पेट्रोल महाग झालंय? या 10 ट्रिक्स वापरून वाचवा हजारो रुपये

अनेक लोक दर 5 सेकंदाला जोरात एक्सलेटर दाबतात आणि लगेच ब्रेक मारतात. यामुळे पेट्रोल सर्वात जास्त खर्च होतं. म्हणून गाडी स्मूद चालवा, अचानक वेग वाढवू नका आणि हळूहळू एक्सलेटर द्या.

टायरमध्ये हवा कमी असेल तर ते रस्त्यावर जास्त घासले जातात. यामुळे इंजिनवर दाब वाढतो, पेट्रोल जास्त लागतं. म्हणून दर 10 दिवसांनी टायर तपासा. कंपनीने सांगितलेल्या प्रेशरवरच हवा भरा.

सिग्नल मोठा असेल आणि जास्त वेळ थांबावं लागत असेल, तर इंजिन बंद करा. आजकाल अनेक नवीन गाड्यांमध्ये ऑटो स्टार्ट-स्टॉप फीचर येतं, पण जुन्या गाड्यांमध्ये ही सवय लावावी लागेल.

कारचा AC जास्त पेट्रोल खातो, विशेषतः शहरातल्या ट्रॅफिकमध्ये. त्यामुळे हवामान चांगलं असेल तर खिडकी उघडा. AC चं तापमान खूप कमी ठेवू नका आणि जवळच्या अंतरासाठी AC वापरणं टाळा.

खराब एअर फिल्टर, खराब इंजिन ऑईल आणि जुने स्पार्क प्लग गाडीचं मायलेज कमी करतात. लक्षात ठेवा, नियमित सर्व्हिसिंगमुळे मायलेज सुधारतं आणि खर्चही कमी होतो.

कारमध्ये विनाकारण सामान भरून ठेवल्यास गाडी जड होते आणि पेट्रोल जास्त लागतं. जुन्या बॅग, न लागणारी अवजारं, अतिरिक्त सामान कारमधून काढून टाका. वजन कमी तर पेट्रोलही कमी लागतं.

1-2 किलोमीटरसाठी गाडी काढणं म्हणजे सर्वात मोठं नुकसान. अशा ठिकाणी पायी जा, सायकल वापरा, ई-रिक्षा किंवा शेअर ऑटोने प्रवास करा. यामुळे पेट्रोलही वाचेल आणि आरोग्यही चांगलं राहील.

चुकीच्या गिअरमध्ये गाडी चालवल्याने इंजिनवर दाब वाढतो. त्यामुळे कमी स्पीडमध्ये मोठा गिअर टाकू नका. जास्त स्पीडवर लहान गिअर टाळायला हवा. यामुळे मायलेज चांगलं मिळतं.

ऑफिसमधले 3-4 जण एकाच मार्गावरून जात असतील, तर 'कार पूल' हा सर्वात स्वस्त पर्याय ठरू शकतो. यामुळे पेट्रोलचा खर्च वाटला जाईल, ट्रॅफिक कमी होईल आणि पार्किंगचं टेन्शनही कमी होईल.

प्रत्येक पेट्रोल पंपावर क्वालिटी आणि सर्व्हिस वेगवेगळी असू शकते. त्यामुळे विश्वासार्ह पंप निवडा. गाडीचा टँक पूर्ण रिकामा होऊ देऊ नका. सकाळी पेट्रोल भरणं अधिक चांगलं मानलं जातं.