Asianet News Marathi

Shubman Gill : शुभमन गिलने रोनाल्डोला टाकलं मागे, कोहली-रोहित टॉप 50 मधून बाहेर

Karishma R — Fri, 30 Oct 2026 14:46:36 +0530

मुंबई : भारतीय क्रिकेटचा युवा स्टार शुभमन गिल याने जागतिक पातळीवर एक मोठी कामगिरी करून दाखवली आहे. क्रीडा जगतातील खेळाडूंचे ब्रँड व्हॅल्यू आणि मार्केटमधील मागणी ठरवणाऱ्या SportsPro 2026 च्या नव्या यादीत शुभमन गिलने थेट १३ वा क्रमांक पटकावला आहे.

शुभमन गिल्लने ख्रिस्तियानो रोनाल्डोला टाकले मागे! कोहली, रोहित टॉप ५० मधूनही बाहेर!

विशेष म्हणजे फुटबॉल विश्वातील दिग्गज खेळाडू ख्रिस्तियानो रोनाल्डो १४ व्या क्रमांकावर फेकला गेला असून तो गिल्लच्या मागे आहे. तर लिओनेल मेस्सी या यादीत २७ व्या स्थानावर आहे.

टॉप १५ मध्ये एकमेव युवा भारतीय क्रिकेटपटू!

या संपूर्ण यादीत शुभमन गिल हा सर्वात वरच्या स्थानावर असणारा भारतीय क्रिकेटपटू ठरला आहे. गिल्लचे हे यश भारतीय क्रिकेटच्या नव्या पिढीची आंतरराष्ट्रीय मार्केटमधील ताकद दाखवून देते. ही रँकिंग खेळाडूच्या मैदानावरील कामगिरीवर ठरत नाही. तर खेळाडूची ब्रँड व्हॅल्यू, त्याची लोका मधील लोकप्रियता आणि भविष्यात त्याच्याकडून मिळणारा व्यावसायिक फायदा या गोष्टी लक्षात घेऊन हे मानांकन दिले जाते.

विराट कोहली, रोहित शर्मा आणि धोनी कोणत्या नंबरवर आहेत?

एक काळ असा होता की या यादीत विराट कोहली आणि रोहित शर्मा नेहमी आघाडीवर असायचे. पण यावेळी दोघेही पहिल्या ५० खेळाडूंमध्ये स्थान मिळवू शकलेले नाहीत. विराट कोहली या यादीत ८५ व्या तर रोहित शर्मा ९० व्या क्रमांकावर गेला आहे. माजी कर्णधार एमएस धोनी ८३ व्या स्थानावर आहे. गेल्या वर्षीच्या यादीत कोहली आणि रोहित दोघेही पहिल्या ५० मध्ये होते.

मात्र या वर्षी भारताच्या ५ क्रिकेटपटूंनी टॉप ५० मध्ये आपली जागा बनवली आहे. यामध्ये शुभमन गिल १३ व्या, जेमिमा रॉड्रिग्स ३१ व्या, रिषभ पंत ३६ व्या, स्मृती मानधना ३७ व्या आणि जसप्रीत बुमराह ३९ व्या क्रमांकावर आहे.

ही रँकिंग नक्की कशी ठरवली जाते?

SportsPro ही संस्था तीन प्रमुख गोष्टींच्या आधारे ही रँकिंग जाहीर करते. ब्रँडची विश्वासार्हता आणि लोकप्रियेतेला ४५ गुण, ब्रँडच्या वाढीचा वेग याला ४० गुण आणि भविष्यातील व्यावसायिक संधींना १५ गुण दिले जातात.

या वर्षी बेलारुसची टेनिस स्टार अरीना सबालेन्का या यादीत पहिल्या क्रमांकावर आहे. शुभमन गिल १३ व्या नंबरवर पोहोचणे ही भारतीय क्रिकेटसाठी नक्कीच अभिमानाची गोष्ट आहे. पण कोहली आणि रोहितची रँकिंग घसरली म्हणजे त्यांची लोकप्रियता किंवा मैदानावरील खेळ कमी झाला असा याचा अर्थ अजिबात होत नाही. ही रँकिंग पूर्णपणे खेळाडूंच्या ब्रँड व्हॅल्यूवर आधारित असते.

Kuldeep Yadav: कुलदीप आणि वरुण प्लेईंग-11 बाहेर का? बॉलिंग कोच साईराज बहुतुले यांनी सांगितलं खरं कारण

vivek panmand — Fri, 30 Oct 2026 20:45:33 +0530

ऑकलंड: न्यूझीलंडविरुद्धच्या शेवटच्या टी-20 मॅचमध्ये कुलदीप यादव आणि वरुण चक्रवर्तीला खेळण्याची संधी मिळणार की नाही, हे अजून निश्चित नाही. पण हे दोघेही टीमच्या भविष्यातील योजनांचा महत्त्वाचा भाग आहेत, असं स्पिन बॉलिंग कोच साईराज बहुतुले यांनी स्पष्टपणे सांगितलंय. या मालिकेतल्या पहिल्या चारही मॅचेसमध्ये या दोन्ही दिग्गज स्पिनर्सना बेंचवरच बसावं लागलंय. टीम कॉम्बिनेशन जुळवून आणण्यासाठीच त्यांना आपल्या संधीची वाट पाहावी लागतेय.

ऑकलंडमध्ये झालेल्या चौथ्या टी-20 मॅचमध्ये भारतीय बॉलिंग लाईनअपची पुरती वाट लागली होती आणि टीमने २५९ रन्स देऊन मोठा पराभव स्वीकारला. या पराभवानंतरच कोच बहुतुले यांनी हे वक्तव्य केलंय. भारताने ५ मॅचेसची ही मालिका ३-१ अशी आधीच जिंकली आहे. त्यामुळे हॅमिलटनमध्ये होणाऱ्या शेवटच्या मॅचमध्ये भारतीय टीम काही प्रयोग करण्याची शक्यता नक्कीच आहे. पण परिस्थिती काय आहे, हे खेळाडूंना व्यवस्थित ठाऊक आहे, असं बहुतुले म्हणाले. "दोघेही खेळण्यासाठी पूर्णपणे तयार आहेत. पण टीम कॉम्बिनेशन आणि गरजेनुसार त्यांना प्रत्येक मॅचमध्ये संधी मिळेलच असं नाही. ही गोष्ट त्यांनाही नीट माहीत आहे. तरीही ते नेटने सराव करत मेहनत घेत आहेत. जेव्हा केव्हा संधी मिळेल, तेव्हा ते सर्वोत्तम परफॉर्मन्स देतील," असं मॅच संपल्यानंतर झालेल्या पत्रकार परिषदेत बहुतुले यांनी स्पष्ट केलं.

शेवटच्या टी-20 मध्ये किंवा आगामी वन-डे सीरिजमध्ये या दोघांना खेळण्याची संधी मिळेल, अशी आशाही त्यांनी व्यक्त केली. कुलदीप यादवचा भारतीय वन-डे टीममध्ये समावेश आहे. स्पिनर्सनी नेहमीच आक्रमक बॉलिंग करावी, असा टीमचा प्रयत्न असतो, असं बहुतुले यांनी सांगितलं. तसेच परिस्थितीनुसार रन रोखणं हासुद्धा आक्रमक खेळाचाच एक भाग असतो, याकडे त्यांनी लक्ष वेधलं. पॉवरप्लेमध्ये उत्तम बॉलिंग करणाऱ्या अक्षर पटेलच्या कामगिरीचंही त्यांनी कौतुक केलं.

तसेच, बॅटिंगसोबतच लेफ्ट आर्म स्पिनर असलेला अभिषेक शर्मा सध्या नेट्समध्ये बॉलिंगचा सराव करतोय. पण मॅचमध्ये त्याला बॉलिंग द्यायची की नाही, हा संपूर्णपणे कॅप्टनचा निर्णय असेल, असंही बहुतुले यांनी शेवटी स्पष्ट केलं.

Mumbai Indians : मुंबई इंडियन्सचा मोठा निर्णय; नवीन बॅटिंग, बॉलिंग आणि फिल्डिंग कोचची घोषणा

Karishma R — Fri, 30 Oct 2026 11:43:01 +0530

मुंबई : इंडियन प्रीमियर लीग २०२७ च्या हंगामापूर्वी मुंबई इंडियन्स संघाने आपल्या सपोर्ट स्टाफमध्ये मोठा फेरबदल केला आहे. फ्रँचायझीने आज नवीन बॅटिंग, बॉलिंग आणि फिल्डिंग कोचिंग स्टाफची अधिकृत घोषणा केली. पदमुक्त झालेल्या लसिथ मलिंगाच्या जागी न्यूझीलंडचा माजी वेगवान गोलंदाज आणि मुंबईचा माजी खेळाडू मिचेल मॅकक्लेनाघन आता संघाचा नवा बॉलिंग कोच असेल.

मुंबई इंडियन्सने बॅटिंग कोच पारस म्हाम्ब्रे यांच्या जागी भारताचा माजी फलंदाज रॉबिन उथप्पाची निवड केली आहे. फिल्डिंग कोच कार्ल हॉपकिन्सनच्या जागी भारतीय क्रिकेट टीमचे माजी फिल्डिंग कोच टी दिलीप यांच्याकडे जबाबदारी दिली आहे. यासोबतच मुंबईचा माजी गोलंदाज धवल कुलकर्णी याची डेव्हलपमेंट बॉलिंग कोच म्हणून नियुक्ती झाली आहे. मुख्य प्रशिक्षकपदी माहेला जयवर्धनेच्या जागी किरॉन पोलार्डची निवड झाल्यानंतर काही दिवसांतच हे मोठे बदल समोर आले आहेत.

Mumbai Indians today announced the appointment of Robin Uthappa as Batting Coach, Mitchell McClenaghan as Bowling Coach, T. Dilip as Fielding Coach and Dhawal Kulkarni as Development Bowling Coach for the upcoming IPL 2027 season. They will join Head Coach Kieron Pollard as part of a new-look coaching group that brings together a strong understanding of the Mumbai Indians culture, extensive international experience and a shared commitment to developing talent and delivering success. https://t.co/cA7yI5Khpk

— Mumbai Indians (@mipaltan) October 30, 2026

मुंबई इंडियन्सने कालच श्रीलंकेचा दिग्गज गोलंदाज लसिथ मलिंगासोबतचा प्रदीर्घ प्रवास संपल्याचे जाहीर केले होते. सुरुवातीला खेळाडू आणि नंतर सपोर्ट स्टाफ म्हणून मलिंगाने संघासाठी मोठे योगदान दिले. मुंबईच्या चार आयपीएल ट्रॉफी आणि २०११ च्या चॅम्पियन्स लीग टी-२० विजयात त्याची भूमिका अत्यंत महत्त्वाची होती. मुंबई इंडियन्सच्या इतिहासातील तो एक सर्वात प्रभावशाली खेळाडू राहिला आहे.

माजी बॅटिंग कोच पारस म्हाम्ब्रे यांचाही मुंबई इंडियन्ससोबत जुना संबंध आहे. २०१० ते २०१७ दरम्यान ते फ्रँचायझीचे मुख्य भाग होते. ऑक्टोबर २०२४ मध्ये भारतीय संघाचे बॉलिंग कोच पद सोडल्यानंतर ते पुन्हा मुंबई इंडियन्सच्या गोटात दाखल झाले होते.

Virat Kohli : ऑकलंड विमानतळावर विराट कोहलीची तुफान क्रेझ, चाहत्यांनी गराडा घातला

Karishma R — Fri, 30 Oct 2026 14:57:14 +0530

मुंबई : भारतीय क्रिकेट संघाचा स्टार फलंदाज विराट कोहली शुक्रवारी (३० ऑक्टोबर) न्यूझीलंडमधील ऑकलंड शहरात पोहोचला. विमानतळावर त्याच्या स्वागतासाठी शेकडो चाहत्यांनी तुफान गर्दी केली होती. तिथले दृश्य एअरपोर्टपेक्षा एखाद्या उत्साही उत्सवासारखे दिसत होते.

४ नोव्हेंबरपासून भारत आणि न्यूझीलंड यांच्यात ५ सामन्यांची वनडे मालिका सुरू होत आहे. मालिकेतील पहिला सामना ऑकलंडच्या ईडन पार्कवर रंगेल. त्यानंतर वेलिंग्टन (७ नोव्हेंबर), हॅमिल्टन (१० नोव्हेंबर) आणि माउंट माउंगानुईच्या बे ओव्हल येथे शेवटचे दोन सामने (१३ आणि १५ नोव्हेंबर) खेळवले जातील.

या मालिकेसाठी रोहित शर्मा आणि शुभमन गिल आधीच ऑकलंडला पोहोचले होते. त्यानंतर दुसऱ्या दिवशी विराट संघात सामील झाला. पहिल्या तीन वनडे सामन्यांमध्ये शुभमन गिल भारताचे नेतृत्व करणार आहे. मालिकेची तयारी सुरू करण्यासाठी गिल आणि रोहित यांनी नेट प्रॅक्टिसला सुरुवात केली आहे.

ऑकलंड विमानतळावर कोहलीची जबरदस्त क्रेझ

मालिकेला आठवड्यापेक्षा कमी वेळ उरला असताना, विराटच्या आगमनाने चाहत्यांमध्ये वेगळाच उत्साह पाहायला मिळाला. शुक्रवारी सकाळी जेव्हा विराट ऑकलंड आंतरराष्ट्रीय विमानतळावर उतरला, तेव्हा चाहत्यांनी त्याला पाहण्यासाठी पहाटेपासूनच गर्दी केली होती.

सोशल मीडिया व्यासपीठ 'X' वर (पूर्वीचे ट्विटर) एक व्हिडिओ प्रचंड व्हायरल झाला आहे. यामध्ये ३७ वर्षांचा विराट विमानतळाच्या अरrival गेटवरून बाहेर पडताना दिसतोय आणि त्याच्याभोवती चाहत्यांचा मोठा वेढा आहे. फोटो आणि ऑटोग्राफ घेण्यासाठी चाहते त्याच्या जवळ जाण्याचा प्रयत्न करत होते.

The love and craze for Virat Kohli in Auckland. https://t.co/341dbTUEU8

— Mufaddal Vohra (@mufaddal_vohra) October 30, 2026

या गर्दीत एका महिला चाहतीने विराटकडे ऑटोग्राफसाठी सतत विनंती केली. विराटने आधी तिला शांत राहण्यास सांगितले आणि नंतर तिच्या पोस्टरवर स्वाक्षरी केली. ही चाहती विराटाला भेटण्यासाठी दोन दिवसांपासून विमानतळावर वाट पाहत होती. ऑटोग्राफ मिळाल्यानंतर ती भावूक झाली.

The Most Lovable Cricketer in the World @imVkohli ❤️ https://t.co/0ctB47OUNT

— NotoriousVK (@Notorious_VK18) October 30, 2026

विमानातून बाहेर आल्यापासून ते टर्मिनल सोडेपर्यंत सुरक्षा रक्षक विराटच्या सोबत होते. गर्दी खूप जास्त असल्याने सुरक्षा कर्मचाऱ्यांना परिस्थिती हाताळताना मोठी कसरत करावी लागली.

न्यूझीलंडला जाण्यापूर्वी विराटने मुंबईतील ब्रेबॉर्न स्टेडियमवर कसून सराव केला होता. तिथून तो थेट ऑकलंडला भारतीय संघात सामील होण्यासाठी रवाना झाला.

न्यूझीलंडमध्ये विराट कोहलीचा वनडे रेकॉर्ड कसा आहे?

T20 आणि कसोटी क्रिकेटमधून निवृत्ती घेतल्यानंतर विराटचे पूर्ण लक्ष आता फक्त वनडे क्रिकेटवर आहे. दक्षिण आफ्रिका, झिम्बाब्वे आणि नामिबिया येथे संयुक्तपणे होणाऱ्या २०२७ च्या विश्वचषकापर्यंत खेळण्याचा त्याचा मानस आहे.

कसोटीतून निवृत्ती घेतल्यानंतर विराटने ऑस्ट्रेलिया, दक्षिण आफ्रिका, न्यूझीलंड, इंग्लंड, अफगाणिस्तान आणि वेस्ट इंडिजविरुद्धच्या सर्व वनडे मालिका खेळल्या आहेत. आता तो न्यूझीलंडविरुद्धच्या मालिकेसाठी सज्ज झाला आहे.

5 am IST - Arrived in New Zealand.

10 am IST - Started the practice in New Zealand.

VIRAT KOHLI FOR YOU - The success of his career https://t.co/nNVjEvULD4

— Johns. (@CricCrazyJohns) October 30, 2026

न्यूझीलंडच्या भूमीवर विराटचा वनडे रेकॉर्ड उत्तम राहिला आहे. त्याने १३ सामन्यांमध्ये ४९.६६ च्या सरासरीने ५९६ धावा केल्या आहेत, ज्यामध्ये १ शतक आणि ४ अर्धशतकांचा समावेश आहे. न्यूझीलंडमध्ये भारतासाठी वनडेत सर्वाधिक धावा करण्याचा सचिन तेंडुलकरचा (८२१ धावा) रेकॉर्ड मोडण्यासाठी विराटला आता फक्त २२६ धावांची गरज आहे.

एकंदरीत न्यूझीलंडविरुद्ध विराटची आकडेवारी थक्क करणारी आहे. त्याने ३६ वनडे सामन्यांमध्ये ५७.४८ च्या सरासरीने १८९७ धावा केल्या आहेत. यात ७ शतके आणि १० अर्धशतके आहेत. न्यूझीलंडविरुद्ध वनडेत सर्वाधिक धावा करणारा तो एकमेव भारतीय फलंदाज आहे. त्याने सचिन तेंडुलकरचा (१७५० धावा) रेकॉर्ड आधीच मागे टाकला आहे.

IPL 2025 : रोहित शर्मा पुन्हा मुंबई इंडियन्सचा कर्णधार होणार? हार्दिक पांड्याचे काय होणार?

Karishma R — Fri, 30 Oct 2026 16:15:52 +0530

मुंबई : आगामी आयपीएल हंगामात रोहित शर्मा पुन्हा एकदा मुंबई इंडियन्सची कमान हाती घेण्याची शक्यता आहे. गेल्या मोसमातील खराब कामगिरीनंतर फ्रँचायझी व्यवस्थापन संघात मोठे बदल करण्याच्या तयारीत आहे. याच पार्श्वभूमीवर रोहितकडे पुन्हा कर्णधारपद सोपवले जाऊ शकते, असा दावा 'द इंडियन एक्स्प्रेस'च्या रिपोर्टमध्ये करण्यात आला आहे.

गेल्या हंगामाच्या मध्यघातच हार्दिक पांड्याला हटवून रोहित शर्माकडे कर्णधारपद देण्याचा प्रयत्न मुंबई इंडियन्सने केला होता. हार्दिकच्या नेतृत्वाखाली संघाने १४ पैकी १० सामने गमावले होते आणि गुणतालिकेत नववे स्थान मिळवले होते. यामुळे मुंबईची ट्रॉफीची वाट पाहावी लागण्याचा काळ आता सहा वर्षांचा झाला आहे. सूर्यकुमार यादव आणि जसप्रीत बुमराह हे दिग्गज संघात असतानाच, भविष्यातील कर्णधार म्हणून युवा फलंदाज टिळक वर्माच्या नावाचाही विचार झाला होता. रोहितने स्वतः सुरुवातीला टिळक वर्माचे नाव सुचवले होते, मात्र मॅनेजमेंटने रोहितलाच पुन्हा संघाचे नेतृत्व करण्याची विनंती केली. शेवटी रोहितने ही विनंती मान्य केल्याचे समजते.

रोहित शर्मा पुन्हा कर्णधार झाल्यास हार्दिक पांड्याच्या मुंबई इंडियन्स मधील भविष्यावर प्रश्नचिन्ह निर्माण झाले आहे. पांड्याला दुसऱ्या संघात ट्रेड करण्याची शक्यता नाकारता येत नाही. पण जर ट्रेड झाला नाही, तर हार्दिक रोहितच्या नेतृत्वाखाली खेळण्यास तयार झाल्याचेही या रिपोर्टमध्ये म्हटले आहे. २०२४ च्या मोसमापूर्वी गुजरात टायटन्सकडून हार्दिकला आणून कर्णधार बनवण्याच्या निर्णयाला चाहत्यांनी जोरदार विरोध केला होता. मुंबईच्या वानखेडे स्टेडियमवर हार्दिकला चाहत्यांच्या हुसकावण्याचाही सामना करावा लागला होता.

दरम्यान, आगामी हंगामासाठी मुंबई इंडियन्सच्या सपोर्ट स्टाफचीही घोषणा करण्यात आली आहे. माजी मुख्य प्रशिक्षक माहेला जयवर्धने यांच्याऐवजी आता केरोन पोलार्ड मुख्य प्रशिक्षक असेल. मुंबईचा माजी खेळाडू रॉबिन उथप्पा फलंदाजी प्रशिक्षक तर न्यूझीलंडचा माजी वेगवान गोलंदाज मिचेल मॅकक्लेनाघन गोलंदाजी प्रशिक्षक म्हणून जबाबदारी सांभाळेल. याशिवाय भारताचे माजी क्षेत्ररक्षण प्रशिक्षक टी. दिलीप यांची क्षेत्ररक्षण प्रशिक्षकपदी आणि धवल कुलकर्णी यांची डेव्हलपमेंट बॉलिंग कोच म्हणून नियुक्ती करण्यात आली आहे.

Rohit Sharma : रोहित शर्माची नजर वर्ल्ड कपवर; मुंबई इंडियन्सची कॅप्टन्सी घेणं योग्य ठरेल का?

Karishma R — Sat, 31 Oct 2026 14:10:25 +0530

मुंबई : हार्दिक पांड्याची एन्ट्री आणि कॅप्टन्सीची मागणी. त्यानंतर रोहित शर्माला मुंबई इंडियन्सच्या कर्णधारपदावरून हटवण्यात आलं. इथं या कथेचा पहिला भाग संपतो. दुसऱ्या भागाची सुरुवात होते ती रोहितच्या नेतृत्वात भारताने जिंकलेल्या २०२४ च्या टी-२० वर्ल्ड कपपासून. त्यानंतर २०२५ मध्ये चॅम्पियन्स ट्रॉफीचं टार्गेट आहे.

एकीकडे रोहितची कॅप्टन्सी ऐतिहासिक ठरली, तर दुसरीकडे तगडी टीम असूनही हार्दिक पांड्या कॅप्टन म्हणून फ्लॉप ठरला. सलग दोन-तीन सीझन टीम पॉईंट्स टेबलमध्ये तळाला राहिली. अखेर मॅनेजमेंटने रोहितला पुन्हा कॅप्टन्सी घेण्याची विनंती केली. मग पुढे काय होतं?

मुंबई इंडियन्सचा कोचिंग स्टाफ पूर्णपणे बदलला जातोय. पोलार्ड, उथप्पा, मॅक्लेनघन, कुलकर्णी आणि टी. दिलीप हे सगळे रोहितच्या मर्जीतले लोक आले. जर ट्रेड शक्य झाला नाही, तर रोहितच्या अंडर खेळायला हार्दिकनेही होकार दिलाय. जणू काही काळाने सगळं चक्र फिरवलंय. एकदम सिनेमासारखी स्टोरी!

मैदानाबाहेर मुंबई इंडियन्समध्ये जे काही घडलं, ते एखाद्या सस्पेन्स थ्रिलरपेक्षा कमी नाही. अजून अधिकृत घोषणा झालेली नाही, पण २०२७ च्या आयपीएलमध्ये रोहितच मुंबईचं नेतृत्व करेल, असे स्पष्ट संकेत आहेत. इथं रोहितचं वय किंवा त्याच्या क्षमतेवर शंका घेण्याचा प्रश्नच नाही. पण त्याला पुन्हा कॅप्टन बनवण्याचा निर्णय खरंच योग्य आहे का, याचा विचार व्हायला हवा.

२०२७ चा आयपीएल सीझन येईल, तेव्हा रोहित ४० वर्षांचा झालेला असेल. तो मुंबईच्या जर्सीत आणखी किती काळ दिसेल, याची शाश्वती नाही. टीम अडचणीत असताना हा फक्त एक तात्पुरता उपाय (शॉर्ट टर्म सोल्युशन) आहे का? पण मॅनेजमेंटने इथं वेगळाच विचार केलाय.

हार्दिकच्या नेतृत्वात आता टीम खेळणार नाही, हे मॅनेजमेंटने पक्कं केलंय. मग पर्याय कोण? भारताला २०२६ चा टी-२० वर्ल्ड कप जिंकून देणारा सूर्यकुमार यादव, जसप्रीत बुमराह, मिचेल सँटनर आणि भविष्यातला स्टार मानला जाणारा तिलक वर्मा असे अनेक पर्याय आहेत.

सध्या देशांतर्गत क्रिकेटमध्येही सूर्याला फारशी संधी मिळत नाहीये. बुमराहला सतत दुखापतींचा त्रास असतो. सँटनर परदेशी खेळाडू असल्याने तो प्रत्येक मॅच खेळेलच याची गॅरंटी नाही. मुंबईच्या भविष्याचा विचार केला, तर तिलक वर्मा हा सर्वात योग्य पर्याय ठरतो. तो सध्या भारताच्या टी-२० टीमचा व्हाईस कॅप्टनही आहे. खुद्द रोहितनेही मॅनेजमेंटला तिलकचं नाव सुचवलं होतं, पण मॅनेजमेंट त्यासाठी तयार झाली नाही.

यामागे काही कारणं आहेत. मुंबई इंडियन्स ही आयपीएलमधली सर्वात स्टार खेळाडूंनी भरलेली टीम आहे. टीममध्ये बहुतांश सीनियर खेळाडू आहेत. रोहितला हटवून हार्दिकला कॅप्टन केल्यावर गेल्या तीन सीझनमध्ये काय राडा झाला, हे आपण पाहिलंच आहे. पाच वेळा चॅम्पियन असलेल्या फ्रँचायझीसाठी तीच चूक पुन्हा करणं नामुष्कीचं ठरेल.

रोहित पुन्हा कॅप्टन म्हणून आल्यावर हे सगळे वाद मॅनेजमेंटला सहज मिटवता येतील. कदाचित रोहित फक्त २०२७ च्या सीझनसाठीच कॅप्टन असेल. कारण २०२८ च्या सीझनआधी मेगा ऑक्शन होणार आहे. ऑक्शनमधून टीम नव्याने बांधता येईल आणि नवा कॅप्टनही शोधता येईल. रोहितकडे सध्या 'शॉर्ट टर्म क्रायसिस मॅनेजर' म्हणून पाहिलं जातंय. जर तिलक भविष्यातला कॅप्टन असेल, तर रोहित त्याला चांगल्या प्रकारे तयार (ग्रूम) करू शकतो.

पण हा निर्णय रोहितसाठी खरंच फायद्याचा आहे का? करिअरच्या शेवटच्या टप्प्यात असलेल्या रोहितचं अंतिम ध्येय काय आहे, हे अगदी स्पष्ट आहे. त्याचं टार्गेट २०२७ चा वनडे वर्ल्ड कप आहे, २०२७ चं आयपीएल नाही. गेल्या आयपीएलमध्ये रोहितला हॅमस्ट्रिंगची दुखापत झाली होती. त्यामुळे काही मॅचेस हुकल्या आणि नंतर तो 'इम्पॅक्ट प्लेयर' म्हणून खेळला.

रोहितने टी-२० आणि टेस्ट क्रिकेटमधून निवृत्ती घेतली आहे. त्यामुळे दोन वनडे सिरीजमध्ये त्याला चांगला ब्रेक मिळतो. वर्कलोड कमी झाल्याने दुखापतीचा धोकाही कमी झालाय. पण आयपीएलचा विचार केला, तर अवघ्या दोन महिन्यांत १४ ते १७ मॅचेस खेळाव्या लागतात. कॅप्टन झाल्यावर त्याला 'इम्पॅक्ट प्लेयर' म्हणूनही खेळता येणार नाही. सलग मॅचेस खेळल्यामुळे रोहितच्या फिटनेसवर परिणाम होईल का, हीच मोठी चिंता आहे.

२०२७ चा वनडे वर्ल्ड कप ऑक्टोबरच्या पहिल्या आठवड्यात सुरू होईल. आणि आयपीएल मे महिन्यात संपण्याची शक्यता आहे. मध्ये फक्त चार महिन्यांचा गॅप असेल. जर या काळात रोहितला एखादी गंभीर दुखापत झाली, तर वर्ल्ड कप जिंकण्याचं त्याचं मोठं स्वप्न अधुरंच राहू शकतं.

Women's Premier League: WPL मध्ये वाढणार टीम्सची संख्या? BCCI चे मोठे संकेत

vivek panmand — Thu, 29 Oct 2026 22:23:19 +0530

Women's Premier League News: वुमेन्स प्रीमियर लीगमध्ये (WPL) टीम्सची संख्या वाढवण्यावर बीसीसीआय (BCCI) विचार करत आहे. बीसीसीआयचे सचिव देवजित सैकिया (BCCI Secretary Devajit Saikia) यांनी सांगितलं की, पुढच्या वर्षापासून यावर चर्चा सुरू होऊ शकते. २०२३ मध्ये पाच टीम्ससोबत या महिला टी-२० लीगची सुरुवात झाली होती. अवघ्या चार वर्षांत या लीगने महिला क्रिकेटमध्ये आपली एक वेगळी ओळख निर्माण केली आहे. आता बीसीसीआय या लीगला आणखी मोठं करण्याच्या तयारीत आहे. बुधवारी झालेल्या WPL च्या मिनी-ऑक्शनदरम्यान स्पर्धेच्या अधिकृत वेबसाईटला दिलेल्या मुलाखतीत सैकिया म्हणाले की, पुढच्या वर्षापासून लीगच्या भविष्यावर सविस्तर चर्चा करणं गरजेचं आहे. फक्त टीम्स वाढवणं नाही, तर स्पर्धेच्या इतर गोष्टींमध्येही सुधारणा करण्यावर लक्ष दिलं जाईल.

भविष्यात WPL मध्ये मॅचेस वाढणार

WPL बद्दल बोलताना बीसीसीआय सचिव म्हणाले, 'पुढच्या वर्षापासून टीम्सची संख्या वाढवण्यासोबतच इतर कोणत्या गोष्टींमध्ये सुधारणा करता येईल, यावर आम्हाला सविस्तर चर्चा करावी लागेल.' ते पुढे म्हणाले की, ही चर्चा फक्त क्रिकेटर्सपुरती मर्यादित नसेल. कोच, सिलेक्टर्स आणि स्पर्धेशी जोडलेल्या इतर स्टेकहोल्डर्सचाही यात विचार केला जाईल. बीसीसीआय सचिवांनी या लीगच्या प्रगतीवर समाधान व्यक्त केलं. त्यांच्या मते, आयपीएलनंतर फ्रँचायझी क्रिकेटमधील ही सर्वात मोठी स्पर्धा बनली आहे. सैकिया म्हणाले, 'आयपीएलनंतर WPL ही फ्रँचायझी क्रिकेटमधील सर्वात मोठी लीग आहे. चार वर्षांत आपण खूप मोठा पल्ला गाठला आहे. आज भारतीय महिला क्रिकेट जगात दबदबा निर्माण करत आहे. देशाच्या महिला क्रिकेटच्या यशामध्ये WPL चं खूप मोठं योगदान आहे.'

महिला क्रिकेटची प्रगती

WPL मुळे भारतीय खेळाडूंना जगातील टॉप क्रिकेटर्ससोबत एकाच टीममध्ये खेळण्याची संधी मिळत आहे. यासोबतच, टॅलेंटेड युवा खेळाडूंना स्वतःला सिद्ध करण्यासाठी एक उत्तम प्लॅटफॉर्म मिळाला आहे. टीम्सची संख्या वाढल्यास आणखी भारतीय खेळाडूंना फ्रँचायझींसोबत करार करण्याची संधी मिळेल. इंटरनॅशनल स्टार्ससोबत खेळण्याचा अनुभव मिळण्यासोबतच स्पर्धात्मक क्रिकेटमध्ये स्वतःला सिद्ध करण्याची संधीही त्यांच्यासाठी वाढेल. मात्र, सध्या तरी WPL मध्ये टीम्स वाढवण्याबाबत बीसीसीआयने कोणताही अंतिम निर्णय घेतलेला नाही. सैकिया यांच्या बोलण्यातून हे स्पष्ट होतंय की, पुढच्या वर्षापासून या शक्यतेवर चर्चा सुरू होऊ शकते. नवीन टीम्स जोडण्यापूर्वी बोर्डाला स्पर्धेचं स्वरूप आणि आवश्यक इन्फ्रास्ट्रक्चरचाही सविस्तर आढावा घ्यावा लागेल.

IPL 2027 : रॉबिन उथप्पा मुंबई इंडियन्सचा नवा बॅटिंग कोच, पोलार्डकडे मुख्य प्रशिक्षकपद

Chanda Mandavkar — Fri, 30 Oct 2026 13:59:37 +0530

मुंबई : आगामी २०२७ च्या आयपीएल सीझनमध्ये कशाही परिस्थितीत ट्रॉफी जिंकायचीच, असा निर्धार मुंबई इंडियन्सने केला आहे. यासाठी फ्रँचायझीने आपल्या कोचिंग स्टाफमध्ये मोठे बदल केले आहेत. मुख्य प्रशिक्षक माहेला जयवर्धने यांनी आधीच आपल्या पदाचा राजीनामा दिला होता. त्यानंतर आता सहाय्यक प्रशिक्षकांनीही मार्ग मोकळा केला आहे. फ्रँचायझीने शुक्रवारी अधिकृत घोषणा करत भारताचा माजी सलामीवीर रॉबिन उथप्पाची टीमच्या नव्या बॅटिंग कोचपदी नियुक्ती केली आहे.

टीमचे बॅटिंग कोच असलेले कायरन पोलार्ड आता मुख्य प्रशिक्षक म्हणून जबाबदारी सांभाळणार आहेत. श्रीलंकेचे माजी दिग्गज खेळाडू माहेला जयवर्धने बाजूला झाल्यानंतर पोलार्डकडे ही कमान सोपवण्यात आली. आयपीएल २०२६ मध्ये मुंबई इंडियन्सची कामगिरी अत्यंत सुमार राहिली होती. १४ मॅचेसमध्ये टीमला फक्त चारच विजय मिळवता आले आणि पॉइंट्स टेबलमध्ये संघ नवव्या क्रमांकावर फेकला गेला. या खराब कामगिरीनंतर मॅनेजमेंटने सपोर्ट स्टाफ बदलण्याचा निर्णय घेतला. याचाच भाग म्हणून पोलार्ड यांच्याकडील बॅटिंग कोचची धुरा आता उथप्पाकडे आली आहे.

'पलटण'मध्ये रॉबिन उथप्पाचे पुनरागमन; मुंबई इंडियन्सकडून जंगी स्वागत

रॉबिन उथप्पाचे स्वागत करताना मुंबई इंडियन्सने सोशल मीडिया प्लॅटफॉर्म X वर खास पोस्ट शेअर केली आहे. फ्रँचायझीने लिहिले, "आमच्या पहिल्या सीझनचा भाग असलेला खेळाडू, दांडगा अनुभव सोबत घेऊन पुन्हा टीममध्ये परतला आहे! रॉबिनला खेळाची उत्तम समज आहे. खेळाडूंशी संवाद साधण्याचे कौशल्य आणि युवा खेळाडूंना मार्गदर्शन करण्याची त्याची पद्धत खूप स्पष्ट आहे. आमचा नवा बॅटिंग कोच रॉबिन, तुझे पलटणमध्ये पुन्हा स्वागत आहे!"

मुंबई इंडियन्सचा नवा कोचिंग स्टाफ कसा आहे?

नवे हेड कोच कायरन पोलार्ड यांच्या नेतृत्वाखाली मुंबई इंडियन्सने आपल्या कोचिंग टीममध्ये अनेक दिग्गज नावांचा समावेश केला आहे.

बॅटिंग कोच: रॉबिन उथप्पा

बॉलिंग कोच: मिचेल मॅकक्लेनघन

फिल्डिंग कोच: टी. दिलीप

डेव्हलपमेंट बॉलिंग कोच: धवल कुलकर्णी

मुख्य प्रशिक्षक: कायरन पोलार्ड

या नव्या निवडीपूर्वी गुरुवारीच फ्रँचायझीने जुन्या कोचिंग स्टाफला निरोप दिला होता. बॉलिंग कोच लसित मलिंगा आणि पारस म्हाम्ब्रे यांच्यासह फिल्डिंग कोच कार्ल हॉपकिन्सन पुरुषांच्या टीममधून बाहेर पडले आहेत. मुंबई इंडियन्सचे माजी खेळाडू आणि आंतरराष्ट्रीय स्तरावर कोचिंगचा अनुभव असलेल्या दिग्गजांना एकत्र आणून ही नवी टीम तयार करण्यात आली आहे.

रॉबिन उथप्पाचा आयपीएलमधील रेकॉर्ड:

२००७ मध्ये टी-२० वर्ल्ड कप जिंकणाऱ्या भारतीय टीमचा रॉबिन उथप्पा महत्त्वाचा भाग होता. २००८ च्या पहिल्यावहिल्या आयपीएल सीझनमध्ये तो मुंबई इंडियन्सकडूनच मैदानात उतरला होता. आता तो पुन्हा त्याच टीमचा कोच बनला आहे. आपल्या आयपीएल करिअरमध्ये उथप्पाने एकूण सहा फ्रँचायझींचे प्रतिनिधित्व केले असून १७७ मॅचेसमध्ये ४,४११ रन्स केले आहेत. १३०.५० च्या स्ट्राईक रेटने खेळताना त्याने २४ हाफ सेंच्युरी ठोकल्या आहेत.

२०१४ च्या आयपीएलमध्ये कोलकाता नाईट रायडर्स (KKR) कडून खेळताना उथप्पाने ६६० रन्स करत 'ऑरेंज कॅप' पटकावली होती. त्या वर्षी केकेआरला चॅम्पियन बनवण्यात त्याचा मोठा वाटा होता. याशिवाय २०२१ मध्ये चेन्नई सुपर किंग्जसोबत (CSK) त्याने आयपीएल ट्रॉफी जिंकली होती. सप्टेंबर २०२२ मध्ये त्याने आयपीएलमधून निवृत्ती जाहीर केली होती.

मिचेल मॅकक्लेनघनकडे बॉलिंग कोचची कमान

न्यूझीलंडचा माजी वेगवान गोलंदाज मिचेल मॅकक्लेनघन पुन्हा एकदा मुंबई इंडियन्ससोबत जोडला गेला आहे. २०१५ ते २०२० या काळात तो मुंबईकडून खेळला होता. या काळात मुंबईने २०१५, २०१७, २०१९ आणि २०२० मध्ये आयपीएल ट्रॉफ्या जिंकल्या, तेव्हा मॅकक्लेनघन टीमचा मुख्य बॉलर होता. आता तो बॉलिंग कोच म्हणून जबाबदारी पार पाडेल.

टीम इंडियाचे माजी कोच टी. दिलीप आता फिल्डिंग कोच

भारतीय क्रिकेट टीमचे फिल्डिंग कोच म्हणून यशस्वी काम केलेले टी. दिलीप आता मुंबई इंडियन्सचे फिल्डिंग कोच असतील. टीम इंडियाने २०२४ आणि २०२६ चा टी-२० वर्ल्ड कप, तसेच २०२५ ची आयसीसी चॅम्पियन्स ट्रॉफी जिंकली, तेव्हा दिलीप कोचिंग स्टाफमध्ये होते. त्यांच्या अनुभवाचा फायदा मुंबईच्या खेळाडूंचे क्षेत्ररक्षण सुधारण्यासाठी होईल.

युवा बॉलर्सला घडवणार धवल कुलकर्णी

मुंबई इंडियन्सकडून २०१३ आणि २०२० मध्ये आयपीएल ट्रॉफी जिंकणारा मुंबईकर धवल कुलकर्णी पुन्हा एकदा टीममध्ये परतला आहे. त्याने २००८ ते २०१३ आणि २०२०-२१ दरम्यान मुंबईचे प्रतिनिधित्व केले होते. डेव्हलपमेंट बॉलिंग कोच म्हणून धवलवर भारतातील युवा फास्ट बॉलर्सना मार्गदर्शन करण्याची आणि त्यांना घडवण्याची मोठी जबाबदारी असेल.

Smriti Mandhana Harmanpreet Kaur: स्मृती-हरमनप्रीतमध्ये वाद? हस्तांदोलन टाळल्याचा व्हिडीओ व्हायरल

vivek panmand — Thu, 29 Oct 2026 23:30:54 +0530

बुधवार, २८ ऑक्टोबरला वडोदराच्या कोट्टंबी स्टेडियमवर भारतीय महिला संघाने झिम्बाब्वेचा ८ विकेट्सने धुव्वा उडवला. पण या सामन्यानंतर टीम इंडियाची कॅप्टन स्मृती मंधाना आणि माजी कॅप्टन हरमनप्रीत कौर यांच्यात वाद असल्याच्या चर्चांना पुन्हा एकदा तोंड फुटलंय.

टी-२० मालिकेत ३-० ने क्लीन स्वीप दिल्यानंतर, भारतीय संघाने एकदिवसीय मालिकेतही झिम्बाब्वेला ३-० ने लोळवलं. १३२ धावांचं टार्गेट टीम इंडियाने अवघ्या १७ षटकांत पूर्ण केलं. ओपनर प्रतिका रावल (५९) आणि शेफाली वर्मा (५१) यांनी तिसऱ्या विकेटसाठी ७४ धावांची नाबाद पार्टनरशिप करत संघाला दणदणीत विजय मिळवून दिला.

या मॅचमध्ये वैष्णवी शर्माने कमाल केली. तिने १० षटकांत ३.९ च्या इकॉनॉमी रेटने फक्त ३९ धावा देत ५ विकेट्स काढल्या. तिच्या या भन्नाट स्पेलमुळे झिम्बाब्वेचा संघ ३९.५ षटकांत अवघ्या १३१ धावांवर ऑलआऊट झाला.

हरमनप्रीत आणि स्मृतीचा तो व्हिडीओ व्हायरल

झिम्बाब्वेला व्हाईटवॉश दिल्यानंतर सेलिब्रेशन करतानाचा एक व्हिडीओ सध्या सोशल मीडियावर तुफान व्हायरल होतोय. कॅप्टन बदलल्यानंतर टीममधलं वातावरण कसंय, यावर या व्हिडीओमुळे पुन्हा एकदा चर्चा सुरू झालीये.

एक्स (पूर्वीचं ट्विटर) वर व्हायरल झालेल्या या व्हिडीओमध्ये, वडोदरामध्ये न्यूझीलंडविरुद्धच्या आणखी एका दमदार सामन्यानंतर कॅप्टन स्मृती मंधाना आपल्या टीममधल्या खेळाडूंशी हस्तांदोलन करताना दिसतेय.

पण, जेव्हा माजी कॅप्टन हरमनप्रीत कौरचा नंबर आला, तेव्हा स्मृतीने तिच्याशी हस्तांदोलन न करताच पुढच्या खेळाडूकडे मोर्चा वळवला. स्मृती दुसरीकडेच बघत असल्याने हरमनप्रीतलाही तिच्याशी हस्तांदोलन करता आलं नाही, असं या व्हिडीओत स्पष्ट दिसतंय.

No handshake between Harman and Smriti ❌ https://t.co/Xgq79pnUbq

— RCB Xtra (@Rcb_Xtra) October 29, 2026

झिम्बाब्वेविरुद्धच्या या तीन सामन्यांच्या मालिकेत स्मृती मंधानाची बॅट फारशी चालली नाही. तिने दोन डावांत १६ च्या सरासरीने फक्त ३२ धावा केल्या. जपानमध्ये झालेल्या एशियन गेम्समध्ये टीम इंडियाला सुवर्णपदक जिंकून दिल्यानंतर हरमनप्रीत कौरने कॅप्टनशिप सोडली होती. त्यानंतर स्मृतीकडे संघाची धुरा सोपवण्यात आली.

याआधी २० ऑक्टोबरला रायपूरमध्ये झालेल्या झिम्बाब्वेविरुद्धच्या तिसऱ्या टी-२० सामन्यानंतरही असाच प्रकार घडला होता. त्यावेळीही भारताने ३-० ने मालिका जिंकली होती आणि स्मृती-हरमनप्रीतने एकमेकींशी हस्तांदोलन टाळल्याचं दिसून आलं होतं.

'सगळं ठीक आहे ना?': फॅन्सचा सवाल

स्मृती आणि हरमनप्रीतच्या या वागण्यामुळे सोशल मीडियावर, विशेषतः एक्सवर मोठी चर्चा सुरू झालीये. या दोन दिग्गज क्रिकेटपटूंमध्ये सगळं काही आलबेल आहे ना, असा प्रश्न फॅन्स विचारत आहेत.

काही फॅन्सच्या मते हा दोघींमधल्या वादाचा पुरावा आहे. तर काहींनी या गोष्टीचा जास्त बाऊ करू नका, हे चुकूनही झालं असू शकतं, असं म्हटलंय. काहींनी तर हरमनप्रीतच्या कॅप्टनशिप सोडण्याशी या घटनेचा संबंध जोडलाय. कॅप्टन बदलल्यामुळे या दोघींच्या मैत्रीत फूट पडलीये का, अशीही चर्चा रंगलीये.

काही फॅन्सनी तर थेट एमएस धोनी आणि विराट कोहलीच्या उदाहरणाचा दाखला दिलाय. धोनीने ज्याप्रमाणे विराटला कॅप्टनशिप सोपवली, तसाच आदर इथेही दिसायला हवा होता, असं फॅन्सचं म्हणणं आहे.

Smriti is non controversial and comes across as a good person. Same with Mithali. But Harmanpreet has a problem with both. Also, her behavior, antics, and her fake certificate scandal, telling English cricketers that Punjabi is India's National Language... Says a lot about her.

— Prakash (@Prakash1049) October 29, 2026

Clear rift.

— D. (@dkhive102) October 29, 2026

The rift is crystal clear!

— Cricketing Polls (@VSPatankar) October 29, 2026

@Rcb_Xtra They've probably shook hands before..

— Koutuk J. Vankar (@kOutuk_art) October 29, 2026

@Rcb_Xtra Don’t read too much into it. Don’t think it was intentional. Anyways, if Harman could drop mithali at that point, and she also had to relinquish captaincy at one point, Harman shouldn’t be feeling bitter about the same. Also, she is ageing, we needed a newer captain.

— Stavya Sharma (@stavya_sharma) October 29, 2026

@Rcb_Xtra Harman thinks she can stay captain for years to come. What about passing of torch. Every player has it's time , one have to let go.

— subhankar haldar (@subhankarhaldar) October 29, 2026

@__Ladyybird__ I even noticed this when Harman took a catch in Vyshnavi's bowling.

— Radhika Deshikachar (@sirfsapnadekho) October 29, 2026

@__Ladyybird__ This really does nothing to dispel the stereotypes of women in professional sport.

— QI CRICKET (@QICricket) October 29, 2026

Everything okay between Smriti and Harman? https://t.co/y1tgumvEoD

— Fan RCBians (@RcbianOfficial) October 29, 2026

Smriti before the start of her captaincy said “I will be Players captain” and this how a players captain treat their player ?

Put some respect to former captain because it only shows how small a person smriti is

— Payal (@cricupdatesss) October 29, 2026

everything is not okay https://t.co/vWRyEID5eN

— Mr. Saif Khan (@Mr_Saif__Khan) October 29, 2026

There was no handshake between Smriti Mandhana and Harmanpreet Kaur. Is everything alright??

https://t.co/lElZfqdj06

— cheekufied (@kohliiix18) October 29, 2026

@Rcb_Xtra What’s wrong with harmanpreet Kaur she want to be Indian captain forever and no one other deserves to lead team India

— Capt.kamal (@Captkamal2) October 29, 2026

@Rcb_Xtra Don’t tell me it’s mere a coincidence and no rift in the camp. That’s why @msdhoni is regarded as finest cricketer who passed the bastion seamlessly to @imVkohli and served ICT. Yet to see similar transition

— Ravi Soni (@theravi_soni) October 29, 2026

असं असलं तरी, स्मृती मंधाना किंवा हरमनप्रीत कौर या दोघींपैकी कुणीही यावर अद्याप कोणतीही प्रतिक्रिया दिलेली नाही. फक्त एका व्हायरल व्हिडीओवरून त्यांच्यात वाद असल्याचं ठामपणे सांगता येणार नाही. आता बीसीसीआय किंवा टीम मॅनेजमेंट यावर काही स्पष्टीकरण देतं का, हे पाहणं महत्त्वाचं ठरेल.

टीम इंडिया आता डिसेंबर २०२६ मध्ये दक्षिण आफ्रिकेच्या दौऱ्यावर जाणार आहे. या दौऱ्यात एक कसोटी, तीन एकदिवसीय आणि तीन टी-२० सामन्यांची मालिका खेळवली जाणार आहे.

Ravindra Jadeja: रवींद्र जडेजाची वनडे करिअर संपली का? पुजारा आणि नायर यांचं मोठं वक्तव्य

vivek panmand — Sat, 31 Oct 2026 18:53:54 +0530

मुंबई: भारतीय अष्टपैलू खेळाडू रवींद्र जडेजाच्या वनडे करिअरबाबत माजी क्रिकेटपटू चेतेश्वर पुजारा आणि अभिषेक नायर यांनी मोठी प्रतिक्रिया दिली आहे. न्यूझीलंडविरुद्धच्या ५ सामन्यांच्या वनडे सीरिजमधून ३७ वर्षीय जडेजाला वगळण्यात आलं असून, त्याच्या जागी अक्षर पटेलला संधी मिळाली आहे. पुढच्या वर्षी होणाऱ्या वनडे वर्ल्ड कपला फक्त एक वर्ष उरलं असताना, जडेजाला सतत बाहेर ठेवणं हे त्याच्या वनडे करिअरच्या शेवटाचे संकेत असू शकतात, असं पुजारा म्हणाला. तर दुसरीकडे, जडेजा टीममध्ये कायम राहील, असा विश्वास अभिषेक नायरने व्यक्त केला आहे.

चेतेश्वर पुजारा म्हणाला, "जर टीम मॅनेजमेंटला रवींद्र जडेजाला वनडेमध्ये ठेवायचं असतं, तर त्यांनी नक्कीच त्याला या सीरिजमध्ये घेतलं असतं. सध्या मुख्य अष्टपैलू खेळाडू म्हणून अक्षर पटेलला जास्त संधी दिल्या जात आहेत. जडेजाचं वय पाहता, त्याने आता फक्त टेस्ट क्रिकेटवर लक्ष केंद्रित करावं आणि व्हाईट बॉल क्रिकेटमध्ये त्याचा विचार केला जाणार नाही, हे मॅनेजमेंटने त्याला स्पष्ट सांगितलं असावं. त्याने टी-२० मधून आधीच निवृत्ती घेतली आहे, त्यामुळे आता वनडेचे दरवाजेही त्याच्यासाठी बंद झाले असावेत."

अभिषेक नायरने वेगळा मुद्दा मांडला. तो म्हणाला, "जडेजा मुख्य टीममध्ये नसला तरी, जर अक्षर पटेलला दुखापत झाली, तर मॅनेजमेंटच्या डोक्यात सर्वात आधी जडेजाचंच नाव येईल. कारण अक्षरनंतर आपल्याकडे तितका अनुभवी दुसरा खेळाडू नाही. सध्या अक्षर पटेल पहिल्या पसंतीचा खेळाडू आहे आणि जडेजा एक महत्त्वाचा बॅकअप म्हणून टीममध्ये राहील."

भारत आणि न्यूझीलंड यांच्यातील महत्त्वाची वनडे सीरिज ४ नोव्हेंबरपासून सुरू होत आहे. पुढच्या वर्षी दक्षिण आफ्रिका, झिम्बाब्वे आणि नामिबियामध्ये होणाऱ्या वनडे वर्ल्ड कपच्या दृष्टीने योग्य टीम कॉम्बिनेशन शोधण्यासाठी भारतासाठी ही सीरिज खूप महत्त्वाची ठरणार आहे.

Indian Cricket Economy : टीम इंडिया म्हणजे पैशांची खाण! परदेशी क्रिकेट बोर्डांची कशी होते चांदी?

Chanda Mandavkar — Fri, 30 Oct 2026 12:03:00 +0530

मुंबई : भारतीय क्रिकेट टीम जेव्हा जेव्हा परदेश दौऱ्यावर जाते, तेव्हा तिथल्या स्टेडियमवर चाहत्यांची तुफान गर्दी दिसते. मॅचची तिकीटं हातोहात विकली जातात, टीव्ही ब्रॉडकास्टिंग राइट्सचे भाव गगनाला भिडतात आणि स्पॉन्सर्सची रांग लागते. म्हणूनच, भारतीय टीमचा दौरा हा यजमान देशांसाठी फक्त एक क्रिकेट मालिका उरत नाही, तर कमाईची मोठी संधी बनतो.

फक्त कोहली-रोहित नाही, नव्या खेळाडूंचीही तुफान क्रेझ!

न्यूझीलंडमध्ये सध्या सुरू असलेली भारत विरुद्ध न्यूझीलंड टी-२० मालिका याचं उत्तम उदाहरण आहे. 'भारतीय टीम जिथे जाते, तिथे चाहते त्यांच्या मागे धावतात,' असं मत न्यूझीलंडचा फलंदाज फिन ॲलनने व्यक्त केलं आहे. या मालिकेतील पहिल्या तीन टी-२० मॅचेसला झालेली तुफान गर्दी भारतीय टीमची हीच ताकद दाखवून देते.

विराट कोहली आणि रोहित शर्मा हे भारतीय क्रिकेटचे सर्वात मोठे ब्रँड आहेत, यात वादच नाही. पण आता टीम इंडियाचं आकर्षण फक्त या दोघांपुरतं मर्यादित राहिलेलं नाही. अभिषेक शर्मा, वैभव सूर्यवंशी आणि संजू सॅमसन यांसारखे तरुण खेळाडूही जगभरात तुफान प्रसिद्धी मिळवत आहेत. परदेशात राहणारे भारतीय आपल्या लाडक्या खेळाडूंना पाहण्यासाठी स्टेडियमवर गर्दी करतात. इतकंच नाही तर तिथले स्थानिक चाहतेही भारतीय टीमची मॅच पाहण्यासाठी प्रचंड उत्सुक असतात.

परदेशी बोर्ड भारतीय टीमच्या दौऱ्याची वाट का पाहतात?

टीम इंडियाच्या दौऱ्यामुळे फक्त तिकीट विक्रीतूनच पैसे मिळत नाहीत, तर ब्रॉडकास्टिंग राइट्स, जाहिराती आणि स्पॉन्सरशिपमधून परदेशी क्रिकेट बोर्डांची मोठी कमाई होते. श्रीलंका क्रिकेट बोर्डाच्या एका अधिकाऱ्याने स्पष्ट म्हटलं होतं की, 'आम्हाला भारतीय टीमचे जास्तीत जास्त सामने होस्ट करायचे आहेत.'

पाकिस्तान क्रिकेट बोर्डाचे माजी अध्यक्ष नजम सेठी यांनीही काही काळापूर्वी एक महत्त्वाचं विधान केलं होतं. ते म्हणाले होते की, 'भारताकडे मोठी आर्थिक ताकद आहे. भारतासोबत खेळल्यामुळे आयसीसीच्या इतर सदस्य देशांना कमाईची मोठी संधी मिळते.'

वेस्ट इंडिज क्रिकेटला भारताचा किती फायदा?

वेस्ट इंडिज क्रिकेट बोर्डाचे माजी सीईओ जॉनी ग्रेव्ह यांच्या विधानावरून भारताच्या आर्थिक प्रभावाचा अंदाज येतो. त्यांच्या मते, वेस्ट इंडिज क्रिकेट बोर्डाच्या एकूण कमाईपैकी तब्बल ७५ टक्के हिस्सा हा भारतीय क्रिकेट आणि भारतीय टीव्ही मार्केटशी संबंधित आहे. यामध्ये भारतीय टीमच्या द्विपक्षीय मालिकांमधून मिळणाऱ्या महसुलाचा मोठा वाटा आहे.

मैदानाबाहेरही टीम इंडियाचा डंका!

थोडक्यात सांगायचं तर, भारतीय क्रिकेटची ताकद ही फक्त खेळाडूंच्या कामगिरीपुरती मर्यादित राहिलेली नाही. अफाट चाहता वर्ग, जगभरात पसरलेला भारतीय समुदाय, मोठा टीव्ही प्रेक्षकवर्ग आणि व्यावसायिक संधींमुळे भारतीय क्रिकेटला जगात एक खास स्थान मिळालं आहे. म्हणूनच जगातलं कोणतंही क्रिकेट बोर्ड असो, ते भारतीय टीमच्या दौऱ्याची वाट पाहत असतं. भारत खेळतो तेव्हा स्टेडियम भरतं आणि स्टेडियम भरलं की क्रिकेटचा व्यवसाय जोरात चालतो!

Rohit Sharma Jersey Number 45 : रोहित शर्माने 45 नंबरची जर्सी का निवडली? पहिल्या पसंतीचा नंबर सोडण्यामागची गोष्ट

Karishma R — Sat, 31 Oct 2026 17:54:49 +0530

मुंबई : टीम इंडियाचा स्टार बॅटर रोहित शर्माची ४५ नंबरची जर्सी क्रिकेट फॅन्सना चांगलीच माहितीये. पण त्याने हाच नंबर का निवडला? सुरुवातीला त्याला कोणता नंबर हवा होता? आणि पहिली पसंती का बदलावी लागली? या सगळ्या प्रश्नांची उत्तरं खुद्द रोहितनेच दिली आहेत.

'फॅमिली फुल हाऊस विथ रोहित शर्मा' या गेमिंग रिॲलिटी शोमध्ये बोलताना भारताच्या माजी कर्णधाराने हा किस्सा सांगितला. क्रिकेटच्या सुरुवातीच्या दिवसांत त्याला सिंगल डिजिट (एकेरी) नंबर हवा होता. पण त्याचे आवडते नंबर आधीच इतर खेळाडूंनी घेतले होते, त्यामुळे शेवटी त्याने ४५ नंबर निवडला.

रोहितची पहिली पसंती होती १९ नंबर

रोहित शर्मा जेव्हा एज-ग्रुप क्रिकेट खेळायचा, तेव्हा तो १९ नंबरची जर्सी घालायचा. पण सीनियर टीममध्ये गेल्यावर हा नंबर वापरता येणार नाही, हे त्याला नंतर समजलं. कारण, तेव्हा १९ नंबरची जर्सी टीम इंडियाचा दिग्गज खेळाडू राहुल द्रविडची होती.

"मी जेव्हा पहिल्यांदा जर्सी घालून क्रिकेट खेळायला लागलो, तेव्हा मला एक नंबर निवडायचा होता. तोपर्यंत ५, ८ आणि ९ सारखे बरेच नंबर इतरांनी घेतले होते. मला सिंगल डिजिट नंबर हवा होता, पण ते सगळे बुक होते. शेवटी फक्त १९ नंबर उरला होता. मलाही तो नंबर आवडला. त्यामुळे अंडर-१९ क्रिकेटमध्ये मी १९ नंबरचीच जर्सी घातली," अशी आठवण रोहितने सांगितली.

राहुल द्रविडमुळे बदलावा लागला नंबर

१९ नंबरची जर्सी घालणाऱ्या रोहितला त्याच्या एका सहकाऱ्याने सांगितलं होतं की, पुढे भारतीय संघात निवड झाली तर हा नंबर बदलावा लागेल. रोहित म्हणाला, "त्यावेळी माझ्यासोबत खेळणाऱ्या एका खेळाडूने मला हे सांगितलं होतं. त्याचं नाव आता मला आठवत नाही. तो म्हणाला होता की, 'अंडर-१९ मध्ये हा नंबर ठीक आहे, पण इंडिया टीममध्ये गेलास तर हा नंबर मिळणार नाही.' मी विचारलं 'का?', तर तो म्हणाला, 'तो राहुल द्रविडचा नंबर आहे'." रोहितने पुढे सांगितलं की, "त्यावेळी राहुल द्रविड १९ नंबरची जर्सी घालायचे आणि ते टीमचे कॅप्टनही होते."

आईचा सल्ला आणि फायनल झाला ४५ नंबर

१९ नंबर मिळणार नाही हे समजल्यावर रोहितने आईचा सल्ला घेतला. आईने त्याला ९ नंबर निवडायला सांगितला. पण तो नंबरही दुसऱ्या एका खेळाडूने आधीच घेतला होता. २७ नंबर घेण्यात रोहितला फारसा रस नव्हता. शेवटी ४ आणि ५ या अंकांची बेरीज ९ होते, हे गणित त्याला आवडलं आणि त्याने ४५ नंबर फायनल केला.

"माझ्या आईने मला ९ नंबरची जर्सी घ्यायला सांगितली होती. पण तो नंबर आधीच कुणीतरी घेतला होता. मला ४ आणि ५ चं कॉम्बिनेशन आवडलं. म्हणून मी ४५ नंबर निवडला. या दोन्ही अंकांची बेरीज केली तरी ९ च येते," असं रोहित म्हणाला. सुरुवातीला नाईलाजाने निवडलेला हा ४५ नंबर पुढे रोहित शर्माची ओळख बनला. इंटरनॅशनल क्रिकेटमध्ये हा नंबर त्याच्या नावाशी असा काही जोडला गेलाय की, आज ती भारतीय क्रिकेटमधली सर्वात लोकप्रिय जर्सी बनलीये.

न्यूझीलंडविरुद्धच्या वनडे सीरिजसाठी रोहित सज्ज

आता रोहित शर्मा पुन्हा एकदा क्रिकेटच्या मैदानात उतरायला सज्ज झालाय. ४ नोव्हेंबरपासून सुरू होणाऱ्या न्यूझीलंडविरुद्धच्या पाच मॅचच्या वनडे सीरिजमध्ये टीम इंडिया भिडणार आहे. पहिल्या तीन मॅचमध्ये शुभमन गिल टीम इंडियाचं नेतृत्व करेल, तर शेवटच्या दोन मॅचमध्ये श्रेयस अय्यर कॅप्टन असेल.

२०२७ च्या वनडे वर्ल्ड कपच्या तयारीच्या दृष्टीने ही सीरिज दोन्ही टीम्ससाठी खूप महत्त्वाची आहे. शिवाय, वनडे फॉरमॅटमध्ये रोहित शर्मा आणि विराट कोहलीला एकत्र खेळताना पाहण्याची संधीही फॅन्सना मिळणार आहे. टीम इंडिया या सीरिजची पहिली मॅच ऑकलंडमध्ये खेळेल. त्यानंतर वेलिंग्टन आणि हॅमिल्टनला सामने होतील. शेवटच्या दोन मॅच माऊंट माउंगानुईमध्ये खेळवल्या जातील. हे पाचही सामने भारतीय वेळेनुसार सकाळी ७.३० वाजता सुरू होतील.

Sanjay Manjrekar: संजय मांजरेकरांनी अलिबागची जमीन २२.४० कोटींना विकली!

vivek panmand — Fri, 30 Oct 2026 20:54:45 +0530

माजी भारतीय क्रिकेटपटू संजय मांजरेकर यांनी अलिबागमधील आपली मोक्याची जमीन तब्बल २२.४० कोटी रुपयांना विकली आहे. प्रसिद्ध डिजिटल ऑटोमोटिव्ह प्लॅटफॉर्म असलेल्या 'कार्ट्रेड टेक लिमिटेड' या कंपनीने ही मालमत्ता खरेदी केली आहे. ही पूर्ण जमीन ८,०५० चौरस मीटर (८०.५० गुंठे/एकर क्षेत्रफळ) एवढी असून ती नॉन-ॲग्रीकल्चरल (NA) म्हणजेच अकृषक आहे. या जागेत दोन निवासी घरेसुद्धा समाविष्ट आहेत.

कुठे आहे ही प्रॉपर्टी?

ही मालमत्ता महाराष्ट्रातील रायगड जिल्ह्यातील अलिबाग तालुक्यातील धोकावडे गावात आहे. या हाय-प्रोफाइल व्यवहारासाठी १.३४४ कोटी रुपयांची स्टॅम्प ड्युटी (मुद्रांक शुल्क) भरण्यात आली आहे. २७ ऑक्टोबर २०२६ रोजी या व्यवहाराची अधिकृत नोंदणी झाली आहे.

सेलिब्रिटींची आवडती जागा!

मुंबईजवळ असल्यामुळे अलिबाग सध्या बॉलिवूड कलाकार, उद्योगपती आणि क्रिकेटपटूंच्या आलिशान हॉलिडे होमसाठी पहिली पसंती ठरत आहे. डिजिटल ऑटोमोबाईल क्षेत्रात आघाडीवर असलेल्या कार्ट्रेड टेक कंपनीने अलिबागमध्ये एवढी मोठी जमीन खरेदी केल्यामुळे, तिथे एखादा कॉर्पोरेट किंवा व्यावसायिक प्रकल्प सुरू होणार का, अशी चर्चा रंगली आहे.

रिअल इस्टेटचे भाव गगनाला शिवले!

मुंबई ते अलिबाग दरम्यान सुरू झालेली रो-रो बोट सेवा आणि रस्ते विकासामुळे या भागातील रिअल इस्टेटचे भाव प्रचंड वाढले आहेत. ही विकलेली जमीन आधीच 'अकृषक' (NA) वर्गात मोडत असल्याने, खरेदीदार असलेल्या कार्ट्रेड टेक कंपनीला इथे कोणताही नवीन प्रकल्प किंवा बांधकाम तात्काळ सुरू करणे सोपे जाणार आहे. सध्या क्रिकेट कमेंटेटर म्हणून काम करणारे संजय मांजरेकर यांच्या या मोठ्या व्यवहाराने मुंबई आणि आसपासच्या सेलिब्रिटी रिअल इस्टेट बाजारात चांगलीच चर्चा घडवून आणली आहे.

Shubman Gill Temple Device: न्यूझीलंड वनडे सीरिजआधी शुभमन गिलच्या डोक्यावर दिसलं नवं ट्रॅकिंग डिव्हाइस; 'टेम्पल'ची जोरदार चर्चा

vivek panmand — Thu, 29 Oct 2026 20:40:42 +0530

ऑकलंडमध्ये न्यूझीलंडविरुद्धच्या वनडे सीरिजसाठी टीम इंडिया जोरदार सराव करत आहे. या सरावादरम्यान भारतीय कॅप्टन शुभमन गिलने वापरलेलं एक नवीन फिटनेस डिव्हाइस सध्या क्रीडा विश्वात चर्चेचा विषय ठरलं आहे. ऑकलंडमधील प्रॅक्टिस सेशनमध्ये गिलच्या कपाळावर 'टेम्पल' (Temple) नावाचं एक फिटनेस ट्रॅकिंग डिव्हाइस दिसलं. नेहमीच्या फिटनेस बँडपेक्षा हे खूप वेगळं आहे. हे डिव्हाइस खास मेंदूशी संबंधित सिग्नल्स ट्रॅक करण्यासाठी डिझाइन केलं आहे.

याआधी भारताची स्टार बॅडमिंटनपटू पीव्ही सिंधूनेही हे डिव्हाइस वापरलं होतं, तेव्हाही याची बरीच चर्चा झाली होती. मात्र, आपण हे डिव्हाइस का वापरत आहोत, याबद्दल गिलने अद्याप कोणतीही माहिती दिलेली नाही. भारताच्या दोन मोठ्या खेळाडूंनी हे नवीन तंत्रज्ञान वापरल्यामुळे क्रीडा चाहत्यांमध्ये याबद्दल मोठी उत्सुकता निर्माण झाली आहे.

काय आहे हे 'टेम्पल' डिव्हाइस?

झोमॅटोचे सह-संस्थापक दीपंदर गोयल यांच्याशी संबंधित एका टीमने हे डिव्हाइस तयार केलं आहे. हे डिव्हाइस कपाळाच्या बाजूला लावलं जातं. याच्या मदतीने मेंदूतील रक्तप्रवाह आणि मेंदूच्या कार्याशी संबंधित इतर शारीरिक सिग्नल्स ट्रॅक करता येतात. फक्त हार्ट रेट आणि झोप ट्रॅक करणाऱ्या स्मार्टवॉचपेक्षा हे खूप वेगळं आहे. मानसिक ताण आणि त्यावर शरीराची होणारी प्रतिक्रिया समजून घेणं, हा या डिव्हाइसचा मुख्य उद्देश आहे.

हे डिव्हाइस ऑप्टिकल सेन्सर्सचा वापर करून मेंदूतील रक्तप्रवाहातील बदल टिपतं. मात्र, तज्ज्ञांच्या मते हे कोणतंही वैद्यकीय उपकरण (मेडिकल डिव्हाइस) नाही. हे फक्त वेलनेस आणि संशोधनासाठी बनवलं आहे. तसेच, खेळांमध्ये याचा नेमका किती फायदा होतो, हे अद्याप पूर्णपणे सिद्ध झालेलं नाही.

IPL 2027: रोहित शर्माकडे पुन्हा मुंबई इंडियन्सची कमान, हार्दिक पांड्याचं काय होणार?

vivek panmand — Fri, 30 Oct 2026 22:00:31 +0530

तीन सीझनच्या वादानंतर मुंबई इंडियन्सच्या मॅनेजमेंटने आपली चूक सुधारली आहे. ज्याने टीमला पाच वेळा आयपीएल ट्रॉफी जिंकवून दिली, वानखेडेवर ज्याचं राज्य चालतं, त्या रोहित शर्माकडेच मॅनेजमेंटने पुन्हा एकदा कर्णधारपद सोपवण्याचा निर्णय घेतला आहे.

मॅनेजमेंटचा हा निर्णय योग्य की अयोग्य हे येणारा काळच ठरवेल. पण हार्दिक पांड्याच्या नेतृत्वाखाली मुंबईच्या ड्रेसिंग रूममध्ये निर्माण झालेला तणाव संपवण्यासाठी हा निर्णय घेतला गेल्याचं स्पष्ट आहे. गेल्या तीन वर्षांत हार्दिकच्या कॅप्टनशीपमध्ये टीमची कामगिरी खूपच निराशाजनक राहिली.

2026 च्या सीझनमध्ये मुंबईचा ताफा कागदावर अत्यंत मजबूत दिसत होता. प्रत्येक जागेसाठी दमदार पर्याय उपलब्ध होते. तरीसुद्धा टीमला संपूर्ण सीझनमध्ये फक्त चार सामने जिंकता आले आणि थेट नवव्या क्रमांकावर फेकली गेली.

एका मॅचदरम्यान तर टीमचे मालक आकाश अंबानी इतके निराश झाले की, मॅच संपण्यापूर्वीच स्टेडियम सोडून निघून गेले. सीझनच्या मध्यात हार्दिक दुखापतग्रस्त झाला आणि सामन्यांमधून बाहेर पडला. या सगळ्यावरून मुंबईच्या कॅम्पमध्ये काहीच ठीक चाललं नसल्याचं स्पष्ट दिसत होतं.

त्यानंतरच मॅनेजमेंटने हार्दिकला कर्णधारपदावरून हटवण्याच्या हालचाली सुरू केल्या. सीझनच्या मध्यातच रोहितला पुन्हा कॅप्टन करायचं होतं. पण ते शक्य झालं नाही. मग सूर्यकुमार यादव आणि नंतर जसप्रीत बुमराहने काळजीवाहू कर्णधार म्हणून काम पाहिलं. पण 2027 च्या सीझनसाठी नवीन कॅप्टन मिळणार हे निश्चित होतं.

सूर्या, बुमराह आणि भविष्यातील स्टार टिळक वर्मा हे पर्याय समोर असतानाही मॅनेजमेंटची पहिली पसंती रोहित शर्माच होती. रोहितने टिळक वर्माचं नाव सुचवलं होतं, पण मॅनेजमेंट रोहितवरच ठाम राहिलं. अखेर दीर्घ चर्चेनंतर न्यूझीलंड दौऱ्यावर जाण्यापूर्वी रोहितने पुन्हा कर्णधारपद स्वीकारण्यास होकार दिला.

रोहितच्या सांगण्यावरूनच सपोर्ट स्टाफमध्येही मोठे बदल करण्यात आले आहेत. कायरन पोलार्डकडे मुख्य प्रशिक्षकपद, मिचेल मॅकक्लेनाघनकडे गोलंदाजी प्रशिक्षकपद, टी दिलीप यांच्याकडे क्षेत्ररक्षण प्रशिक्षकपद, रॉबिन उथप्पाकडे फलंदाजी प्रशिक्षकपद तर धवल कुलकर्णीकडे डेव्हलपमेंट बॉलिंग कोचची जबाबदारी सोपवण्यात आली आहे. उथप्पा आणि दिलीप वगळता बाकी सर्वजण रोहितच्या नेतृत्वात मुंबईसाठी खेळलेले आहेत.

हार्दिकला कॅप्टन बनवलं तेव्हा सूर्या आणि बुमराह नाराज असल्याच्या चर्चा होत्या. आता रोहित परत आल्यामुळे त्यांचे मतभेद दूर होतील. आता प्रश्न हार्दिक पांड्याचा आहे. त्याला ट्रेड करण्याच्या चर्चा सुरू आहेत, पण योग्य डील मिळाली नाही तर तो मुंबईतच राहील. रिपोर्टनुसार, ट्रेड न झाल्यास हार्दिकने रोहितच्या नेतृत्वाखाली खेळण्याची तयारी दाखवली आहे.

रोहित 2027 च्या सीझनमध्ये नेतृत्व करेल. 2028 मध्ये मेगा लिलाव होणार असल्याने मॅनेजमेंटला नवी टीम उभारण्याची संधी मिळेल. तोपर्यंत भविष्याचा विचार करून नवीन कॅप्टन तयार करता येईल.

Cape Town Test: दक्षिण आफ्रिकेचा कांगारूंवर ऐतिहासिक विजय, मालिका २-१ ने खिशात

vivek panmand — Sat, 31 Oct 2026 21:33:24 +0530

दक्षिण आफ्रिकेने केपटाऊन कसोटीत खऱ्या अर्थाने चमत्कार करून दाखवलाय. मालिकेत ०-१ ने पिछाडीवर असताना आणि पहिल्या डावात १०० धावांनी मागे पडूनही, त्यांनी शनिवारी ऑस्ट्रेलियाला १७६ धावांनी धूळ चारली आणि मालिका खिशात घातली. दुसऱ्या डावात ऑस्ट्रेलियाचा संपूर्ण संघ अवघ्या १११ धावांत गारद झाला. या विजयासह टेम्बा बावुमाच्या संघाने तीन सामन्यांची ही थरारक कसोटी मालिका २-१ ने जिंकली. या विजयाचा खरा हिरो ठरला तो फिरकीपटू सायमन हार्मर. त्याने दुसऱ्या डावात फक्त १६ धावा देऊन ६ विकेट्स घेतल्या. पहिल्या डावातही त्याने ४ विकेट्स काढल्या होत्या. म्हणजेच या संपूर्ण कसोटीत त्याने तब्बल १० विकेट्स आपल्या नावावर केल्या.

दक्षिण आफ्रिकेचा दमदार कमबॅक आणि मालिका विजय

या मालिकेतील पहिल्या कसोटीत ऑस्ट्रेलियाने २१४ धावांच्या मोठ्या फरकाने विजय मिळवला होता. त्यानंतर दुसऱ्या कसोटीत प्रथम फलंदाजी करताना एक वेळ अशी होती जेव्हा दक्षिण आफ्रिकेची अवस्था ६ बाद ११० धावा अशी झाली होती. त्यांच्यावर मालिका गमावण्याची नामुष्की ओढवणार असं वाटत होतं. पण तिथून या वर्ल्ड टेस्ट चॅम्पियन्सनी जबरदस्त कमबॅक करत मालिका जिंकून दाखवली.

दक्षिण आफ्रिकेचा ऐतिहासिक विजय

SIMON HARMER with the final blow as SOUTH AFRICA win the series against AUSTRALIA

#SAvsAUS https://t.co/ziKMMyurCB

— FanCode (@FanCode) October 31, 2026

थरारक सामना आणि मालिका

केपटाऊनमध्ये शनिवारी ऑस्ट्रेलियाची अवस्था अतिशय वाईट होती. अवघ्या ४२ धावांत त्यांनी ६ विकेट्स गमावल्या होत्या. ९ व्या क्रमांकावर फलंदाजीला आलेल्या नॅथन लायनने ३३ धावांची खेळी केली नसती, तर कांगारूंचा डाव १०० धावांच्या आतच आटोपला असता. कॅमेरून ग्रीन (२७) वगळता ऑस्ट्रेलियाच्या एकाही प्रमुख फलंदाजाला दुहेरी आकडा गाठता आला नाही. त्यांचे तब्बल चार फलंदाज शून्यावर बाद झाले. पहिल्या डावात पॅट कमिन्सच्या नेतृत्वाखालील ऑस्ट्रेलियाने ३२९ धावा करत १०० धावांची आघाडी घेतली होती. पण दुसऱ्या डावात बावुमाच्या संघाने ३८७ धावांचा डोंगर उभा करत जोरदार मुसंडी मारली. एक वेळ अशी होती जेव्हा १८१ धावांवर ५ विकेट्स गमावून दक्षिण आफ्रिका पराभवाच्या छायेत होती. पण त्यानंतर यष्टीरक्षक रायन रिकेलटन आणि वियान मुल्डर यांनी सहाव्या विकेटसाठी १५४ धावांची अभेद्य भागीदारी करत सामन्याचं चित्रच पालटून टाकलं. रिकेलटन (१०१) आणि मुल्डर (११५) या दोघांनीही शानदार शतके झळकावली.

मालिका जिंकण्यासाठी कांगारूंना हव्या होत्या २८८ धावा

चौथ्या डावात केपटाऊन कसोटी आणि मालिका जिंकण्यासाठी ऑस्ट्रेलियासमोर २८८ धावांचं आव्हान होतं. कांगारूंची तगडी फलंदाजी पाहता हे लक्ष्य त्यांच्यासाठी फार कठीण नसेल असाच सर्वांचा अंदाज होता. पण हार्मरच्या घातक गोलंदाजीसमोर ऑस्ट्रेलियन फलंदाजांनी अक्षरशः लोटांगण घातलं.

मालिकेचा निकाल

पहिली कसोटी- ऑस्ट्रेलिया २१४ धावांनी विजयी. डर्बन.

दुसरी कसोटी- दक्षिण आफ्रिका एक डाव आणि ३१ धावांनी विजयी. गकेबरहा.

तिसरी कसोटी- दक्षिण आफ्रिका १७६ धावांनी विजयी. केपटाऊन.

दक्षिण आफ्रिकेने मालिका २-१ ने जिंकली.

मालिकावीर- मार्को यान्सेन (१९८ धावा, १३ विकेट्स)

Mitchell Santner: मिचेल सँटनरने रचला इतिहास, भारताला नडणारा ठरला नंबर 1 कीवी बॉलर

vivek panmand — Fri, 30 Oct 2026 20:51:24 +0530

ऑकलंड: भारतासोबत झालेल्या चौथ्या T20 मॅचमध्ये न्यूझीलंडचा कॅप्टन मिचेल सँटनरने आपल्या जबरदस्त बॉलिंगने एक नवा इतिहास रचलाय. या मॅचमध्ये ४ ओव्हर्समध्ये अवघे २४ रन देत त्याने अक्षर पटेल आणि नितीश कुमार रेड्डी या दोन महत्त्वाच्या बॅटर्सना आऊट केलं. यासोबतच T20 इंटरनॅशनल क्रिकेटमध्ये १५० विकेट्स घेणारा तो न्यूझीलंडचा तिसरा बॉलर ठरलाय. सँटनरच्या नावावर आता १४२ T20 मॅचेसमध्ये २३.०९ च्या सरासरीने १५१ विकेट्स जमा झाल्या आहेत.

सँटनरने आतापर्यंत चार वेळा एकाच मॅचमध्ये ४ विकेट्स घेण्याची किमया साधलीय. ११ रन देऊन ४ विकेट्स ही त्याची सर्वोत्कृष्ट कामगिरी आहे. चालू सीरिजमध्ये तर सँटनरचा भलताच फॉर्म दिसतोय, त्याने ११.२२ च्या सरासरीने आतापर्यंत ९ विकेट्स खिशात घातल्या आहेत. तर २०२६ या एकाच वर्षात खेळलेल्या २० मॅचेसमध्ये त्याच्या नावावर २१ विकेट्स जमा झाल्या आहेत. भारता विरुद्ध सर्वात जास्त T20 विकेट्स घेण्याचा मोठा रेकॉर्ड आता सँटनरच्या नावावर जमा झालाय. इश सोढीचा ३० विकेट्सचा रेकॉर्ड मोडून सँटनरने भारतासोबतच्या ३१ मॅचेसमध्ये ३२ विकेट्स घेण्याचा कारनामा केलाय.

न्यूझीलंडसाठी T20 मध्ये सर्वाधिक विकेट्स घेणाऱ्यांच्या लिस्टमध्ये इश सोढी (१४२ मॅचेसमध्ये १६५ विकेट्स) पहिल्या क्रमांकावर आहे आणि टिम साउदी (१२६ मॅचेसमध्ये १६४ विकेट्स) दुसऱ्या नंबरवर आहे. आता सँटनर त्यांच्या अगदी जवळ पोहोचत तिसऱ्या नंबरवर भक्कम उभा आहे.

मॅचबद्दल बोलायचं तर, ऑकलंडमध्ये खेळल्या गेलेल्या या चौथ्या T20 मॅचमध्ये न्यूझीलंडने भारताचा ८७ रन्सने धुव्वा उडवला. जेकब डफीची धारदार बॉलिंग आणि ग्लेन फिलिप्सची वादळी सेंच्युरी याच्या जोरावर न्यूझीलंडने या सीरिजमधील आपला पहिला विजय नोंदवला. न्यूझीलंडने पहिल्यांदा बॅटिंग करत २० ओव्हर्समध्ये ७ विकेट्स गमावून २५९ रन्सचा डोंगर उभा केला होता. ग्लेन फिलिप्सने अवघ्या ४९ बॉलमध्ये ६ फोर आणि १० सिक्स मारत १०७ रन्स ठोकले, तर मायकेल ब्रेसवेलने २५ बॉलमध्ये ४ फोर आणि ६ सिक्सच्या मदतीने ६५ रन्सची धुवांधार इनिंग खेळली.

२६० रन्सच्या डोंगरासारख्या टार्गेटचा पाठलाग करताना भारतीय बॅटर्सची दाणादाण उडाली. जेकब डफी (४/२३), मिचेल सँटनर (२/२४) आणि मॅथ्यू फिशर (२/४०) यांच्या शिस्तबद्ध बॉलिंगसमोर भारतीय टीम ढेपाळली. पूर्ण २० ओव्हर्समध्ये भारत १७२ रन्सवर ऑलआऊट झाला. भारताकडून तिलक वर्माने ३५ बॉलमध्ये ३५ रन्स करत सर्वाधिक स्कोअर केला.

Axar Patel Record: अक्षर पटेलने रचला इतिहास, टी-२० मध्ये अशी कामगिरी करणारा ठरला पहिलाच भारतीय

vivek panmand — Fri, 30 Oct 2026 20:38:33 +0530

ऑकलंड: भारतीय संघाचा ऑलराउंडर अक्षर पटेलने पुरुष टी-२० क्रिकेटमध्ये एक भलताच मोठा पराक्रम केलाय. टी-२० फॉरमॅटमध्ये ३,००० धावा आणि ३०० विकेट्सचा टप्पा पार करणारा अक्षर हा पहिलाच भारतीय खेळाडू बनला आहे. न्यूझीलंडविरुद्धच्या चौथ्या टी-२० सामन्यात फिन ॲलनला आऊट करत त्याने ही ऐतिहासिक कामगिरी पूर्ण केली. याआधी रशीद खान, सुनील नरेन, ड्वेन ब्राव्हो, आंद्रे रसेल, शाकिब अल हसन, शाहिद आफ्रिदी, किरॉन पोलार्ड आणि सॅम करन यांसारख्या मोजक्याच दिग्गज खेळाडूंना हा टप्पा गाठता आला होता.

अक्षरने आपल्या टी-२० कारकिर्दीत आतापर्यंत ३४५ सामने खेळले आहेत. यामध्ये त्याने २१.९४ च्या सरासरीने आणि १३४.४३ च्या स्ट्राइक रेटने ३,८१-८ धावा केल्या आहेत, ज्यामध्ये ९ अर्धशतकांचा समावेश आहे. यासोबतच त्याने गोलंदाजीत ३०० विकेट्सही पूर्ण केल्या आहेत. मात्र, हा ऐतिहासिक विक्रम नोंदवला असला तरी ऑकलंडमधील हा सामना अक्षरसाठी वैयक्तिकरीत्या फारसा चांगला राहिला नाही. ३ षटकांत ४३ धावा देत त्याला अवघी १ विकेट मिळाली. १७ चेंडूंत ३१ धावा करणाऱ्या फिन ॲलनला त्याने अभिषेक शर्माकरवी झेलबाद केले.

फलंदाजीतही अक्षरला काही खास कमाल दाखवता आली नाही. तो ९ चेंडूंत ७ धावा काढून मिचेल सँटनरच्या गोलंदाजीवर त्याच झेल देऊन बाद झाला. या सामन्यात भारतीय संघाला ८७ धावांनी मोठ्या पराभवाला सामोरे जावे लागले. प्रथम फलंदाजी करताना न्यूझीलंडने ७ गडी गमावून २५९ धावांचा डोंगर उभारला होता. न्यूझीलंडकडून ग्लेन फिलिप्सने ४९ चेंडूंत १०७ धावांची तर मायकेल ब्रेसवेलने २५ चेंडूंत ६५ धावांची तुफानी खेळी केली. या दोघांनी मिळून ४१ चेंडूंत ११५ धावांची भागीदारी रचली.

धावांचा पाठलाग करताना भारतीय संघाला २० षटकांत ९ गडी गमावून १७२ धावांपर्यंतच मजल मारता आली. या पराभवामुळे मालिका ४-० किंवा ५-० ने जिंकण्याचे भारताचे स्वप्न अधुरे राहिले असले, तरी सुरुवातीचे तिन्ही सामने जिंकल्यामुळे ५ सामन्यांच्या या मालिकेत भारत सध्या ३-१ ने पुढे आहे.