करणारी इंजिनिअर अमाली लुंडस्टॅड हिची गोष्ट सध्या चर्चेत आहे. वर्षाला सव्वा कोटी रुपये पगार आणि २५० दिवसांची सुट्टी मिळत असली, तरी सलग दोन आठवडे समुद्राच्या मधोमध राहणं, धोक्याचं काम आणि कुटुंबापासून दूर राहणं ही या नोकरीतली मोठी आव्हानं आहेत.

नॉर्वे : वर्षाला कोट्यवधी रुपयांचा पगार, तब्बल २५० दिवसांची सुट्टी आणि कामाव्यतिरिक्त स्वतःसाठी भरपूर वेळ... हे ऐकायला एखाद्या 'ड्रीम जॉब'सारखं वाटतं ना? पण नॉर्वेच्या समुद्रात ऑइल रिगवर (तेल विहीर) प्रोसेस इंजिनिअर म्हणून काम करणाऱ्या अमाली लुंडस्टॅड हिची गोष्ट वेगळीच आहे.

वर्षाला सव्वा कोटी पगार, २५० दिवस सुट्टी; तरीही ही नोकरी नको रे बाबा

पगार आणि सुट्ट्या कितीही आकर्षक असल्या, तरी या कामासाठी प्रचंड शिस्त, मानसिक कणखरपणा आणि कुटुंबापासून दूर राहण्याची तयारी लागते.

दोन आठवडे समुद्राच्या मधोमध ड्युटी!

२९ वर्षांची अमाली नॉर्वेमधील बर्गन शहराजवळ समुद्रात असलेल्या एका ऑइल रिगवर काम करते. तिच्या कामाचं शेड्युल खूप वेगळं आहे. तिला सलग दोन आठवडे समुद्रातल्या त्या प्लॅटफॉर्मवरच राहावं लागतं. तिची शिफ्ट पहाटे ५.४५ वाजता किंवा दुपारी सुरू होते.

ड्युटी सुरू झाल्यावर आधीच्या टीमकडून चार्ज घेणं आणि सुरक्षेची तपासणी करणं ही तिची पहिली कामं असतात. तेल वाहून नेणारे पाईप्स, मशिन्स आणि वॉर्निंग सिस्टीमवर तिला सतत लक्ष ठेवावं लागतं. इथे झालेली एक छोटीशी चूकही मोठ्या अपघाताला निमंत्रण देऊ शकते. त्यामुळे नियमांचं पालन आणि सतर्कता इथे खूप महत्त्वाची असते.

सव्वा कोटींच्या पगारामागची आव्हानं काय?

अमालीला वर्षाला साधारण १.३ लाख युरो पगार मिळतो. भारतीय चलनात सांगायचं तर ही रक्कम १.२५ कोटी रुपयांच्या घरात जाते. रोटेशन ड्युटीमुळे तिला वर्षातले तब्बल २५० दिवस सुट्टी मिळते.

पण ही सुट्टी म्हणजे रोज संध्याकाळी ऑफिसमधून घरी येण्यासारखी नाही. ड्युटीच्या काळात तिला समुद्राच्या मधोमध असलेल्या रिगवरच राहावं लागतं. एवढे दिवस कुटुंब, मित्रमंडळी आणि बाहेरच्या जगापासून पूर्णपणे कट ऑफ राहणं अनेकांसाठी मानसिकदृष्ट्या खूप कठीण असतं. जसं मुंबईतल्या एखाद्या माणसाला सलग १५ दिवस समुद्रातल्या जहाजावर ठेवलं, तर त्याला जसं वाटेल, तशीच काहीशी ही स्थिती असते.

हा प्रत्येकाचा 'ड्रीम जॉब' नाही!

ऑइल रिगवर काम करण्यासाठी फक्त तांत्रिक ज्ञान असून चालत नाही. धोके ओळखण्याची क्षमता, शिस्त आणि दबावाखाली योग्य निर्णय घेण्याचं कौशल्यही लागतं. रिगवर जिमसारख्या मनोरंजनाच्या सुविधा असल्या, तरी त्या घर आणि कुटुंबाची जागा घेऊ शकत नाहीत.

जास्त पगार म्हणजे नोकरी चांगलीच असेल, असा गैरसमज यातून दूर होतो. नोकरी निवडताना फक्त पगार न पाहता कामाचं स्वरूप, सुरक्षितता, मानसिक ताण आणि वैयक्तिक आयुष्यावर होणारा परिणाम या गोष्टींचाही विचार करणं गरजेचं आहे.